மின்னம்பலம் மின்னம்பலம்

வெள்ளி 14 மே 2021

இளைஞர்களுக்குத் தடுப்பூசி: மத்திய அரசுக்கு மதுரை எம்.பி. கடிதம்!

இளைஞர்களுக்குத் தடுப்பூசி: மத்திய அரசுக்கு மதுரை எம்.பி. கடிதம்!

மதுரைத் தொகுதியில் 30 ஆயிரம் இளைஞர்களுக்குத் தடுப்பூசி செலுத்த எனது தொகுதி நிதியிலிருந்து ஒரு கோடி ரூபாய் தருகிறேன் என்று மார்க்சிஸ்ட் கம்யூனிஸ்ட் கட்சியின் மதுரை நாடாளுமன்ற உறுப்பினர் சு.வெங்கடேசன் அறிவித்துள்ளார். இதற்கு ஒன்றிய அரசு ஒப்புதல் தர வேண்டும் என்று வலியுறுத்தியுள்ளார்.

இதுகுறித்து மத்திய சுகாதாரச் செயலாளருக்கு சு. வெங்கடேசன் எம்.பி. எழுதியுள்ள கடிதத்தில், "கோவிட் பேரிடர் இரண்டாம் அலை 18-45 வயதுக்கு உட்பட்ட இளைஞர்களை அதிகமாகப் பாதிக்கும் என பலரும் எச்சரித்து வருகின்றனர். இதை மனதில்கொண்டு ஒன்றிய அரசாங்கம் இந்த வயதுக்குள் வரக்கூடிய அனைவருக்கும் விரைவில் தடுப்பூசி கிடைப்பதை உறுதி செய்யும் என்று நம்புகிறேன்.

களத்தில் பணியாற்றும் அரசு ஊழியர்கள், அதிகாரிகள் தவிர குடிமைச் சமூகமும் இந்த நிவாரணப் பணியில் ஈடுபடுத்த வேண்டும். அரசின் முயற்சிகளுக்குத் துணை புரியச் செய்ய வேண்டுமெனக் கருதுகிறேன். அதுவும் சுகாதாரப் பணியாளர்கள், அரசின் முன்களப் பணியாளர்கள் பெரும் மன அழுத்தத்திற்கு ஆளாகியுள்ளார்கள் என்ற செய்தி வந்துள்ள சூழ்நிலையில் இது முக்கியமானது. ஓராண்டு நீண்ட பேரிடர் பணியில் இத்தகைய மன உளைச்சல் இயல்பானதுதான்.

இளைஞர்களைக் கொண்ட சுகாதார ஆர்வலர் படை ஒன்றிய, மாநில அரசின் பணிகளில் உதவ, முன்னெச்சரிக்கை மற்றும் கோவிட் வழிகாட்டல்கள் குறித்த செய்திகளை மக்களிடம் சேர்க்க, விழிப்புணர்வை உருவாக்க என்னுடைய மதுரை நாடாளுமன்றத் தொகுதியில் தன்னார்வ இளைஞர்களை ஈடுபடுத்தத் திட்டமிட்டுள்ளேன். அவர்கள் இரண்டாம் நிலை சுகாதார ஆர்வலர் படையாகச் செயல்படுவார்கள்.

கோவிட் நோயாளிகளுக்கும், அவர்களின் குடும்பங்களுக்கும் அவர்கள் உதவுவார்கள். மருத்துவமனை படுக்கைகள் கிடைப்பது, உணவு, பாதிக்கப்பட்டவர்களுக்கு வழிகாட்டல், நிலைமையைக் கண்காணிப்பது, வீட்டில் தனிமைப்படுத்தப்பட்ட மக்களுடன் தொடர்புகளைப் பலப்படுத்துவது, எல்லோருக்கும் தடுப்பூசி ஆகியவற்றை உறுதி செய்வார்கள். இதன் வாயிலாக முன்களப் பணியாளர்களுக்கு வேலைப்பளுவைக் குறைக்க முடியும். அதன் மூலம் கோவிட் தொற்றாளர்களுக்கான சிகிச்சையில் மட்டும் அவர்களின் கவனக்குவிப்பை உறுதி செய்ய முடியும்.

இதன் மீது உங்களின் ஒத்துழைப்பை நாடுகிறேன். கோவாக்சின், கோவிஷீல்டு தடுப்பூசிகளை எனது தொகுதியில் உள்ள இளைஞர்களுக்கு எம்.பி. தொகுதி மேம்பாட்டு நிதி வாயிலாக முன்னுரிமை அளித்து வழங்கிட வேண்டுமெனக் கேட்டுக் கொள்கிறேன். அதன் மூலம் அவர்களை கோவிட் எதிர்ப்பு களப்பணியில் தன்னார்வலர்களாக எனது தொகுதியில் பயன்படுத்த முடியும்.

இதற்கான துவக்கமாக எனது எம்.பி. தொகுதி மேம்பாட்டு நிதியிலிருந்து 30 ஆயிரம் தன்னார்வ இளைஞர்களுக்கு முழுமையாகத் தடுப்பூசி வழங்க விரும்புகிறேன். அதன்பின் கோவிட் ஒழிப்புப் பணியில் அவர்கள் ஈடுபடுவார்கள். நான் அடிப்படையான கொள்கை நிலையை வலியுறுத்திப் பதிவு செய்கிறேன். “எல்லோருக்கும் இலவச தடுப்பூசி” என்பதற்கான கொள்கை உருவாக்கப்பட்டு அமலாக்கப்பட்டு ஒட்டுமொத்த மக்கள் பயன் பெறவேண்டும். அதுவே சரியானதாகும்.

அரசின் தற்போதைய கொள்கை வரம்பிற்குட்பட்டு ஒரு வேண்டுகோளை முன்வைக்கிறேன். எனது தொகுதிக்கு போதுமான தடுப்பூசிகளை வழங்குங்கள். மேலே கூறிய மனிதநேய சேவைக்கு அது பயன்படும். தன்னார்வ இளைஞர் 30 ஆயிரம் பேருக்கு (ரூ.150 வீதம் ஒரு முறைக்கு) இரண்டு முறைக்கும் சேர்த்து எனது எம்.பி. தொகுதி மேம்பாட்டு நிதியிலிருந்து வழங்குவேன். உங்களின் ஒப்புதல் கிடைத்தவுடன் இத்தொகை அனுப்பப்படுவதை உறுதி செய்வேன் என்பதையும் தெரிவித்துக்கொள்கிறேன்” என்று குறிப்பிட்டுள்ளார்.

- இராமானுஜம்

கைது செய்யத் துணிந்த எஸ்.பி.- வெளிநாடு பறக்கத் தயாராகும் எம்.பி? ...

10 நிமிட வாசிப்பு

கைது செய்யத் துணிந்த எஸ்.பி.- வெளிநாடு பறக்கத் தயாராகும் எம்.பி? - சிபிசிஐடி விசாரணைப் பின்னணி!

கொலைப் புகார்: கடலூர் திமுக எம்பியை ராஜினாமா செய்ய ஸ்டாலின் ...

12 நிமிட வாசிப்பு

கொலைப் புகார்: கடலூர் திமுக எம்பியை ராஜினாமா செய்ய ஸ்டாலின் உத்தரவு!

பிடிஆருக்கு ஜிஎஸ்டி கவுன்சிலில் முக்கியப் பொறுப்பு!

3 நிமிட வாசிப்பு

பிடிஆருக்கு ஜிஎஸ்டி கவுன்சிலில் முக்கியப் பொறுப்பு!

வெள்ளி 14 மே 2021