டிஐஜி விஜயகுமாரின் கடைசிப் பொழுதுகளும், இறுதி நிமிடங்களும்!

“ராத்திரி எல்லாம் தூங்க மாட்டார் டிஐஜி.  தூக்கமே வரமாட்டேங்குது என்று சொல்லிக் கொண்டிருப்பார். அப்புறம் மன அழுத்தத்தை குறைத்து தூக்கம் வர வைப்பதற்காக தினமும் இரண்டு மாத்திரைகள் சாப்பிட்டுக் கொண்டிருந்தார்.  ஜூன் 1 ஆம் தேதி 60 மாத்திரை வாங்கிட்டு வந்து கொடுத்தோம்.  அதை முப்பது நாளில் சாப்பிடறதுக்கு பதிலாக  20 நாள்லயே சாப்பிட்டுட்டாரு.  அப்படியும் தூக்கம் வரலைனு சொல்லிட்டிருந்தாரு.

போன ஏப்ரல், மே மாசத்துல அவங்க அப்பா அம்மா தேனியிலருந்து வந்து இங்க தங்கியிருந்தாங்க. சின்ன வயசுல அப்பாவும் அம்மாவும் தன்னை வளர்த்ததை பத்தி அப்பப்ப எங்ககிட்ட சொல்லுவாரு.  அப்பா அம்மா மேல ரொம்ப பாசமா இருப்பாரு. அதனாலயோ என்னவோ அவங்க வந்து இங்க தங்கியிருந்த அந்த நாள்ல நல்ல தெளிவா இருந்தாரு. கொஞ்சமாச்சும் தூங்கினதா சொன்னாரு. கொஞ்ச நாள்ல அவங்க ஊருக்கு போனதும் சென்னையில இருந்த மேடமும், சாரோட மகளும் இங்க வந்துட்டாங்க. பாப்பாவை டாக்டருக்கு படிக்க வைக்கணும்னு சொல்லிக்கிட்டிருந்தார். காலேஜ் கூட முடிவாயிடுச்சுனு சொன்னாரு. எந்த காலேஜ்னு எங்ககிட்ட சொல்லலை” என்று சொல்லியிருக்கிறார்கள்.

மேலும்… “நான்கு நாட்களுக்கு முன்புகூட கோவை டாக்டர் ஒருவரை ஆபீசுக்கு அழைத்து தூக்கமே வரலைனு சொல்லி ஆலோசனை கேட்டாரு. அப்ப. ‘ ரெகுலர் டாக்டர் எழுதிக்கொடுத்த மாத்திரையை விட்டுட்டேன் சரியாக தூக்கம் வரலை’னு டாக்டர்கிட்ட கேட்டாரு.  அப்ப டிஐஜி, ‘இல்லாதது இருக்குற மாதிரியும் இருக்குறது இல்லாதது மாதிரியும்  ஃபீலிங் இருக்கு டாக்டர்’னு சொன்னாரு.  அந்த புது டாக்டரும் மாத்திரை எழுதிக் கொடுத்துட்டுப் போனாரு. ஆனா அந்த மாத்திரை சாப்பிட்ட பிறகுதான் அந்த ஃபீலிங் ரொம்ப அதிகமா இருக்குனு சொல்லிக்கிட்டிருந்தாரு” என்று வாக்குமூலம் கொடுத்திருக்கிறார்கள் கேம்ப் ஆபீஸ் ஊழியர்கள்.

இதையடுத்து சமீபத்தில் டிஐஜி விஜயகுமாரை பரிசோதனை செய்து மாத்திரைகள் கொடுத்த அந்த கோவை டாக்டரையும், சென்னை டாக்டர் ஆனந்த பாலாவையும் விசாரித்துள்ளனர் போலீஸார்.

போலீசாரிடம் டாக்டர் ஆனந்த் பாலா,  “டிஐஜி விஜயகுமார் மன அழுத்தத்துக்காக கடந்த நான்கு வருஷமா மாத்திரை எடுத்துக்கிட்டு வர்றாரு.  இல்லாதது ஒண்ணு இருப்பது மாதிரியும், இருக்கிறது இல்லாதது மாதிரியும் ஃபீல் பண்ணியிருக்காரு. நான் கொடுத்த மாத்திரையை தவிர வேற என்ன மாத்திரை இடையில சாப்பிட்டாருனு எனக்கு தெரியவில்லை” என்று சொல்லியிருக்கிறார்.  மிகச் சில நாட்களுக்கு முன் டிஐஜி விஜயகுமாரை பார்த்து ஆலோசித்த கோவை டாக்டரை தற்போது தீவிர விசாரணை வளையத்துக்குள் கொண்டு வந்திருக்கிறார்கள் அதிகாரிகள்.

டிஐஜி மனைவி கீதா மற்றும் குடும்பத்தாரிடமும் போலீஸார் விசாரித்துள்ளனர்.   “டிப்ரஷன்லதான் இருந்தாரு. ஆனால் ஆரம்பத்துல மாத்திரை சரியா எடுத்துக்க மாட்டாரு. அப்புறம்தான் ஒழுங்கா மாத்திரை எடுத்துக்க ஆரம்பிச்சாரு.  அதிகமாக கோபப்படுவாரு” என்று சொல்லியிருக்கிறார்கள்.