bஒரே நாளில் விலை உயர்ந்த மல்லிகைப்பூ!

Published On:

| By Balaji

ஈரோடு மாவட்டம் சத்தியமங்கலம் மார்க்கெட்டில் மல்லிகைப்பூ ஒரே நாளில் கிலோ 630 ரூபாய் விலை உயர்ந்து ரூ.2,520-க்கு ஏலம் போனது.

சத்தியமங்கலம் கரட்டூர் ரோட்டில் பூ மார்க்கெட் உள்ளது. இங்கு நாள்தோறும் காலை 7 மணி முதல் மதியம் 2 மணி வரை பூக்கள் ஏலம் நடைபெறும். நேற்று நடந்த ஏலத்துக்கு சத்தியமங்கலம் மற்றும் சுற்றுவட்டார பகுதியில் உள்ள விவசாயிகள் இரண்டு டன் பூக்களை ஏலத்துக்குக் கொண்டு வந்திருந்தார்கள்.

இந்த ஏலத்தில் மல்லிகைப்பூ ஒரு கிலோ ரூ.2,520-க்கும், முல்லை ரூ.840-க்கும், காக்கடா ரூ.750-க்கும், செண்டுமல்லி ரூ.165-க்கும், பட்டுப்பூ ரூ.245-க்கும், ஜாதிமல்லி ரூ.650-க்கும், கனகாம்பரம் ரூ.1,250-க்கும், சம்பங்கி ரூ.50-க்கும், அரளி ரூ.360-க்கும், துளசி ரூ.40-க்கும், செவ்வந்தி ரூ.220-க்கும் ஏலம் போனது.

நேற்று முன்தினம் நடந்த ஏலத்தில் மல்லிகைப்பூ ஒரு கிலோ ரூ.1,890-க்கும், முல்லை ரூ.820-க்கும், காக்கடா ரூ.700-க்கும், செண்டுமல்லி ரூ.135-க்கும், பட்டுப்பூ ரூ.230-க்கும், ஜாதிமல்லி ரூ.600-க்கும், கனகாம்பரம் ரூ.800-க்கும், சம்பங்கி ரூ.50-க்கும், அரளி ரூ.360-க்கும், துளசி ரூ.40-க்கும், செவ்வந்தி ரூ.220-க்கும் ஏலம் போனது.

நேற்று முன்தினம் ஏலம் போன விலையை நேற்றைய விலையுடன் ஒப்பிட்டுப் பார்க்கும்போது மல்லிகைப்பூ ஒரு கிலோ 630 ரூபாய் விலை உயர்ந்தது. இதுவும் காலை 11 மணிக்குள் விற்று தீர்ந்துவிட்டது. இதேபோல் முல்லை 20 ரூபாயும், காக்கடா 50 ரூபாயும், செண்டுமல்லி 30 ரூபாயும், பட்டுப்பூ 15 ரூபாயும் விலை அதிகரித்தது.

இந்த நிலையில் நாகர்கோவிலை அடுத்த தோவாளையில் பூ மார்க்கெட்டில் நேற்று மல்லிகைப்பூ ஒரு கிலோ ரூ.3,500-க்கு விற்கப்பட்டது. இங்கு குமரி மாவட்ட வியாபாரிகள் மட்டுமல்லாமல் கேரளாவில் இருந்தும் வியாபாரிகள் வந்து பூக்களை வாங்கி செல்வார்கள் என்பதால் விலை சற்று அதிகமாகவே இருக்கும் என்கிறார்கள்.

மதுரையில் ஏற்கனவே அதிக விலைக்கு விற்கப்படும் மல்லி, நேற்று ஒரு கிலோ ரூ.4,000-க்கு விற்கப்பட்டது.

இதுகுறித்து பேசியுள்ள சங்க நிர்வாகிகள், “பனிப்பொழிவு காரணமாக பூக்கள் விளைச்சல் குறைந்து விட்டது. அதே நேரத்தில் சபரிமலை சீசன், முகூர்த்த நாள் என்பதால் தேவையும் அதிகரித்தது. அதனால் பூக்கள் விலை கூடியுள்ளது” என்று தெரிவித்துள்ளனர்.

**-ராஜ்**

.�,

செய்திகளை உடனுக்குடன் பெற மின்னம்பலம் வாட்ஸ் ஆப் சேனலில் இணையுங்கள்!
Join Our Channel