தொழில்வளர்ச்சித் துறையில், தமிழ்நாடு அரசு போகும் பாதை ஒளிவெள்ளமாகத் தெரிகிறது என அமைச்சர் தங்கம் தென்னரசு தெரிவித்துள்ளார்.
சட்டப்பேரவை கூட்டம் வருகிற 9ம் தேதி நடைபெற உள்ள நிலையில், முதல்வர் மு.க.ஸ்டாலின் தலைமையில் இன்று (ஜனவரி 4) காலை சென்னை, தலைமை செயலகத்தில் தமிழக அமைச்சரவை கூட்டம் நடைபெற்றது. இந்த கூட்டத்தில், ஆளுநர் உரையில் இடம்பெற வேண்டிய அம்சங்கள் குறித்து ஆலோசனை நடத்தப்பட்டது.
அதன்பின்னர் நாமக்கல் கவிஞர் மாளிகையில் தொழில்துறை அமைச்சர் தங்கம் தென்னரசு செய்தியாளர்களை சந்தித்தார்.
அப்போது அவர், ”ரூ.15,610.43 கோடி தொழில் முதலீட்டு திட்டங்களுக்கு தமிழ்நாடு அமைச்சரவை ஒப்புதல் அளித்துள்ளது. புதிய தொழில் முதலீடுகளுக்கு தமிழ்நாடு அமைச்சரவை ஒப்புதல் அளித்துள்ளது. புதிய தொழில்நுட்ப முதலீடுகள் மூலம் 8,776 பேருக்கு வேலைவாய்ப்பு கிடைக்கும்.
போச்சம்பள்ளி, தேனி, புதுக்கோட்டை, சென்னையை ஒட்டியுள்ள பகுதிகளில் முதலீடுகள் வருகின்றன; 8 புதிய திட்டங்களை செயல்படுத்த அமைச்சரவை கூட்டத்தில் ஒப்புதல் அளிக்கப்பட்டுள்ளது. தென் தமிழகத்தில் நிறைய முதலீடுகள் கிடைக்கப் பெற்றுள்ளன. மேலும் பல முதலீடுகள் தென் தமிழகத்திற்கு வருவதற்கான பணிகள் நடைபெற்று வருகின்றன.
மின்னணு வாகன உற்பத்தி, ஆட்டோமொபைல், வயர்லெஸ் டெக்னாலஜி, ஆக்ஸிஜன் தொழிற்சாலை உள்ளிட்ட பல துறைகளில் அனுமதி அளிக்கப்பட்டுள்ளது. முதலீடுகள் பரவலான முறையில் அமையக்கூடிய வகையில் பெறப்பட்டுள்ளது. மின்னணுக் கொள்கையில் திருத்தங்கள் மேற்கொள்ளப்பட்டுள்ளது.
பரந்தூரில் வரவுள்ள விமான நிலையத்தை ஒட்டி ஏற்கனவே தொழில் பூங்காக்கள் உள்ளன. பரந்தூர் விமான நிலையம் தொடர்பான முன் ஏல சந்திப்பில், அந்த பகுதி மக்களின் கருத்துகள் தொடர்பாக தொழில்நுட்பம் சார்ந்து ஆலோசிக்கப்பட்டன.
இதுதவிர உலகப் பொருளாதார மன்றத்தில் தமிழ்நாடு அரசு கலந்துகொள்ள உள்ளது. அதில் தமிழ்நாட்டின் இருப்பை பதிவு செய்வது முக்கியமானது. தமிழ்நாட்டுடன், மற்ற மாநிலங்களும் வருகிறார்கள். இதனால் நாங்கள் போகும் பாதையில் ஒளிவெள்ளமாகத் தெரிகிறது” என அவர் தெரிவித்துள்ளார்.
கிறிஸ்டோபர் ஜெமா
உயிர்களை பலி வாங்கும் மதுரவாயல் சாலை: அரசு கவனிக்குமா?
”நான் குற்றவாளியாகி விடுவேன் என பயம்”: உயிரிழந்த பெண்ணின் தோழி!
