மின்னம்பலம் மின்னம்பலம்

வியாழன் 17 ஜுன் 2021

’அதிமுக நெருப்பில் பூத்த மலர்’ : ஓபிஎஸ்,ஈபிஎஸ் எச்சரிக்கை!

’அதிமுக நெருப்பில் பூத்த மலர்’ : ஓபிஎஸ்,ஈபிஎஸ் எச்சரிக்கை!

அதிமுகவினரை அச்சுறுத்துவதால் கழகம் அடங்கி போகும் என்று தப்பு கணக்கு போடாமல், தலைகால் தெரியாமல் ஆட்டம் போடாமல் நல்லாட்சி நடத்துவதில் திமுக கருத்தை செலுத்த வேண்டும் என்று அதிமுக, திமுக அரசுக்கு எச்சரிக்கை விடுத்துள்ளது.

அதிமுக ஒருங்கிணைப்பாளர் ஒ.பன்னீர்செல்வம், இணை ஒருங்கிணைப்பாளர் எடப்பாடி பழனிசாமி இருவரும் கூட்டாக அறிக்கை ஒன்றை வெளியிட்டுள்ளனர்.அதில், “ஏழை, எளிய, நடுத்தர மக்கள் தங்கள் வாழ்வில் அனைத்து வளங்களையும் பெற்று நிம்மதியுடன் வாழ வேண்டும் என்ற உன்னத நோக்கத்தில் புரட்சி தலைவர் எம்.ஜி.ஆர் அனைந்திந்திய அண்ணா திராவிட முன்னேற்ற கழகம் என்னும் மாபெரும் பேரியக்கத்தை தோற்றுவித்து, அவர் நினைத்ததை செயல்படுத்தி காட்டினார்.

அதேபோல,புரட்சி தலைவி அம்மாவும் மக்கள் நலன் ஒன்றை மட்டுமே குறிக்கோளாக கொண்டு பல்வேறு வரலாற்று சிறப்பு மிக்க சாதனைகளை நிகழ்த்தி காட்டினார்கள். நம் இருபெரும் தலைவர்களும் பல்வேறு சோதனைகளையும், வேதனைகளையும், இன்னல்களையும், தியாகங்களையும் சந்தித்தே அனைத்திந்திய அண்ணா திராவிட முன்னேற்ற கழகத்தை கட்டிக்காத்து ஒரு மாபெரும் இயக்கமாக வளர்த்து வந்துள்ளார்கள்.

அந்த வகையில், கழகத்தையும், தொண்டர்களையும் நாளும், பொழுதும் கண் எனக் காத்து வருகிறோம். தொடர்ந்து தொய்வில்லாமல் மக்கள் பணிகளை ஆற்றி வருகிறோம்.

இந்நிலையில், ஆட்சிக்கு வந்த நாளில் இருந்து திமுகவின் இயற்கை குணாதிசயங்கள் தமிழ் நாட்டு மக்களை வாட்டி, வதைக்க தொடங்கிவிட்டன.

பத்தாண்டு காலம் தலைகாட்டாத மின்வெட்டு இப்போது மாநிலம் முழுவதும் தலைவிரித்து ஆடுகிறது. பட்ட பகலில் சட்ட விரோத செயல்களில் எவ்வித கூச்சமோ, அச்சமோ இன்றி திமுகவினர் வெட்ட வெளிகளிலும், வீதிகளிலும் முழு மூச்சில் ஈடுபட்டு வருகின்றனர். அரசு அலுவலகங்கள் சுதந்திரமாக பணிசெய்ய முடியாத அளவுக்கு ஆளும் கட்சியினரின் தலையீடும், உருட்டல் மிரட்டல்களும் அரங்கேறி கொண்டிருக்கின்றன.

ஆட்சிக்கு வந்து ஒரு மாதமே முடிந்த நிலையில், வாக்களித்த மக்களை வஞ்சிப்பதில் முதலிடம் பெற்ற ஆட்சியாக திமுக ஆட்சி தனது இருப்பையும், இயல்பையும் காட்டி கொள்கிறது.

ஜனநாயகத்தின் ஆணிவேராக விளங்கக்கூடிய கருத்து சுதந்திரத்தை நசுக்குவதில் திமுகவினர் தங்களது வரம்பு மீறலையும் மாநிலமெங்கும் வெளிப்படுத்தி வருகின்றனர். ஆளும் கட்சியினரின் தவறுகளையும், தலையீடுகளையும் வெளிச்சத்திற்கு கொண்டு வரும் அடிப்படை அரசியல் கடமையில் ஈடுபட்டிருக்கும் அதிமுகவின் தகவல் தொழில்நுட்ப பிரிவினர் மீது வன்முறை தாக்குதல்களை ஏவிவிடுவதில் திமுகவினர் மாநிலத்தின் பல இடங்களில் தீவிரமாக உள்ளனர்.

காவல் துறையினரின் துணைகொண்டு அதிமுக தகவல் தொழில்நுட்பப் பிரிவினர் மீது வன்முறைத் தாக்குதல்களையும், பொய் வழக்குப் போடும் அடாத செயல்களிலும் திமுகவினர் ஈடுபடும் நிகழ்வுகள் பல இடங்களில் நடந்து வருகிறது.

திமுகவினரின் இத்தகைய ஜனநாயக விரோத நடவடிக்கைகளுக்கு எங்களுடைய கடும் கண்டனத்தை தெரிவித்துக்கொள்ள கடமைப்பட்டிருக்கிறோம். ஆற்ற வேண்டிய பணிகள் ஆயிரம் இருக்கையில், அராஜகத்திற்கு துணைபோகும் செயலில் ஆளும் கட்சியினர் தொடர்ந்து ஈடுபட்டு கொண்டிருப்பது மக்களுக்கு செய்யும் துரோகமே ஆகும்.

பழிவாங்கும் நோக்கத்தோடு அதிமுகவினர் மீது, அநீதிகளையும், அராஜகங்களையும், ஆட்சியின் அலங்கோலங்களையும் தட்டி கேட்கும் கழகத்தின் தகவல் தொழில்நுட்ப பிரிவினர் மீதும், பொய் வழக்கு போடுவதும், தாக்குதல் நடத்துவதுமான செயல்களை திமுக தலைமை தலையிட்டு தடுத்து நிறுத்த வேண்டும்.

பாதிக்கப்படக்கூடிய தகவல் தொழில்நுட்ப பிரிவைச் சேர்ந்த நிர்வாகிகள் மற்றும் உறுப்பினர்கள் அந்தந்த பகுதியில் இருக்கக்கூடிய மாவட்ட, மாநகர, நகர, ஒன்றிய, பேரூராட்சி கழக நிர்வாகிகளோடும், கழக வழக்கறிஞர் பிரிவு நிர்வாகிகளோடும் கலந்துபேசி அவர்களுக்கு தகவல் தெரியப்படுத்தி பாதுகாப்பை உறுதிப்படுத்திக் கொள்ள வேண்டும்.

எந்த சூழ்நிலையிலும் எதிர்த்து களமாடுவதற்கு கழக வழக்கறிஞர் பிரிவு தயார் நிலையில் இருக்கிறது. அதை, கழக வழக்கறிஞர் பிரிவு எதிர்க்கட்சி என்ற பிரதானமான வாய்ப்பை பயன்படுத்தி, சட்ட நெருக்கடியை திமுகவிற்கும், அதன் தலைமையிலான அரசிற்கும் தருவதற்கு தயாராக இருக்கிறது என்பதை தெரிவித்து கொள்கிறோம்.

அதிமுக புதுவெள்ளத்தில் மிதந்து வரும் நுரை பூ அல்ல ஊதி விளையாட. தொண்டர்களின் வீரத்திலும், தியாகத்திலும் விளைந்திட்ட நெருப்பில் பூத்த மலர். எந்த அச்சுறுத்தலும் எங்கள் இயக்கத்தை நெருங்க முடியாது. அமைதியாகவும், பொறுப்புணர்ச்சியுடனும் ஜனநாயக கடமையாற்றி வரும் கழகத்தினரையும், பல்வேறு அணியினரையும், தகவல் தொழில்நுட்ப பிரிவினரையும் அச்சுறுத்துவதால் கழகம் அடங்கி போகும் என்று தப்பு கணக்கு போடாமல், தலைகால் தெரியாமல் ஆட்டம் போடாமல், நல்லாட்சி நடத்துவதில் கருத்தையும் செலுத்துவது, வாக்களித்த மக்களுக்கு செய்ய வேண்டிய அடிப்படை கடமை திமுகவுக்கு இருப்பதை நினைவில்கொள்ள வேண்டும் என்று கேட்டுக்கொள்கிறோம்” என தெரிவிக்கப்பட்டுள்ளது.

-வினிதா

ஒரே நிறுவனத்துக்கு 100 டன் ஸ்வீட்: டெண்டர் விதிமுறைகளைத் திருத்திய ...

6 நிமிட வாசிப்பு

ஒரே நிறுவனத்துக்கு 100 டன் ஸ்வீட்: டெண்டர் விதிமுறைகளைத் திருத்திய அமைச்சர்!

அண்ணாமலையின் ஆதாரத்துக்கு தொடர் பதிலடி கொடுத்த அமைச்சர்!

8 நிமிட வாசிப்பு

அண்ணாமலையின் ஆதாரத்துக்கு தொடர் பதிலடி கொடுத்த அமைச்சர்!

விஜயபாஸ்கர் பினாமிகளின் வங்கி லாக்கர்களுக்கு சீல்?

5 நிமிட வாசிப்பு

விஜயபாஸ்கர் பினாமிகளின் வங்கி லாக்கர்களுக்கு சீல்?

வியாழன் 17 ஜுன் 2021