கல்வராயன் கோடை விழாவில் அமைச்சர் திண்டுக்கல் சீனிவாசனின் பேச்சுக்கு எதிர்ப்பு தெரிவித்து திமுக எம்.பி கவுதமசிகாமணி, எம்.எல்.ஏ உதயசூரியன் ஆகியோர் விழாவை புறக்கணித்து பாதியில் வெளியேறினர்.
விழுப்புரம் மாவட்டம் கள்ளக்குறிச்சி அருகே கல்வராயன் மலையில் கோடை விழாவை வனத் துறை அமைச்சர் திண்டுக்கல் சீனிவாசன் நேற்று தொடங்கி வைத்தார். விழாவில் கள்ளக்குறிச்சி தொகுதி மக்களவை உறுப்பினர் கவுதமசிகாமணி, சட்டமன்ற உறுப்பினர் உதயசூரியன் ஆகியோரும் கலந்துகொண்டனர்.
நிகழ்ச்சியில் பேசிய சங்கராபுரம் தொகுதி திமுக எம்எல்ஏ உதயசூரியன், “கல்வராயன் மலைப் பகுதியில் பல்வேறு இடங்களில் பல ஆண்டுகளாக சாலைகள் போடப்படாமல் உள்ளன. சாலை அமைக்கும் பணி, கிணறு வெட்டும் பணிகள் வனத் துறையினர் தலையீட்டால் முடிக்க முடியாமல் உள்ளன. வனத் துறை சட்டம் தெரியாமல் பழங்குடியின மக்கள் தவறு செய்தால் அவர்களை தாக்குவதை விட்டுவிட்டு சட்டம் தொடர்பான பயிற்சியினை அளிக்க வேண்டும்” என்றவர், கடந்த கோடை விழாவில் சொன்னதைக்கூட நிறைவேற்றவில்லை என்று குற்றம் சாட்டினார்.
இதற்குப் பதிலளித்த சுற்றுலாத் துறை அமைச்சர் வெல்லமண்டி நடராஜன், “இந்தக் குறைகள் குறித்து சட்டமன்ற உறுப்பினர் உதயசூரியன் ஒருமுறை கூட என்னிடம் பேசியதில்லை. மக்களிடம் நல்ல பெயர் வாங்க விழாவில் மட்டும் பேசுவதில் அவர் வல்லவர்” என்றார்.
தொடர்ந்து வனத் துறை அமைச்சர் திண்டுக்கல் சீனிவாசன் பதிலளிக்கையில், “வனத் துறை அனுமதியோடு இங்கு சாலைப் பணிகள் நடைபெற்று வருகின்றன. கல்வராயன் மலையில் விதிகளை மீறுவோரிடம் அவ்வாறு செய்ய வேண்டாம் என்று நீங்கள் கூறினால் அங்கு வனத் துறை, காவல் துறையின் தலையீடு இருக்காது” என்று தெரிவித்தார்.
தொடர்ந்து திண்டுக்கல் சீனிவாசன் பேசிக்கொண்டிருக்கும்போது, அவரின் பேச்சால் கோபமடைந்த உதயசூரியன், “மக்கள் நீங்கள் செய்வது அனைத்தையும் பார்த்துக்கொண்டுதான் இருக்கிறார்கள். அவர்களுக்கு அனைத்தும் தெரியும்” என்று கூறி வாக்குவாதத்தில் ஈடுபட்டார். பின்னர், எம்.பி. பொன்.கௌதமசிகாமணியோடு விழாவை புறக்கணித்துவிட்டு வெளியேறினார். அப்போது அங்கிருந்த அதிமுகவினர் விசிலடித்து ஆராவாரம் செய்தனர்.
**
மேலும் படிக்க
**
**[ வேலுமணியா இப்படி? – எடப்பாடி ஆதங்கம்!](https://minnambalam.com/k/2019/07/14/27)**
**[அவசரப்பட்டுவிட்டேனோ? புலம்பிய தங்கம்](https://minnambalam.com/k/2019/07/13/18)**
**[டிஜிட்டல் திண்ணை: திமுக எம்.எல். ஏ.க்களுக்கு லைஃப் செட்டில்மென்ட்- கூல் எடப்பாடி](https://minnambalam.com/k/2019/07/13/72)**
**[அத்தி வரதர்: வரலாறு எழுப்பும் விடையற்ற வினாக்கள்!](https://minnambalam.com/k/2019/07/13/17)**
**[நிர்வாகிகள் விலகுவதை தடுக்க…சசிகலா போட்ட பட்ஜெட்!](https://minnambalam.com/k/2019/07/13/7)**
�,”