மின்னம்பலம் மின்னம்பலம்

திங்கள் 19 ஜூலை 2021

வேலுமணி மீதான டெண்டர் புகார் : தமிழ்நாடு அரசின் பதில்!

வேலுமணி மீதான டெண்டர் புகார் : தமிழ்நாடு அரசின் பதில்!

அதிமுக முன்னாள் அமைச்சர் எஸ்.பி.வேலுமணி மீதான டெண்டர் முறைகேடு புகார் குறித்து விசாரணை நடத்தப்படும் என சென்னை உயர் நீதிமன்றத்தில் தமிழ்நாடு அரசு பதிலளித்துள்ளது.

கடந்த அதிமுக ஆட்சியில் உள்துறை அமைச்சராக இருந்தஎஸ்.பி.வேலுமணிக்கு எதிராக திமுக சார்பில் ஆர்.எஸ்.பாரதி மற்றும் அறப்போர் இயக்கம் சார்பில் ஜெயராம் வெங்கடேசன் ஆகியோர் சென்னை உயர் நீதிமன்றத்தில் வழக்கு தொடர்ந்தனர். அதில், மாநகராட்சி டெண்டர் நடைமுறைகளில் முறைகேடு நடந்துள்ளது. அமைச்சர் வேலுமணிக்கு நெருக்கமானவர்களுக்கு டெண்டர் அளிக்கப்பட்டது. அதனால், இதுகுறித்து நீதிமன்ற மேற்பார்வையில் சிறப்பு புலனாய்வு குழு அமைத்து விசாரிக்க உத்தரவிட வேண்டும் என்று கூறியிருந்தனர்.

இந்த வழக்கின் கடந்தமுறை விசாரணையின் எஸ்.பி வேலுமணிக்கு எதிரான புகாரில் முகாந்திரம் உள்ளதா என்பது குறித்து ஆரம்பகட்ட விசாரணை முடிவடைந்தது. அதில் வேலுமணி மீது வழக்கு பதிவு செய்ய எந்த முகாந்திரமும் இல்லை என அப்போதைய அரசின் சார்பில் தெரிவிக்கப்பட்டது.

இதற்கு எதிர்ப்பு தெரிவித்த மனுதாரர்கள், இந்த வழக்கில் நிறைய ஆதாரங்கள் மற்றும் ஆவணங்களை தாக்கல் செய்ய வேண்டியிருப்பதால் நேரடி விசாரணை மேற்கொள்ள வேண்டும். தற்போது ஆட்சி மாறி உள்ளதால் சூழலும் மாறிவிட்டது. எனவே வழக்கு விசாரணை ஒத்தி வைக்க வேண்டும் என்று கேட்டுக்கொண்டனர்.

இந்த வாதங்களை கேட்ட நீதிபதி, விசாரணை அறிக்கையை அரசு ஏற்றுக் கொண்டாலும், நீதிமன்றம் ஏற்றுக் கொள்ளவில்லை என்று கூறி வழக்கை தள்ளி வைத்தனர்.

இந்நிலையில், மீண்டும் இவ்வழக்கு இன்று(ஜூலை 19) நீதிபதி சஞ்ஜீப் பானர்ஜி, நீதிபதி செந்தில்குமார் ராமமூர்த்தி அமர்வு முன்பு விசாரணைக்கு வந்தது.

அப்போது, தமிழ்நாடு அரசு சார்பில் ஆஜரான தலைமை வழக்கறிஞர் சண்முகசுந்தரம், டெண்டர்கள் ஒதுக்கியதில் முறைகேடுகள் நடந்துள்ளதாக கணக்குத் தணிக்கை துறை அறிக்கை அளித்துள்ளது. அதன் அடிப்படையில் விசாரணை நடத்தப்பட்டு,அதன்பின் தேவைப்பட்டால் வழக்குப்பதிவு செய்யப்படும். அதனால் 8 வார கால அவகாசம் வழங்க வேண்டும் என்று தெரிவித்தார்.

கணக்கு தணிக்கை குழு அறிக்கை குறித்து விளக்கமளிக்க அவகாசம் வேண்டும் என்று வேலுமணி தரப்பில் ஆஜரான வழக்கறிஞரும் கோரிக்கை வைத்தார்.

இதுகுறித்து முழுமையாக விசாரணை நடத்தி, முறைகேட்டில் ஈடுபட்டவர்களுக்கு எதிராக நடவடிக்கை எடுக்க வேண்டும் என அறிவுறுத்திய நீதிபதிகள், வழக்கு விசாரணையை ஆகஸ்ட் இரண்டாவது வாரத்துக்கு ஒத்திவைத்தனர்.

-வினிதா

ஒரே நிறுவனத்துக்கு 100 டன் ஸ்வீட்: டெண்டர் விதிமுறைகளைத் திருத்திய ...

6 நிமிட வாசிப்பு

ஒரே நிறுவனத்துக்கு 100 டன் ஸ்வீட்: டெண்டர் விதிமுறைகளைத் திருத்திய அமைச்சர்!

அண்ணாமலையின் ஆதாரத்துக்கு தொடர் பதிலடி கொடுத்த அமைச்சர்!

8 நிமிட வாசிப்பு

அண்ணாமலையின் ஆதாரத்துக்கு தொடர் பதிலடி கொடுத்த அமைச்சர்!

விஜயபாஸ்கர் பினாமிகளின் வங்கி லாக்கர்களுக்கு சீல்?

5 நிமிட வாசிப்பு

விஜயபாஸ்கர் பினாமிகளின் வங்கி லாக்கர்களுக்கு சீல்?

திங்கள் 19 ஜூலை 2021