ED வழக்கில் இருந்து விடுவிக்க மறுப்பு : செந்தில் பாலாஜியை ஆஜர்ப்படுத்த உத்தரவு!

அமலாக்கத்துறை வழக்கில் இருந்து விடுவிக்க கோரிய செந்தில் பாலாஜியின் மனு தள்ளுபடி செய்யப்பட்டது.

முன்னாள் அமைச்சர் செந்தில் பாலாஜி அமலாக்கத் துறையால் கைது செய்யப்பட்டு ஓராண்டுக்கும் மேலாக சிறையில் அடைக்கப்பட்டுள்ளார். அவர் ஜாமீன் கேட்ட மனுக்கள் தள்ளுபடி செய்யப்பட்டன.

இந்த வழக்கில் இருந்து தன்னை விடுவிக்க வேண்டும் என செந்தில் பாலாஜி தாக்கல் செய்த மனு மீதான விசாரணை முடிவடைந்து இறுதி தீர்ப்புக்காக ஒத்திவைக்கப்பட்டது.

இந்தசூழலில் செந்தில் பாலாஜி மேலும் 2 மனுக்கள் தாக்கல் செய்தார்.

“அமலாக்கத் துறை வழக்கில் வங்கி தொடர்பான அசல் ஆவணங்களுக்கும், அமலாக்கத்துறை வழங்கிய ஆவணங்களுக்கும் வேறுபாடுகள் உள்ளன. இந்த ஆவணங்களில் அமலாக்கத் துறை கையால் எழுதி திருத்தியிருக்கிறது. தங்களுக்கு வழங்கிய ஆவணங்களை தடய அறிவியல் துறை ஆய்வுக்கு அனுப்பி உண்மையை கண்டறிய வேண்டும்” என்று ஒரு மனுவில் கோரப்பட்டிருந்தது.

மேலும், அமலாக்கத் துறை வழக்கில் இருந்து விடுவிக்கக்கோரி தாக்கல் செய்த மனுவில் அனைத்து தரப்பு வாதங்களும் முடிவடைந்த, இந்த வழக்கில் மீண்டும் தங்கள் தரப்பு வாதங்களை முன் வைக்க அனுமதிக்க வேண்டும்” என்றும் செந்தில் பாலாஜி தரப்பில் மனு தாக்கல் செய்யப்பட்டிருந்தது.

இந்த மனுக்கள் நீதிபதி அல்லி முன்பு இன்று (ஜூலை 18) விசாரணைக்கு வந்தது.

அப்போது செந்தில் பாலாஜி தரப்பில் வழக்கறிஞர் கவுதமன் ஆஜராகி, அமலாக்கத் துறையால் எங்களுக்கு வழங்கப்பட்ட ஆவணங்களில் கையால் எழுதி திருத்தப்பட்டிருக்கிறது என்றார்.

அமலாக்கத் துறை தரப்பில் வழக்கறிஞர் என்.ரமேஷ் ஆஜரானார். “இந்த மனுக்கள் விசாரணைக்கு உகந்தது அல்ல. இந்த ஆவணங்கள் வங்கியில் இருந்துதான் பெறப்பட்டது. விசாரணையை இழுத்தடிக்க வேண்டும் என்பதற்காக இந்த மனுக்களை தாக்கல் செய்துள்ளார்” என்றார்.

இந்த இரு மனுக்களையும் நீதிபதி தள்ளுபடி செய்தார்.

அமலாக்கத் துறை வழக்கில் இருந்து விடுவிக்க கோரிய செந்தில் பாலாஜியின் மனுவையும் தள்ளுபடி செய்தார்.

தொடர்ந்து, வழக்கில் குற்றச்சாட்டு பதிவுக்காக செந்தில் பாலாஜியை ஜூலை 22ஆம் தேதி நேரில் ஆஜர்படுத்த வேண்டும் எனவும் உத்தரவு பிறப்பித்தார்.

செய்திகளை உடனுக்குடன் பெற மின்னம்பலம் வாட்ஸ் ஆப் சேனலில் இணையுங்கள்…

பிரியா

தமிழ் வழிக் கல்வி… தந்தைக்கு மரியாதை! உயர் நீதிமன்றம் டு உச்சநீதிமன்ற நீதிபதி… யார் இந்த ஆர்.மகாதேவன்?

நீட் முடிவுகளை மையம் வாரியாக வெளியிட உத்தரவு : உச்ச நீதிமன்றம் அதிரடி!