அமைச்சர் செஞ்சி மஸ்தானுக்கு புதிய பதவி!

விழுப்புரம் வடக்கு மாவட்ட திமுக அவைத் தலைவராக அமைச்சர் செஞ்சி மஸ்தான் போட்டியின்றி தேர்வு செய்யப்பட்டுள்ளார்.

தமிழ்நாடு சிறுபான்மையினர் நலத்துறை மற்றும் வெளிநாட்டு வாழ் தமிழர் நலத்துறை அமைச்சராக செஞ்சி மஸ்தான் உள்ளார்.

இந்த நிலையில் திமுகவின் விழுப்புரம் வடக்கு மாவட்டச் செயலாளராக பணியாற்றி வந்த அவரை அப்பொறுப்பில் இருந்து கடந்த வாரம் திமுக தலைமை விடுவித்தது.

அவருக்கு பதிலாக புதிய மாவட்ட பொறுப்பாளராக டாக்டர் ப. சேகர் நியமனம் செய்யப்படுவதாக அறிவிப்பு வெளியானது.

திடீரென அமைச்சர் செஞ்சி மஸ்தானின் கட்சி பதவி பறிக்கப்பட்டதும், விழுப்புரம் தெற்கு மாவட்ட திமுக செயலாளராக அமைச்சர் பொன்முடியின் மகனான கௌதம சிகாமணி தெற்கு மாவட்டப் பொறுப்பாளராக நியமிக்கப்பட்டதும் திமுக வட்டாரத்திலும், அரசியல் வட்டாரத்திலும் விவாதத்தை எழுப்பியது.

இந்த நிலையில் அமைச்சர் செஞ்சி மஸ்தான் விழுப்புரம் வடக்கு மாவட்ட திமுக அவைத் தலைவராக தேர்வு செய்யப்பட்டு இருப்பதாக திமுக பொதுச்செயலாளர் துரைமுருகன் இன்று (ஜூன் 18) அறிவித்துள்ளார்.