மின்னம்பலம் மின்னம்பலம்

ஞாயிறு 20 ஜுன் 2021

மே 7லிருந்து அமைச்சர் என்ன செய்து கொண்டிருந்தார்?: முன்னாள் அமைச்சர் கேள்வி!

மே 7லிருந்து அமைச்சர் என்ன செய்து கொண்டிருந்தார்?: முன்னாள் அமைச்சர் கேள்வி!

‘தமிழ்நாட்டில் 4000 மெகா வாட் வரை காற்றாலை மின்சாரம் கிடைக்கும்போது மின்தடை ஏற்பட காரணம் என்ன?’ என முன்னாள் அமைச்சர் தங்கமணி, தற்போதைய மின்சாரத்துறை அமைச்சர் செந்தில் பாலாஜியிடம் கேள்வி எழுப்பியுள்ளார்.

தமிழ்நாட்டில் திமுக ஆட்சிக்கு வந்ததிலிருந்து அடிக்கடி மின் தடை ஏற்படுகிறது. தமிழகம் மீண்டும் இருளில் மூழ்கத் தொடங்கியுள்ளது; மின்வெட்டு பிரச்சினை தலைவிரித்தாடுகிறது என்று அதிமுக கடும் விமர்சனங்களை முன்வைத்து வருகிறது.

கடந்த அதிமுக ஆட்சியில் ஒன்பது மாதங்களாக மின் பராமரிப்பு முறையாகச் செய்யப்படவில்லை. அதனால்தான் அடிக்கடி மின்தடை ஏற்படுகிறது. போர்க்கால அடிப்படையில் 10 நாட்களுக்குள் மின்தடை பிரச்சினை சரி செய்யப்படும் என மின்சாரத்துறை அமைச்சர் செந்தில் பாலாஜி கடந்த 17ஆம் தேதி செய்தியாளர்கள் சந்திப்பில் தெரிவித்திருந்தார்.

இதற்குப் பதிலளிக்கும் விதமாக முன்னாள் மின்சாரத்துறை அமைச்சர் தங்கமணி நாமக்கல்லில் செய்தியாளர்களைச் சந்தித்தார். அப்போது, “கடந்த ஆட்சியில் ஒன்பது மாதங்களாகப் பராமரிப்பு பணி செய்யவில்லை என்றும், அதனால்தான் மின் தடை ஏற்படுகிறது என்றும் மின்சாரத்துறை அமைச்சர் தெரிவித்திருந்தார். அதற்கு விளக்கம் கொடுக்க வேண்டிய அவசியம் உள்ளது.

தமிழகத்தில் கடந்த 10 ஆண்டுகளாக அதிமுக ஆட்சி நடைபெற்றது. அதில், முன்னாள் முதல்வர் ஜெயலலிதா அறிவித்தபடி தமிழகத்தை மின்மிகை மாநிலமாக மாற்றினோம். இது மத்திய அரசின் அறிவிப்பிலும் இடம்பெற்றிருந்தது. தமிழகம் முழுவதும் ஒரு நிமிடம்கூட மின்தடை ஏற்படாத வகையில் பராமரிப்புப் பணிகளை மேற்கொண்டோம்.

வர்தா, தானே, ஓகி, கஜா போன்ற புயல்கள் தமிழகத்தைத் தாக்கியபோதும் முதல்வர் எடப்பாடி பழனிசாமி தலைமையிலான அரசு, மீட்புப் பணிகளை மேற்கொண்டு பொதுமக்களுக்கு விரைவாக மின் விநியோகத்தைச் சீரமைத்துக் கொடுத்தது.

கஜா புயலின்போது 3 லட்சத்து 31,000 மின்கம்பங்கள் மற்றும் ஆயிரக்கணக்கான டிரான்ஸ்பார்மர்கள் சேதமடைந்தது. இதனால், எட்டு மாவட்டங்களில் மின்சார விநியோகம் பாதிக்கப்பட்டது. ஒரு மாதக் காலத்திற்குள் போர்க்கால அடிப்படையில் நடவடிக்கை எடுக்கப்பட்டு உடனடியாக, மின் விநியோகம் செய்யப்பட்டது. இது அம்மா மற்றும் எடப்பாடி ஆட்சியின் வரலாற்றுச் சாதனையாகும்.

தமிழ்நாட்டில் பராமரிப்புப் பணி செய்யப்படாமலிருந்தால், மே 2ஆம் தேதிவரை எப்படி மின் தடை இல்லாமல் இருந்திருக்கும். அப்போது தமிழகத்தின் உச்சபட்ச மின்சாரத் தேவை 17,121 மெகா வாட்டாக இருந்தது. அப்போது காற்றாலை மின்சாரம் கூட கிடையாது.

மத்திய அரசின் தொகுப்பு, நீண்ட கால ஒப்பந்தம், தமிழகத்தில் உற்பத்தி செய்யப்படும் மின்சாரம் போன்றவற்றை வைத்து மின் விநியோகம் செய்து வந்தோம்.

தற்போது மீண்டும் முழு ஊரடங்கு அறிவிக்கப்பட்டதால், மின்சாரத் தேவை குறைந்துள்ளது. அதுமட்டுமில்லாமல், தமிழகத்தில் காற்றாலை மூலம் 3,000 முதல் 4,000 மெகா வாட் மின்சாரம் கிடைக்கிறது. தற்போது சுமார் 14,500 மெகா வாட் மட்டுமே மின்தேவை உள்ளது. இப்படி இருக்கிற சூழ்நிலையில், மின் தடை ஏன் ஏற்படுகிறது என்பதை அமைச்சர் ஆய்வு செய்து நடவடிக்கை எடுப்பதை விட்டுவிட்டு, எங்கள் மீது குறை சொன்னால் மக்கள் அதை நம்பமாட்டார்கள். சென்னையில் புதைவடம் மூலம் மின் விநியோகம் செய்யப்படுகிறது. அங்கே ஏன் மின் தடை ஏற்படுகிறது என்பதை அமைச்சர் மக்களுக்கு தெளிவுப்படுத்த வேண்டும்.

கடந்த ஊரடங்கின்போது, மின் கட்டணத்தை செலுத்துவதற்கு நாங்கள் என்ன செய்தோமோ அதைதான் தற்போதும் செய்துள்ளார்கள். ஆனால் அதில் ஒரு தவற்றை செய்திருக்கிறார்கள். மே 19ஆம் தேதியின் பில் தொகையைக் கட்ட சொல்கிறார்கள். மே மாதம் கோடைக்காலம் என்பதால் பலருக்கும் அதிகப்படியான மின்சாரக் கட்டணம் வந்துள்ளது. அந்தத் தொகையை தற்போது செலுத்தச் சொல்வதால், கூடுதலான கட்டணத்தைச் செலுத்த முடியாமல் பலரும் தினசரி மின்வாரிய அலுவலகங்களுக்கு நடந்து கொண்டிருக்கின்றனர்.

10 நாட்களில் பராமரிப்பு பணிகள் முடிக்கப்படும் என்று அமைச்சர் சொல்லியிருந்தார். மே 7ஆம் தேதி பதவியேற்றார்கள்; இன்று (நேற்று) ஜூன் 19 . இவ்வளவு நாட்கள் என்ன செய்தார்கள். தற்போது 10 நாட்களில் பரமாரிப்புப் பணிகளை செய்து முடிப்போம் என்று சொல்கிறவர்கள், ஆட்சிக்கு வந்ததும் அதை தொடங்கியிருந்தால், ஊரடங்குக்கு முன்பே இந்தப் பணிகளை செய்து முடித்திருக்கலாமே, அதை ஏன் செய்யவில்லை என்பது அமைச்சருக்குதான் தெரியும்.

அதனால் எங்கள்மீது குறை சொல்வதை நிறுத்திக்கொண்டு துரித நடவடிக்கைகளில் கவனம் செலுத்தி விரைவில் மின்தடை பிரச்சினையை சரி செய்ய வேண்டும்” என்று பேசினார்.

-வினிதா

பன்னீர், எடப்பாடி ஒற்றுமையில்லை-ஒற்றைத் தலைமை நான்தான்: சசிகலா ...

5 நிமிட வாசிப்பு

பன்னீர், எடப்பாடி ஒற்றுமையில்லை-ஒற்றைத் தலைமை நான்தான்: சசிகலா

நாங்கள் திருடர்களா?: நிதியமைச்சருக்கு விவசாயிகள் கண்டனம்!

8 நிமிட வாசிப்பு

நாங்கள் திருடர்களா?: நிதியமைச்சருக்கு விவசாயிகள் கண்டனம்!

ஜார்ஜ் பொன்னையா கைது: முழு பின்னணி!

11 நிமிட வாசிப்பு

ஜார்ஜ் பொன்னையா கைது: முழு பின்னணி!

ஞாயிறு 20 ஜுன் 2021