இந்தியா கூட்டணி வெற்றி முகட்டில் நிற்கிறது என்று திமுக தலைவரும் முதல்வருமான ஸ்டாலின் கூறியுள்ளார்.
நேற்று (மே 31) மின்னம்பலம் டிஜிட்டல் திண்ணையில், ‘டெல்லி பயணத்தைத் தவிர்த்த ஸ்டாலின்… இந்தியா கூட்டணியில் என்ன நடக்கிறது?’ என்ற தலைப்பில் செய்தி வெளியிட்டிருந்தோம். அதில் குறிப்பிட்டவாறே, இந்தியா கூட்டணியின் டெல்லி கூட்டத்தில் டி.ஆர்.பாலு கலந்துகொள்வார் என்று தமிழக முதல்வரும் திமுக தலைவருமான ஸ்டாலின் இன்று ( ஜூன் 1) தனது சமூக தளத்தில் பதிவிட்டுள்ளார்.
அதில், “பா.ஜ.க.வின் பத்தாண்டுகால பாசிச ஆட்சியை வீழ்த்தி, இந்தியாவைக் காக்க உருவாக்கப்பட்ட இந்தியா கூட்டணி, மக்களின் எதிர்பார்ப்பை பூர்த்திசெய்து, வெற்றியின் முகட்டில் நிற்கிறது. தன்னை எதிர்க்க யாருமே இல்லை என்ற மமதையில் இருந்த பா.ஜ.க.வுக்கு எதிராக, ஜனநாயகச் சக்திகளின் மாபெரும் அணித்திரளாக அது அமைந்திருக்கிறது. இந்திய மக்கள் அனைவருக்கும் நம்பிக்கை தரும் அணியாக, தேர்தல் களத்தில் அமைந்திருக்கிறது.
தங்களது இடைவிடாத பரப்புரையின் மூலம் இந்தியா கூட்டணியின் முன்னணித் தலைவர்கள், பா.ஜ.க. உருவாக்கிய போலி பிம்பத்தை மக்கள் மன்றத்தில் உடைத்தெறிந்து இருக்கிறோம். இந்தியா கூட்டணியின் வெற்றிச் செய்திக்கு இன்னும் மூன்று நாட்களே உள்ளன. வாக்கு எண்ணிக்கையின் போது அதிகமான விழிப்புணர்வுடன் இந்தியா கூட்டணி செயல்வீரர்கள் இருக்க வேண்டும் எனக் கேட்டுக் கொள்கிறேன்” என்று கூறியுள்ள ஸ்டாலின்,
“ஜூன் 4 – இந்தியாவின் புதிய விடியலுக்கான தொடக்கமாக அமையும். இது தொடர்பாக இந்தியா கூட்டணி தலைவர்கள் பங்கேற்கும் கூட்டத்தில் தி.மு.க. சார்பில் கழகப் பொருளாளரும் – நாடாளுமன்றக் கழகக் குழுத் தலைவருமான டி.ஆர்.பாலு பங்கேற்கிறார். பாசிச பா.ஜ.க. வீழட்டும்! இந்தியா வெல்லட்டும்!” என்று குறிப்பிட்டுள்ளார்.
செய்திகளை உடனுக்குடன் பெற மின்னம்பலம் வாட்ஸ் ஆப் சேனலில் இணையுங்கள்…
–வேந்தன்
புனே சொகுசு கார் விபத்து: சிறுவனின் தாயார் கைது!
“இது ட்ரெய்லர் தான்”: தியானத்துக்கு மத்தியில் மோடியின் அடுத்தடுத்த ட்வீட்!
