திமுக இளைஞரணியின் இரண்டாவது மாநில மாநாடு வரும் டிசம்பர் 17 ஆம் தேதி சேலம் மாவட்டம் பெத்தநாயக்கன் பாளையத்தில் நடைபெற இருக்கிறது.
இதற்கான ஏற்பாடுகளை கவனிக்க இளைஞரணி சார்பில் பல்வேறு குழுக்கள் அமைக்கப்பட்டுள்ளன. திமுகவின் முதன்மைச் செயலாளரும் சேலம் மாவட்ட பொறுப்பு அமைச்சருமான கே.என்.நேருதான் இந்த மாநாட்டுக்கான ஏற்பாடுகளை தீவிரமாக ஒருங்கிணைத்துக் கொண்டிருக்கிறார்.
நேற்று (நவம்பர் 20) சேலம் பெத்தநாயக்கன் பாளையத்துக்கு சென்ற அமைச்சர் கே.என்.நேரு மாநாட்டுப் பந்தல் அமைக்கும் பணிகளை பார்வையிட்டார், மலையோரம் அமைந்துள்ள ரம்யமான பகுதியில் இளைஞரணி மாநாடு நடைபெற உள்ள இடத்தில் தஞ்சாவூர் பந்தல் சிவா தலைமையில் பந்தல் அமைக்கும் ஏற்பாடுகள் வேகவேகமாக நடைபெற்று வருகின்றன.
நேற்று மாலை அங்கே சென்ற அமைச்சர் நேரு மாநாட்டுப் பந்தலை அதன் அமைப்பாளர் பந்தல் சிவாவுடன் சேர்ந்து பார்வையிட்டார். பந்தலின் முகப்புப் பகுதி, உட் பகுதி, மேடை பகுதி என்று பகுதி பகுதிகளாக பிரித்து ஒவ்வொரு ஏரியாவிலும் எப்படிப்பட்ட ஏற்பாடுகள் செய்யப்பட வேண்டுமென்று கூறினார் நேரு. ஒரு கட்டத்தில் பந்தலின் ஒவ்வொரு பகுதியும் திட்டமிட்டப்படி நீள அகலத்தைக் கொண்டிருக்கிறதா என்று டேப்பும் கையுமாக இறங்கி அளந்து சரிபார்த்துக் கொண்டார் நேரு. அமைச்சர் நேருவின் ஆய்வின்போது மாவட்டச் செயலாளர்கள் எஸ்.ஆர்.சிவலிங்கம், ராஜேந்திரன் எம்.எல்.ஏ, கழக நிர்வாகிகள் உள்ளிட்ட பலர் உடனிருந்தனர்.
முன்னதாக மாநாட்டுக்காக அமைக்கப்பட்ட 23 குழுக்களின் தலைவர்களின் ஆலோசனைக் கூட்டம் சென்னையில் அமைச்சர் நேரு தலைமையில் நடந்தது. இந்த கூட்டத்தில் இளைஞரணிச் செயலாளர் அமைச்சர் உதயநிதியும் கலந்துகொண்டார்.
இந்தக் கூட்டத்தில் மாநாட்டு ஏற்பாடுகள் பற்றி அமைச்சர் நேரு தலைமை உரையாற்றினார். அதன் பின் பேசிய அமைச்சர் உதயநிதி, “மாநாடு என்பது அடிக்கடி நடைபெறுவது அல்ல. எப்போதாவது ஒருமுறைதான் நடைபெறுகிறது. நம் இளைஞர் அணியின் மாநில மாநாடு 16 ஆண்டுகளுக்குப் பிறகு இப்போதுதான் நடைபெறுகிறது. அந்த சமயத்தில் நாம் இளைஞர் அணியில் இருக்கிறோம் என்பதே நமக்கான பெருமை. அதுவும் இந்த மாநாட்டுப் பணிகளை ஒருங்கிணைப்பதற்காக தலைமைக் கழகத்தால் அறிவிக்கப்பட்ட குழுக்களில் நாம் இடம்பெற்றிருக்கிறோம் என்பது கூடுதல் பெருமை. சேலத்தில் நடைபெற உள்ள இளைஞர் அணி மாநாடு, நம் இளைஞர் அணியின் பெருமையை, கழகத்தின் கட்டமைப்பை இந்திய ஒன்றியமே உணர்ந்துகொள்ளும் வகையில் நடைபெற இருக்கிறது.
100 பேர் கூடும் தெருமுனைப் பிரச்சாரக் கூட்டத்துக்கே, பேச்சாளராக யாரை அழைக்கலாம், என்ன தலைப்பின் கீழ் அவரை பேச வைக்கலாம், பின்னணியில் ஃப்ளெக்ஸ் வைக்கலாமா, எல்இடி வைக்கலாமா? அப்படி வைக்கப்படும் ஃப்ளெக்ஸ் பேனரில் என்னென்ன வாசகங்கள் இடம் பெற வேண்டும், உள்ளூர் கட்சி நிர்வாகிகளுக்கு முறையாக தகவல் தெரிவிப்பது, மீடியாவுக்கு தகவல் சொல்வது, துண்டறிக்கை தயார் செய்வது… என பல்வேறு விஷயங்களை திட்டமிடுவோம். அப்படி என்றால், லட்சக்கணக்கான இளைஞர்கள் கூடும் நம் இளைஞர் அணி மாநில மாநாட்டுக்கான ஏற்பாடுகள் எந்தளவுக்கு நேர்த்தியாக திட்டமிடப்பட வேண்டும் என்பதை நீங்கள் அனைவரும் உணர்ந்திருப்பீர்கள்.
மாநாட்டுக்கான பணிகளை நாம் அனைவரும் இணைந்துதான் செய்யப்போகிறோம். ஆனால் இந்தப் பணியை அவர் பார்த்துவிடுவார், இவர் பார்த்துக்கொள்வார் என்று இருந்து எந்தப் பணியும் விடுபட்டுவிடக்கூடாது என்பதற்காகத்தான் இந்தக் குழுக்கள் அமைக்கப்பட்டுள்ளன. ஒவ்வொரு குழுவின் பணி என்ன என்பது குறித்து உங்கள் ஒவ்வொருவருக்கும் அன்பகத்தின் மூலம் தெளிவாக தெரிவிக்கப்பட்டு அதுகுறித்து விளக்கிக் கூறப்பட்டு உள்ளது” என்ற உதயநிநி தொடர்ந்து பேசுகையில்,
“இந்த மாநாட்டை நடத்துவதற்கு நமக்கு மிகப்பெரிய பலமாக முதன்மைச் செயலாளர் அண்ணன் நேரு அவர்கள் உள்ளார்கள். பல மாநாட்டை நடத்திய அனுபவம் அவருக்கு உள்ளது. இதில் நாம் என்ன தவறு செய்வோம் என பலர் காத்திருக்கிறார்கள். அதனால் விமர்சனத்துக்கு இடமளிக்காமல், இந்த மாநாட்டை வெற்றிகரமாக நடத்திக்காட்ட வேண்டிய பொறுப்பு நம் அனைவருக்கும் உள்ளது. மாநாட்டுப் பணிகள் குறித்து உங்களுக்கு என்ன சந்தேகம் இருந்தாலும் அமைச்சர் நேரு அண்ணன் அவர்களையும், அங்குள்ள மாவட்டச் செயலாளர்களிடமும், அன்பகத்திலும் நீங்கள் கேட்டுத் தெளிவு பெறலாம்.” என்று பேசினார் உதயநிதி.
சேலம் இளைஞரணி மாநாட்டை ஒட்டி ஒவ்வொரு மாவட்டத்திலும் இளைஞரணி செயல்வீரர்கள் கூட்டத்தை உதயநிதி நடத்தி வருகிறார். அந்த வகையில் 22 ஆம் தேதி காலை சேலத்தில் செயல்வீரர்கள் கூட்டம் நடைபெற இருக்கிறது.
அதற்கு முன் இன்று நவம்பர் 21 ஆம் தேதி ஈரோடு வடக்கு – தெற்கு மாவட்டக் கழக இளைஞர் அணி செயல் வீரர்கள் கூட்டத்தில் கலந்துகொண்டார் உதயநிதி. அங்கிருந்து இன்று மாலை சேலம் செல்கிறார். மாநாட்டுப் பந்தல் அமைக்கும் பணிகளை அமைச்சர் நேருவுடன் சேர்ந்து பார்வையிட இருக்கிறார் உதயநிதி.
செய்திகளை உடனுக்குடன் பெற மின்னம்பலம் வாட்ஸ் ஆப் சேனலில் இணையுங்கள்…
–வேந்தன்
அதிமுக மாவட்டச் செயலாளர்கள் கூட்டம் தொடங்கியது!
பிக்பாஸ்: ஜோவிகாவிற்கு சீக்ரெட் மெசேஜ் அனுப்பிய வனிதா விஜயகுமார்?
