கிச்சன் கீர்த்தனா: அவல் கட்லெட்!

அனைவருக்கும் இனிய குடியரசு தின நல்வாழ்த்துகள்!

இன்றைய ஸ்பெஷலாக, அவல் கட்லெட் செய்வது எப்படி என்று பார்க்கலாம்.

தேவையானவை:

அவல் – ஒரு கப்

உருளைக்கிழங்கு – 2

பச்சை பட்டாணி – 2 டேபிள்ஸ்பூன்

சோள மாவு – 2 டேபிள்ஸ்பூன்

பச்சை மிளகாய் – 2

இஞ்சி – பூண்டு விழுது – 2 டீஸ்பூன்

உப்பு, எண்ணெய் – தேவையான அளவு.

செய்வது எப்படி?

உருளைக்கிழங்கை வேகவைத்து தோலுரித்து மசித்துக் கொள்ளவும். பச்சை மிளகாயை நறுக்கி வைக்கவும். 2 கைப்பிடி அவலைத் தனியாக எடுத்து, கரகரப்பாக மிக்ஸியில் அரைக்கவும். மீதமுள்ள அவலை கழுவி சுத்தம் செய்து 20 நிமிடங்கள் ஊற விடவும். இதனுடன் மசித்த உருளைக்கிழங்கு, பச்சை மிளகாய், பச்சை பட்டாணி, இஞ்சி – பூண்டு விழுது, உப்பு சேர்த்துப் பிசைந்து விரும்பிய வடிவில் கட்லெட்களாக செய்யவும்.

சோள மாவைக் கரைத்து, கட்லெட்டுகளை மாவில் தோய்த்து எடுத்து, அவல் பொடியில் புரட்டி தோசைக்கல்லில் போட்டுப் பொன்னிறமாக வெந்ததும் எடுக்கவும்.

கீர்த்தனா சிந்தனைகள்:

ஒருபக்கம், தமிழ்த்தாய் வாழ்த்துக்கு ஏன் மரியாதை கொடுக்கலேன்னு கேட்டா, தியானத்துல இருந்தாருங்கிறாங்க. இன்னொரு பக்கம், விசாரணைக்கு ஏன் வரலைன்னு கேட்டா, மௌனவிரதம்னு சொல்றாங்க.