“அரசுப் பள்ளின்னாலே சத்துணவும், இலவச சீருடையும் மட்டும்தானா? அங்கெல்லாம் படிச்சா டெக்னாலஜி தெரியுமா?” என்று ஏளனமாகப் பேசியவர்கள் வாயடைத்துப் போகும் அளவுக்கு ஒரு சம்பவத்தைச் செய்துள்ளது தமிழ்நாடு பள்ளிக் கல்வித்துறை. லட்சக்கணக்கில் ஃபீஸ் வாங்கும் இன்டர்நேஷனல் பள்ளிகளுக்குக் கிடைக்கும் வசதி, இனி நம்ம ஊர் அரசுப் பள்ளி மாணவர்களுக்கும் கிடைக்கப்போகிறது.
ஆம், தமிழகத்தில் தேர்ந்தெடுக்கப்பட்ட அரசுப் பள்ளிகளில் நவீன வசதிகளுடன் கூடிய ‘ரோபோட்டிக் ஆய்வகங்கள்’ (Robotic Labs) அமைக்கப்பட்டுள்ளன.
எங்கே? எவ்வளவு செலவு?
தமிழ்நாடு முழுவதும் உள்ள 15 வருவாய் மாவட்டங்களில், குறிப்பாகக் கார்ப்பரேஷன் மற்றும் நகராட்சிப் பகுதிகளில் செயல்படும் உயர்நிலை மற்றும் மேல்நிலைப் பள்ளிகளில் இந்த ஆய்வகங்கள் அமைக்கப்பட்டுள்ளன. இதற்காகத் தமிழக அரசு ஒதுக்கியுள்ள தொகை சுமார் ரூ.6.30 கோடி.
ஏற்கனவே அரசுப் பள்ளிகளில் ‘ஹை-டெக் லேப்’ (Hi-Tech Lab) மூலம் கணினிப் பயிற்சி வழங்கப்பட்டு வருகிறது. அதன் அடுத்தக்கட்ட பாய்ச்சலாகத்தான் இந்த ரோபோட்டிக் லேப் பார்க்கப்படுகிறது.
என்னென்ன இருக்கும்?
இந்த ஆய்வகங்களில் வெறும் பொம்மைகளை வைத்து விளையாடுவது இல்லை. இது சீரியஸான படிப்பு!
- மாணவர்கள் சொந்தமாக ரோபோக்களை வடிவமைக்கத் தேவையான கருவிகள் (Robotic Kits).
- எலக்ட்ரானிக்ஸ் பாகங்கள், சென்சார்கள் (Sensors).
- கோடிங் (Coding) மற்றும் புரோகிராமிங் செய்யத் தேவையான மென்பொருட்கள்.
- 3டி பிரிண்டிங் (3D Printing) தொழில்நுட்பம்.
மாணவர்களுக்கு என்ன பயன்?
“புத்தகத்தைப் படித்துப் பரீட்சை எழுதுவதை விட, கைகளால் ஒன்றை உருவாக்கிப் பார்ப்பதுதான் சிறந்த கல்வி.”
கிராமப்புற மற்றும் ஏழை எளிய மாணவர்கள், வருங்கால உலகத்தை ஆளப்போகும் செயற்கை நுண்ணறிவு (AI), இயந்திரவியல் மற்றும் ஆட்டோமேஷன் போன்ற துறைகளில் சிறந்து விளங்க வேண்டும் என்பதே இத்திட்டத்தின் நோக்கம். 6ஆம் வகுப்பு முதல் 9ஆம் வகுப்பு வரை படிக்கும் மாணவர்கள் இதன் மூலம் நேரடியாகப் பயனடைவார்கள்.
ஆசிரியர்களுக்குப் பயிற்சி:
இந்த லேப்களை எப்படிக் கையாள்வது என்பது குறித்து, அந்தந்தப் பள்ளிகளைச் சேர்ந்த கணினி ஆசிரியர்களுக்கும், அறிவியல் ஆசிரியர்களுக்கும் சிறப்புப் பயிற்சிகளும் வழங்கப்பட்டு வருகின்றன.
திட்டம் சூப்பர்தான்! ஆனால், பல பள்ளிகளில் கம்ப்யூட்டர் லேப் பெயரளவுக்குத் திறக்கப்பட்டு, தூசு படிந்து கிடப்பதைப் பார்க்கிறோம். அதுபோல இந்த ரோபோட்டிக் லேப்களும் காட்சிப் பொருளாக மாறிவிடக்கூடாது. மாணவர்கள் எவ்விதத் தயக்கமும் இன்றி, இந்தக் கருவிகளைத் தொட்டு, உடைத்து, உருவாக்கிப் பார்க்க அனுமதித்தால்தான்… நாளைய விஞ்ஞானிகள் அரசுப் பள்ளியிலிருந்து உருவெடுப்பார்கள்!