“25 வயசாகிடுச்சா? இன்னும் கல்யாணம் ஆகலையா?” – இந்தக் கேள்வி மெல்ல மெல்ல வழக்கொழிந்து வருகிறது. இன்றைய பெண்கள், திருமணத்தை ஒரு கட்டாயமாகப் பார்க்காமல், அதை ஒரு தேர்வாக (Choice) மட்டுமே பார்க்கத் தொடங்கிவிட்டனர்.
இதனை உறுதிப்படுத்தும் விதமாக, சமீபத்தில் வெளியான ஒரு ஆய்வு முடிவு உலகையே திரும்பிப் பார்க்க வைத்துள்ளது. அமெரிக்காவைச் சேர்ந்த முன்னணி நிதி நிறுவனமான மார்கன் ஸ்டான்லி (Morgan Stanley) வெளியிட்ட கணிப்பின்படி, 2030-ம் ஆண்டிற்குள், 25 முதல் 44 வயதுக்குட்பட்ட பெண்களில் சுமார் 45 சதவீதம் பேர் திருமணமாகாதவர்களாகவும் (Single), குழந்தைகள் இல்லாதவர்களாகவும் (Childless) இருப்பார்கள் என்று தெரிவிக்கப்பட்டுள்ளது.
இது அமெரிக்க ஆய்வு என்றாலும், இந்தியாவின் மெட்ரோ நகரங்களிலும் (சென்னை, பெங்களூரு, மும்பை) இந்த கலாச்சாரம் வேகமாகப் பரவி வருகிறது. பெண்கள் ஏன் இந்த முடிவை எடுக்கிறார்கள்?
1. பொருளாதாரச் சுதந்திரம் (Financial Independence): முன்பெல்லாம், “பெண் தனியாக வாழ்வது கஷ்டம், அவளுக்கு ஒரு பாதுகாப்பு வேண்டும்” என்று திருமணம் செய்து வைப்பார்கள். ஆனால் இன்று, பெண்கள் ஆண்களுக்கு நிகராக அல்லது அவர்களை விட அதிகமாகச் சம்பாதிக்கிறார்கள். “என் தேவைகளை நானே பார்த்துக்கொள்வேன்” என்ற தைரியம் அவர்களுக்குத் திருமணத்தைத் தள்ளிப்போட அல்லது தவிர்க்க உதவுகிறது.
2. கரியர் முக்கியம் பாஸ்! (Career Focus): குடும்பம், குழந்தை என்று சிக்கிக்கொண்டால், வேலையில் அடுத்த கட்டத்திற்குச் செல்ல முடியாது என்று பல பெண்கள் கருதுகிறார்கள். வீடு பெருக்கி, சமைத்துப் போடுவதை விட, ஒரு நிறுவனத்தை நிர்வகிப்பதில் (Leadership) அவர்கள் அதிக ஆர்வம் காட்டுகிறார்கள்.
3. சமரசத்திற்கு இடமில்லை (Zero Compromise): “குடிகாரன் என்றாலும் பரவாயில்லை, அட்ஜஸ்ட் பண்ணிக்கோ” என்று சொல்லும் காலம் மலையேறிவிட்டது. தனக்கான மரியாதை இல்லாத, சமத்துவம் இல்லாத உறவில் இருப்பதை விட, தனிமையில் மகிழ்ச்சியாக இருப்பதே மேல் என்று இன்றைய ‘2K கிட்ஸ்’ பெண்கள் நினைக்கிறார்கள்.
4. குழந்தை வளர்ப்புச் செலவு: இன்றைய விலைவாசியில் ஒரு குழந்தையை வளர்த்து ஆளாக்குவது என்பது சாதாரண விஷயம் அல்ல. பொருளாதாரச் சுமை மற்றும் பொறுப்புகள் காரணமாகவும் பலர் குழந்தை பெற்றுக்கொள்வதைத் தவிர்க்கிறார்கள்.
‘ஷி–கானமி‘ (SHE-conomy) வளர்ச்சி: திருமணமாகாத பெண்கள் தங்கள் பணத்தைத் தங்களின் சுயநலத்திற்காகச் செலவிடுகிறார்கள். பயணம் (Travel), அழகு சாதனப் பொருட்கள், ஆடம்பர வீடுகள் மற்றும் கார்கள் வாங்குவதில் இவர்கள் அதிகம் முதலீடு செய்கிறார்கள். இது பொருளாதாரத்தில் ‘SHE-conomy’ என்ற ஒரு புதிய சந்தையையே உருவாக்கியுள்ளது.
மொத்தத்தில்… இது கலாச்சாரச் சீரழிவு அல்ல; இது ஒரு பரிணாம வளர்ச்சி. “திருமணம் என்பது வாழ்க்கையின் ஒரு அங்கம் தானே தவிர, அதுவே வாழ்க்கை இல்லை” என்பதை இன்றைய பெண்கள் உலகுக்கு உரக்கச் சொல்கிறார்கள். ஆண்களே… நீங்க கொஞ்சம் அப்டேட் ஆகலனா, 2030-ல மாப்பிள்ளை தேடுறது ரொம்ப கஷ்டம்!