மின்னம்பலம் மின்னம்பலம்
வியாழன், 3 டிச 2020

மோடி - ராஜபக்‌ஷே: காணொலி மாநாடு!

மோடி - ராஜபக்‌ஷே:   காணொலி  மாநாடு!

இந்தியப் பிரதமர் நரேந்திர மோடியும், இலங்கை பிரதமர் மஹிந்த ராஜபக்‌ஷேவும் நாளை (செப்டம்பர் 26) இருதரப்பு காணொலி மெய்நிகர் மாநாடு ஒன்றை நடத்துகின்றனர்.

இலங்கை நாடாளுமன்றத் தேர்தலுக்குப் பிறகு... இந்தியா மற்றும் இலங்கைக்கு இடையே நீண்ட காலமாக நீடித்து வரும் நட்புறவின் பின்னணியில் நடக்கும் இந்த மாநாட்டின் மூலம், இருதரப்பு உறவுகளுக்கான விரிவான செயல் திட்டத்தை ஆராயும் வாய்ப்பு இரு நாடுகளுக்கும் கிடைத்திருக்கிறது என்று மத்திய அரசின் செய்திக் குறிப்பு கூறுகிறது.

இது தொடர்பாக இலங்கை வெளியுறவுத் துறை வெளியிட்டுள்ள செய்திக் குறிப்பில், “இலங்கை மற்றும் இந்தியாவின் பிரதமர்களுக்கிடையில் 2020 செப்டம்பர் 26 சனிக்கிழமையன்று இருதரப்பு மெய்நிகர் மாநாடு நடைபெறுகிறது.

2020 ஆகஸ்ட் 6ஆம் தேதி புதிதாகத் தேர்ந்தெடுக்கப்பட்ட பிரதமர் ராஜபக்‌ஷேவுடன் இந்தியப் பிரதமர் மோடி தொலைபேசியில் உரையாடி வாழ்த்து தெரிவித்தார். அப்போது பிரதமர் நரேந்திர மோடியின் முன்முயற்சியின் விளைவாக, இரு நாடுகளுக்கும் இடையே காணொலி மாநாட்டின் மூலமாக பன்முக இருதரப்பு உறவை மறுபரிசீலனை செய்து கொள்வதற்கு இரண்டு தலைவர்களும் ஒப்புக்கொண்டனர்.

அரசியல், பொருளாதாரம், நிதி, அபிவிருத்தி, காவல் மற்றும் பாதுகாப்புத் துறைகள், கல்வி, சுற்றுலா, கலாச்சாரம் மற்றும் பரஸ்பரம் ஆர்வமுள்ள பிராந்திய மற்றும் சர்வதேச பிரச்சினைகள் ஆகியன தொடர்பாக இந்த இருதரப்புக் கலந்துரையாடலின் போது கவனம் செலுத்தப்படும் என எதிர்பார்க்கப்படுகிறது.

சம்பந்தப்பட்ட அமைச்சர்கள் மற்றும் இரு நாடுகளுடைய முக்கிய அதிகாரிகள் இந்த மாநாட்டின் போது தலைவர்களுடன் பங்கேற்பார்கள்” என்று கூறப்பட்டுள்ளது.

இலங்கை பிரதமராக ராஜபக்‌ஷே பதவியேற்றதும் வெளிநாட்டுத் தலைவருடன் நடத்தும் முதல் காணொலி சந்திப்பு மோடியுடன்தான் என்பது குறிப்பிடத் தக்கது. அதேபோல மோடியும் அண்டை நாட்டுடன் காணொலியிலேயே உச்சி மாநாடு நடத்துவதும் முதன்முதலாய் இலங்கையோடுதான்.

-வேந்தன்

வெள்ளி, 25 செப் 2020

chevronLeft iconமுந்தையது
அடுத்ததுchevronRight icon