பனீரில் கொழுப்புச்சத்து அதிகம், அதைச் சாப்பிட்டால் எடை கூடும் என்று அதை ஒதுக்குபவர்கள் பலர். கடைகளில் விற்கப்படும் பனீர் உணவு வகைகளைத் தவிர்க்கலாம். ஆனால், வீட்டில் தாராளமாகச் சமைத்துச் சாப்பிடலாம். பனீரில் கொழுப்புச்சத்து மட்டுமன்றி புரதம், கால்சியம், மக்னீசியம் எனப் பல்வேறு சத்துகள் உள்ளன. ரிலாக்ஸ் டைமுக்கேற்ற சிறந்த ஸ்நாக்ஸ் இது.
**எப்படி செய்வது?**
தேவையான அளவு கடலை மாவு, அரை டேபிள்ஸ்பூன் மிளகாய்த்தூள், ஒரு டேபிள்ஸ்பூன் மல்லித் (தனியா) தூள், ஒரு டேபிள் ஸ்பூன் மஞ்சள்தூள், ஒரு டேபிள்ஸ்பூன் தயிர் என அனைத்தையும் ஒன்றாகச் சேர்த்து மசாலா தயார் செய்துகொள்ளுங்கள். அதில், தேவையான அளவு உப்பு சேர்த்துக்கொள்ளுங்கள். இந்த மசாலாவில் 100 கிராம் பனீர், நறுக்கிய வெங்காயம் ஒன்று, தக்காளி ஒன்று, குடமிளகாய் ஒன்றைத் தனித்தனியாகப் புரட்டி எடுத்து தனித்தனிக் கிண்ணங்களில் வையுங்கள். புரட்டி எடுத்த பொருள்களை, அரை மணி நேரம் ஃப்ரிட்ஜில் வைத்தால் அவை நன்றாக ஊறிவிடும். அரை மணி நேரம் கழித்து பனீர், வெங்காயம், தக்காளி, குடமிளகாய் போன்றவற்றை பல் குத்தும் குச்சி (டூத் பிக்) ஒன்றில், ஒவ்வொன்றாக வரிசையாகக் குத்திக்கொள்ளுங்கள். டூத் பிக் இல்லையென்றால், நீளமான கம்பியைப் பயன்படுத்தலாம். தவாவில், ஒரு டீஸ்பூன் எண்ணெய்விட்டு அதன்மீது குச்சிகளைவைத்து நன்றாக கிரில் செய்ய வேண்டும். உணவு கருகிவிடும் என்பதால் மிகக் குறைவான தீயில்வைத்துச் செய்யவும். புதினா சட்னியுடன் பரிமாறவும்.
**சிறப்பு**
பனீரிலுள்ள மக்னீசியம் சத்து, நோய் எதிர்ப்பு சக்தியை அதிகரிக்கும். இதிலுள்ள பாஸ்பரஸ் செரிமானப் பிரச்சினைகள் ஏற்படாமல் தடுக்கும். வைட்டமின் பி நிறைந்தது என்பதால் பனீர், கர்ப்பிணிகளுக்கும் மிகவும் நல்லது.�,