வாக்காளர்களின் நிலையையும், அவர்களின் பெருமையையும் பேசும் விதமாக உருவாகும் ‘திரு.வாக்காளர்’ படத்தின் பூஜை சென்னையில் நடைபெற்றது.
1986 லா பேச் மீடியா புரொடக்ஷன் (1986 law Batch Media Productions) நிறுவனம் தயாரிக்கும் திரைப்படம் திரு.வாக்காளர். மகேந்திரன், ஆர்.வி.உதயகுமார் ஆகியோரிடம் உதவி இயக்குநராகப் பணிபுரிந்த ரமேஷ் பிரபாகரன் இந்த படத்தை இயக்குகிறார். கன்னடத்தில் ‘கள்மஞ்சா’ என்ற படத்தை இயக்கியுள்ள நிலையில், இந்த படத்தின் மூலம் தமிழில் இயக்குநராக அறிமுகமாகிறார்.
இந்தப் படத்தில் முக்கிய கதாபாத்திரத்தில் நடிகர் அபி சரவணன் நடிப்பதுடன் மேலும் சில புதுமுகங்களும் நடிக்கவுள்ளனர்.
இப்படத்தின் பூஜை சென்னை ஆர்.கே.வி ஸ்டுடியோவில் சமீபத்தில் நடைபெற்றது. அதில் இயக்குநர்கள் ஆர்.வி. உதயகுமார், ராஜாரவி, வி.சி.குகநாதன், லியாகத் அலிகான், ஆர்.சுந்தர்ராஜன், மனோஜ்குமார், இ.ராம்தாஸ், நடிகர்கள் நட்டி நடராஜ், ஆரி, அபி சரவணன், வையாபுரி, ராம்ஜி, உள்ளிட்ட பலர் கலந்துகொண்டனர்.
இந்நிகழ்ச்சியில் கலந்துகொண்ட இயக்குநர் ரமேஷ் பிரபாகரன், “சட்டத்தாலும், சத்தத்தாலும் மட்டுமே வருவதல்ல மாற்றம். அது வாக்கு வாங்கும் அரசியல்வாதிகளுக்கும் பொருந்தும். வாக்களிக்கும் வாக்காளர்களுக்கும் பொருந்தும். ஒவ்வொரு வாக்காளரும் திரு. வாக்காளராக வேண்டும் என்பதற்கான முயற்சியே இப்படம்” என்று தெரிவித்தார்.�,
