மின்னம்பலம் மின்னம்பலம்

வெள்ளி 9 பிப் 2018

வாட்ஸப் வடிவேலு: மனைவியின் கை!

வாட்ஸப் வடிவேலு: மனைவியின் கை!

திருமணமாகி 35 வருடங்களான அவருக்கு 61 வயது. கடந்த மாதம் ஓய்வுபெற்று வீட்டில் மனைவியோடு சாகவாசமாக இருக்கிறார்.

வேலை நாள்களில் காலை மற்றும் இரவு தான் மனைவியைப் பார்ப்பதே. ஒரு சில வார்த்தைகள் பேசுவதோடு சரி. ஞாயிறில்கூட அங்க இங்க எனச் சென்றுவிடுவது. கடுமையாக உழைத்து குடும்பத்தைப் பார்த்தார்.

இப்போதுதான் ஆற அமர பொறுமையாக உட்கார்ந்து மனைவியுடன் பேச முடிகிறது. வீட்டில் எது எங்கே இருக்கு என அறியமுடிகிறது.

வீட்டு வராந்தாவில் உட்காந்திருந்தவர் மனைவியைக் கூப்பிட்டார். மனைவி இவரை விட எட்டு வயது இளமையானவள். அதனால் 52 வயதிலும் சுறுசுறுப்பாக இருந்தாள்.

வந்து பக்கத்தில் நின்றவள், ‘கூப்பிட்டீங்களா?’ எனக் கேட்டாள்.

‘ஆமா... ஆமா... வா உட்காரு. உன்கூட மனசுவிட்டு பேசி எவ்வளவு காலமாச்சு?’

அவளும் உட்கார அவள் கையை பற்றி ஏதோ பேச வந்தவர்... அவள் கை சொரசொரப்பாக இருக்க அவளின் உள்ளங்கையைத் திருப்பிப் பார்த்தார். முகம் சுருங்கியது. கண்கள் கலங்கியது.

‘அம்மு என்னது. கை பூரா வெட்டுக்காயமா இருக்கே. நகம்கூட வெடிச்சிருக்கே. ஒரே தழும்பா இருக்கு என்னது. நீ என்னய திருமணம் செய்துவரும்போது பட்டு மாதிரி இருந்தாயே. உன் கை பளபளப்பா வழுவழுப்பா இருந்ததே’ என நிமிர்ந்தார்.

அவள் மெல்லிய சிரிப்புடன், ‘நா எதை என்னவென்று சொல்ல... 35 வருசத்தில சமையல்ல எண்ணெய் தெறிச்சதா இருக்கலாம்... காய்கறி நறுக்கும்போது அருவாள் கத்தி கீறியிருக்கலாம்... அடுப்பில் இருந்து பாத்திரம் இறக்கும்போது சூடு பட்டிருக்கலாம்... இப்படி ஏதேதோ நடந்திருக்கும்’ என்றாள். மெல்லிய கோடாக அவளின் கண்களின் ஓரத்தில் நீர் வடிந்தது...

‘என்னம்மு சொல்றாய்? அது என்ன கையில் மேல அவ்ள பெரிய தீக்காயம் மாதிரி’ என்று அதிர்ந்தார்.

‘நீங்க என்னய வண்டில உள்ள கவர எடுத்துவா என நாலு வருசத்திற்கு முன்னாடி ஒரு நாள் கூறினீங்க... நானும் எடுத்துவர போனேன். கவர் கீழ விழ, நான் எடுக்கும்போது உங்க வண்டி சைலன்சர் சுட்டுடுச்சு. அப்பதானே வந்தீங்க... அதான் சூடா இருந்தது’ என்றாள்...

‘இது என்ன குழந்தையாட்டம் நீ என்கிட்ட சொல்லவே இல்லயே.. அம்மு...’

‘நா சொல்லலதாங்க... எந்த காயத்தையும் நா சொல்லலங்க... அப்ப நா சொன்னா கூட நீங்க என்னய தானே திட்டுவீங்க பொறுப்பில்லையா... பார்த்து நடக்க மாட்டியான்னு’ என்றாள்

‘என் கண்களில்கூட படலயே அம்மு இதெல்லாம்...’ என்றார் வலி நிறைந்த குரலில்.

‘என்னை நீங்க அருகில சந்திக்கிறதே இரவு இருட்டில தானே அதுகூட சில நிமிடம்தான். அப்ப எப்படிங்க என் உடல் காயங்கள் உங்களுக்குத் தெரியும்?’ என்றாள்...

‘அம்மு... அப்படி நினைக்காதே.. நமக்காக தானே நா இப்படி ஓடாய் உழைத்தேன் பசங்கள படிக்க வச்சு வெளிநாட்டுக்கு அனுப்பினேன்.. உன்னயும் ஒரு குறையும் இல்லாம பார்த்தேன்...’ என்றார்.

‘உடல் காயங்களே உங்கக் கண்ணுக்கு இப்பதான் தெரியுது. என் மனக்காயங்கள் உங்களுக்கு எப்பவுமே தெரியாதுங்க...’

‘என்னய மன்னிச்சிடு அம்மு... பணம் சேர்க்கும் பரபரப்பில் இயந்திரமாக இருந்துவிட்டேன்...’ என்று அவளின் கையை மெதுவாக அழுத்தினார்...

‘எனக்கொரு ஆசைங்க... அத இப்பவாவது கேக்கமுடியுமா?’ என்றாள் குரல் சுருதி குறைவாக...

‘கேளு அம்மு...’ என்றார்

‘நாம திருமணமான புதிதில சில நாட்கள் நா உங்க மடியிலயும் நீங்க என் மடியிலயும் தலை வைத்து படுத்திருக்கோம்... அப்புறம் 35 வருசமா தலையனிலதான் நாம தலை வைத்து படுத்திருக்கம்... இப்ப உங்க மடியில கொஞ்சம் தலை வைத்து படுத்துக்கவா...’ என அம்மு கேக்க அவருக்கும் அம்முக்கும் கண்கள் கலங்கியே விட்டது... அவளை அணைத்து தன் மடியில் படுக்க வைத்தவர் குழந்தையைப்போல் அவளைப் பார்த்தார்.

மனசு நிறைய பாசம் அன்பு இருந்தாலும் அதை ஆண்களுக்கு வெளிப்படுத்த தெரிவதில்லை அதற்கான நேரம் வரும்வரை....

இதே போல்தான் பெரும்பாலும் எல்லா பெண்களின் வாழ்வும்.. திருமணமாகும்போது இருந்த மென்மையை அவர்களின் கை மட்டுமல்ல உடலும் மனமும்கூட இழந்து மரத்துப்போகிறது...

எத்தனை கணவன்மார் மனைவிக்கென நேரம் ஒதுக்கி அவளின் மனக்குறைகளைக் கேட்கிறார்கள்.. மனம்விட்டு பேசுகிறார்கள்...

ஆண்களே உங்கள் மனைவியின் கையை பிடித்து பாருங்கள் எத்தனை கீறல்கள் காயங்கள் இருக்கும் என... இவை ஏன் வந்தது என கேளுங்கள்...

அவளின் மனக்காயம் வெளிவரும்....

இப்படி ஒரு மெசேஜ் வந்தது. ஆமாம் நண்பர்களே... மனைவியின் கையை பிடித்து சிறிது நேரம் மனம்விட்டு பேசுங்கள். அந்த நிகழ்வின்போது, அது அவரவர் மனைவியாக இருத்தல் நலம்.

வேலைவாய்ப்பு: டிஎன்பிஎஸ்சி அறிவிப்பு!

1 நிமிட வாசிப்பு

வேலைவாய்ப்பு: டிஎன்பிஎஸ்சி அறிவிப்பு!

ஈரோடு: பறிமுதல் செய்யப்பட்ட வாகனங்கள் 28ஆம் தேதி ஏலம்!

2 நிமிட வாசிப்பு

ஈரோடு: பறிமுதல் செய்யப்பட்ட வாகனங்கள் 28ஆம் தேதி ஏலம்!

இலங்கை மக்கள் நிவாரணத்துக்காக டீக்கடையில் மொய் விருந்து!

2 நிமிட வாசிப்பு

இலங்கை மக்கள் நிவாரணத்துக்காக டீக்கடையில் மொய் விருந்து!

வெள்ளி 9 பிப் 2018