முதலீடுகளை ஈர்ப்பதற்காக முதல்வர் ஸ்டாலின் அமெரிக்கா பயணம் செய்துள்ளார். சான்பிரான்சிஸ்கோவில் இன்று (ஆகஸ்ட் 30) நடைபெற்ற முதலீட்டாளர்கள் மாநாட்டில் ஸ்டாலின் முன்னிலையில், 4,100 பேருக்கு வேலைவாய்ப்பு கிடைக்கும் வகையில் புரிந்துணர்வு ஒப்பந்தம் மேற்கொள்ளப்பட்டது.
இந்த மாநாட்டின் போது, அமெரிக்க முதலீட்டாளர்களுக்கு முதலமைச்சர் ஸ்டாலின் தடம் பரிசுப்பெட்டகத்தை வழங்கினார்.
முதல்வர் பரிசளித்த ”தடம்” பெட்டகத்தினுள் இருக்கும் பொருள்கள்:
திருநெல்வேலியில் உருவாகும் சுற்றுச்சூழலுக்கு உகந்த வாழை நார் கூடை
விழுப்புரத்தைச் சேர்ந்த டெரகோட்டா சிற்பங்கள் (குதிரை)
நீலகிரியிலிருந்து தோடா எம்பிராய்டரி சால்
பவானியிலிருந்து பவானி ஜமுக்காளம்
புலிகாட்டிலிருந்து பனை ஓலை ஸ்டாண்ட்
கும்பகோணத்திலிருந்து பித்தளை விளக்கு
தமிழ்நாட்டின் கைவினைக் கலைஞர்களால் உருவான கைவினைப் பொருள்களை ஸ்டார்ட்அப் தமிழ்நாடு திட்டத்தின்கீழ், நவீன சமுதாயத்தில் அறிமுகம் செய்வதற்கான புதிய முயற்சி, ‘தடம்’.
தமிழ்நாட்டின் வளமான பண்பாட்டை பாதுகாக்கும் வகையில் பாரம்பரியமிக்க கைவினைப் பொருள்களுக்கு புத்துயிர் அளிக்கவும், சமகாலத்தில் அதன் முக்கியத்துவத்தை பறைசாற்றுவதற்காவும் உருவாக்கப்பட்டது ‘தடம்’ திட்டம்.
பவானியின் ஜமுக்காளம் நெசவாளர்கள் முதல் கள்ளக்குறிச்சியின் டெரகோட்டா கைவினைக் கலைஞர்கள் மற்றும் நீலகிரியின் தோடா எம்பிராய்டரி கலைஞர்கள் வரை, சிறு சிறு சமூகங்கள் தமிழ்நாட்டின் பாரம்பரிய அடையாளத்தை இன்றும் உயிர்ப்புடன் வைத்துள்ளனர்.
பழங்கால கைவினைப் பொருள்களை சமகால தமிழர் பண்பாட்டுடன் இணைப்பதன் மூலம் அவற்றை உயிர்ப்புடன் வைத்திருப்பதே இந்த திட்டத்தின் முதன்மை நோக்கம்.
அதேபோல் கைவினைக் கலைஞர்களை பன்னாட்டு சந்தைகளுடன் இணைத்து, தமிழ்நாட்டின் பண்பாட்டை உலகளவில் கொண்டு செல்ல இத்திட்டம் உதவுகிறது.
’தடம்’ திட்டத்தின்கீழ் கைவினைக் கலைஞர்களை ஊக்குவிக்கும் வகையில் முதல்வர் ஸ்டாலின் தான் சந்திக்கும் விருந்தினர்களுக்கு தடம் பெட்டகத்தை அளித்து வருகிறார்.
செய்திகளை உடனுக்குடன் பெற மின்னம்பலம் வாட்ஸ் ஆப் சேனலில் இணையுங்கள்…
இது என்னடா கடவுளுக்கு வந்த சோதனை? அப்டேட் குமாரு
உத்தரவை மீறினால் ஃபார்முலா 4 கார் ரேஸுக்கு ரெட் கார்டு: உயர்நீதிமன்றம் அதிரடி!
