கோவாவில் நடந்த உண்மைச் சம்பவத்தை மையப்படுத்தி ஹாரர் திரில்லர் படமாக மம்மி திரைப்படம் உருவாகி வருகிறது.
ஜேஎஸ்கே பிலிம் கார்பரேஷன் தயாரிப்பில் அறிமுக இயக்குநர் லோஹித் இயக்கியுள்ள படம் மம்மி. இந்தப் படத்தில் கதையின் நாயகியாக பிரியங்கா த்ரிவேதி நடித்துள்ளார். இவர் நீண்ட இடைவெளிக்குப் பிறகு இப்படத்தின் மூலம் தமிழில் ரீ என்ட்ரி ஆகிறார். இவரது மகளாக பேபி யுவினா நடித்துள்ளார். இவர்களுடன் கிறிஸ்துவ பாதிரியாராக முக்கிய கதாபாத்திரத்தில் ‘கோலிசோடா’ மதுசூதனன் நடித்துள்ளார்.
கோவாவில் வசிக்கும் ஒன்பது மாத கர்ப்பிணி தாயும், அவரது ஆறுவயது மகளும் எதிர்கொள்ளும் அமானுஷ்ய நிகழ்வுகள் தான் இந்தப் படத்தின் கதை. எமோஷனல் ஹாரர் படமாக உருவாகி வரும் இந்தப் படத்துக்கு அஜனீஸ் லோகநாத் இசையமைக்க எச்.சி.வேணு ஒளிப்பதிவு செய்துள்ளார்.
இப்படம் குறித்து இயக்குநர் லோஹித், **மிகக் குறைந்த கதாபாத்திரங்களை கொண்டு பாட்டு, சண்டை, காமெடி என்று எதுவும் இல்லாமல் இரண்டு மணி நேர மிரட்டலான ஹாரர் படமாக இது தயாராகியுள்ளது** என்று கூறியுள்ளார்.
மேலும் அவர், “இந்தக் கதையை தயாரிப்பாளர் ஜே.எஸ்.கே-விடம் சொன்னபோது அவருக்கு ரொம்பவே பிடித்து விட்டது. அவரே படத்தைத் தயாரிக்க ஒப்புக்கொண்டார். இதற்காக கோவாவில் 3௦ லட்ச ரூபாய் செலவில் பிரமாண்ட செட் போட்டு படமாக்கப்பட்டுள்ளது. படப்பிடிப்பை ஒரே கட்டமாக நடத்தி முடித்துள்ளோம்” என்று தெரிவித்துள்ளார்.�,”
