மின்னம்பலம் மின்னம்பலம்

சனி 26 ஜுன் 2021

ராஜேந்திர பாலாஜி மீதான சொத்து குவிப்பு வழக்கு: 3ஆவது நீதிபதி நியமனம்!

ராஜேந்திர பாலாஜி மீதான சொத்து குவிப்பு வழக்கு: 3ஆவது நீதிபதி நியமனம்!

முன்னாள் அமைச்சர் ராஜேந்திர பாலாஜி மீதான சொத்துக் குவிப்பு வழக்கில் மூன்றாவது நீதிபதி நியமிக்கப்பட்டுள்ளார்.

அதிமுக ஆட்சியில் பால் வளத் துறை அமைச்சராக இருந்தவர் ராஜேந்திர பாலாஜி . இவர் 2011- 2013ஆம் ஆண்டு வரையிலான கால கட்டத்தில் தனது பதவியைத் தவறாகப் பயன்படுத்தி வருமானத்திற்கு அதிகமாகச் சொத்து சேர்த்ததாக மதுரை மாவட்டம் தல்லாகுளத்தை சேர்ந்த மகேந்திரன் என்பவர் 2014 ஆம் ஆண்டு உயர் நீதிமன்ற மதுரை கிளையில் வழக்கு தொடர்ந்திருந்தார்.

அதில், ”முன்னாள் அமைச்சர் ராஜேந்திர பாலாஜி ராஜபாளையம் அருகே 74 லட்சம் ரூபாய் மதிப்பில் 35 ஏக்கர் நிலம் வாங்கி உள்ளதாகவும், இந்த நிலத்தின் உண்மையான மதிப்பு 66 கோடி ரூபாய் எனவும், அதுபோன்று திருத்தங்கல் பகுதியில் ரூ.23.33 லட்சத்துக்கு இரண்டு வீட்டு மனைகளும், ரூ. 4.23 லட்சத்திற்கு 75 சென்ட் நிலமும் வாங்கியுள்ளார். இந்த சொத்தின் சந்தை மதிப்பு ரூபாய் ஒரு கோடிக்கும் அதிகமாகும் என்றும் தெரிவித்திருந்தார்.

வருமானத்திற்கு அதிகமாக ராஜேந்திர பாலாஜி 7 கோடி ரூபாய்க்கும் அதிகமாகச் சொத்து சேர்த்துள்ளார். இது தொடர்பாக லஞ்ச ஒழிப்புத் துறையில் புகார் அளித்தும் நடவடிக்கை எடுக்கவில்லை” என்று கூறியிருந்தார்.

இந்த வழக்கில் லஞ்ச ஒழிப்புத் துறை சார்பில் தாக்கல் செய்யப்பட்ட அறிக்கையில், ராஜேந்திர பாலாஜி 2011 மே 23 முதல் 2013 ஏப்ரல் 20 வரையிலான காலத்தில் அமைச்சர் பதவியைத் தவறாகப் பயன்படுத்தி வருமானத்துக்கு அதிகமாகச் சொத்து சேர்த்ததாக அளிக்கப்பட்ட புகார் மீது விசாரணை நடத்தப்பட்டது. இந்த புகாரில் எந்த முகாந்திரமும் இல்லை. லஞ்ச ஒழிப்பு சட்டத்தின் கீழ் அவர் மீது நடவடிக்கை தேவை இல்லை என்றும் அதனால் விசாரணை தொடர வேண்டியதில்லை என்றும் கூறி வழக்கை முடிக்கவும் பொதுத்துறை உத்தரவிட்டதாகக் கூறப்பட்டிருந்தது.

இதை விசாரித்த நீதிமன்றம், ராஜேந்திர பாலாஜி அமைச்சரான பிறகு சேர்த்த சொத்து குறித்து மட்டும் விசாரிக்கக் கூடாது, 1996ஆம் ஆண்டு திருத்தங்கல் பேரூராட்சி துணைத் தலைவராக இருந்தது முதல் 2018 ஆம் ஆண்டு பிப்ரவரி மாதம் வரை அவருடைய வருமானம் மற்றும் சொத்துக்கள் தொடர்பாக விசாரணை நடத்த வேண்டும் என்று உத்தரவிட்டது.

இதையடுத்து அரசுத் தரப்பில், இந்த புகார் மீதான ஆரம்பக்கட்ட விசாரணையில் போதிய முகாந்திரம் இல்லை, அரசு அனுமதிக்கப்பட்ட அளவுக்குள்ளாகவே அவரது வருமானம் உள்ளது என்று தெரிவிக்கப்பட்டது.

இவ்வழக்கில் கடந்த மார்ச் 4ஆம் தேதி தீர்ப்பளித்த நீதிபதிகள் எம் சத்யநாராயணன் மற்றும் ஹேமலதா அமர்வு தீர்ப்பு வழங்கியது.

இதில், நீதிபதி சத்யநாராயணன், ராஜேந்திர பாலாஜி மீது லஞ்ச ஒழிப்புத் துறை வழக்குப் பதிவு செய்து விசாரிக்க வேண்டும் என்று உத்தரவிட்டார்.

நீதிபதி ஹேமலதா, நீண்ட இடைவெளிக்குப் பிறகு வழக்கைப் பதிந்து விசாரிப்பது, செத்த குதிரையின் மீது சவுக்கடி கொடுப்பது போலாகும். மேற்கொண்டு விசாரித்தால் எந்தவிதப் பலனும் இருக்காது என்று கூறி ராஜேந்திர பாலாஜிக்கு எதிரான வழக்கைத் தள்ளுபடி செய்வதாக தீர்ப்பு வழங்கினார்.

இரு நீதிபதிகளும் மாறுபட்ட தீர்ப்பு வழங்கியதால் இவ்வழக்கை மூன்றாவது நீதிபதி விசாரிக்கப் பரிந்துரை செய்யப்பட்டது.

அதன்படி இந்த வழக்கை விசாரிக்கும் நீதிபதியாக எம்.நிர்மல்குமார் இன்று நியமிக்கப்பட்டார் . அவர் முன்பு இந்த வழக்கு விசாரணைக்கு வந்த போது, வழக்கு தொடர்பான ஆவணங்களை அனைத்து தரப்பினரும் தாக்கல் செய்ய உத்தரவிட்டு வழக்கு விசாரணையை ஜூலை 22ஆம் தேதிக்கு ஒத்திவைத்தார்

-பிரியா

அதிமுகவில் சசிகலா: பாஜகவின் பொன் விழா மெசேஜ்!

4 நிமிட வாசிப்பு

அதிமுகவில் சசிகலா: பாஜகவின் பொன் விழா மெசேஜ்!

தொடர் சிகிச்சையில் திமுக அமைச்சர்!

3 நிமிட வாசிப்பு

தொடர் சிகிச்சையில் திமுக அமைச்சர்!

போலீசாரின் மாமூல் லிஸ்ட்!

8 நிமிட வாசிப்பு

போலீசாரின் மாமூல் லிஸ்ட்!

சனி 26 ஜுன் 2021