மின்னம்பலம் மின்னம்பலம்

திங்கள் 17 மே 2021

கிச்சன் கீர்த்தனா: மட்டன் தொக்கு

கிச்சன் கீர்த்தனா: மட்டன் தொக்கு

உடலில் செல்கள் உருவாக புரதம் தேவை. அந்த செல்கள் அழியும்போது அவற்றுக்குப் பதிலாக புதிய செல்கள் உண்டாக்க வேண்டும். இந்த செல்கள் நல்ல ஆரோக்கியமாக அமையவும் நோய் எதிர்ப்பு சக்தியை உருவாக்கவும் மிகவும் அவசியமானது புரதம். பால், முட்டை, பயறு வகைகள், இறைச்சி, மீன் போன்ற உணவுகளில் புரதம் நிறைந்துள்ளன. தற்போதைய லாக்டெளன் சூழலில் இந்த மட்டன் தொக்கு, சுவையான சைடிஷ்ஷாக அமைவதுடன் புதிய செல்களின் உற்பத்திக்கும் உதவும்.

என்ன தேவை?

மட்டன் - 250 கிராம்

பெரிய வெங்காயம் - 2

தக்காளி - 3

பச்சை மிளகாய் - 3

எலுமிச்சைப் பழம் - ஒன்று

(சாறு பிழியவும்)

மிளகாய்த்தூள் - ஒரு டீஸ்பூன்

மஞ்சள்தூள் - ஒரு சிட்டிகை

மல்லித்தூள் - ஒரு டீஸ்பூன்

மிளகுத்தூள் - 2 டீஸ்பூன்

இஞ்சி - பூண்டு விழுது - ஒரு டீஸ்பூன்

பட்டை - 2

கிராம்பு - ஒன்று

சோம்பு - அரை டீஸ்பூன்

பிரிஞ்சி இலை - ஒன்று

கறிவேப்பிலை - சிறிதளவு

நறுக்கிய கொத்தமல்லித்தழை,

பெரிய வெங்காயம் - அலங்கரிக்கத்

தேவையான அளவு

எண்ணெய் - சிறிதளவு

உப்பு - தேவையான அளவு

எப்படிச் செய்வது?

மட்டனை நன்கு கழுவி சுத்தம் செய்து கொள்ளவும். பெரிய வெங்காயம், தக்காளி, பச்சை மிளகாயைப் பொடியாக நறுக்கிக்கொள்ளவும். அடுப்பில் குக்கரை வைத்து எண்ணெய் சேர்த்துச் சூடானதும் நறுக்கிய பெரிய வெங்காயம், தக்காளி, பச்சை மிளகாய், கறிவேப்பிலை, மிளகாய்த்தூள், மஞ்சள்தூள், மல்லித்தூள், இஞ்சி - பூண்டு விழுது, தேவையான அளவு உப்பு, மட்டன் சேர்த்து நன்கு வதக்கவும். இதனுடன் ஒரு டம்ளர் தண்ணீர் சேர்த்து நன்றாகக் கலக்கிவிட்டு மூடிபோட்டு வேகவிடவும். மூன்று விசில் வந்ததும் அடுப்பை `சிம்’மில் வைத்து இரண்டு நிமிடங்கள் வேகவிட்டு அடுப்பை அணைக்கவும். ஆவி அடங்கியதும், குக்கரைத் திறந்து மட்டன் கலவையைத் தனியே எடுத்து வைக்கவும்.

மற்றொரு வாணலியில் சிறிதளவு எண்ணெய் சேர்த்துச் சூடானதும் அதில் பட்டை, கிராம்பு, சோம்பு, பிரிஞ்சி இலை சேர்த்து நன்கு வதக்கவும். அதனுடன் தயார் செய்து வைத்திருக்கும் மட்டன் கலவையைச் சேர்த்து நன்கு கலக்கவும். கலவை கொதிவரத் தொடங்கும் முன்பு மிளகுத்தூள், தேவையான அளவு உப்பு சேர்த்து நன்கு கலக்கிவிடவும்.

கலவை சுண்டுவதற்குச் சிறிது நேரத்துக்கு முன்பாக எலுமிச்சைச் சாற்றைச் சேர்த்துக் கிளறிவிட்டு வேகவிடவும். கலவையில் தண்ணீர் வற்றி கிரேவியானதும், அடுப்பை அணைத்துக் கொத்தமல்லித்தழை மற்றும் நறுக்கிய வெங்காயத்தைத் தூவி சூடாகப் பரிமாறவும்.

நேற்றைய ரெசிப்பி: உங்கள் சமையலறை பாதுகாப்பானதுதானா?

வேலைவாய்ப்பு : டிஎன்பிஎஸ்சி அறிவிப்பு!

1 நிமிட வாசிப்பு

வேலைவாய்ப்பு : டிஎன்பிஎஸ்சி அறிவிப்பு!

திருப்பதி: நவம்பர் மாதத்துக்கான ஆன்லைன் புக்கிங் இன்று ஆரம்பம்! ...

2 நிமிட வாசிப்பு

திருப்பதி: நவம்பர் மாதத்துக்கான ஆன்லைன் புக்கிங் இன்று ஆரம்பம்!

இலங்கை கடன் வாங்கும் நிலைக்குத் தள்ளப்பட்டது ஏன்?

5 நிமிட வாசிப்பு

இலங்கை  கடன் வாங்கும் நிலைக்குத் தள்ளப்பட்டது ஏன்?

திங்கள் 17 மே 2021