சென்னையில் தொடங்கியுள்ள உணவுத்திருவிழாவில் பீப் பிரியாணிக்கு அரசு அனுமதி வழங்கியிருக்கிறது.
உணவு பாதுகாப்புத் துறை சார்பில் சென்னை தீவுத்திடலில் நேற்று(ஆகஸ்ட் 12) உணவுத்திருவிழா தொடங்கியது. உணவு பாதுகாப்பு மற்றும் விழிப்புணர்வை ஏற்படுத்தும் வகையில் 3 நாட்களுக்கு இந்த உணவுத் திருவிழா நடத்தப்படுகிறது.
‘சிங்கார சென்னையில் உணவுத் திருவிழா 2022′ என்ற பெயரில் பாரம்பரிய உணவு வகைகளை பிரபலப்படுத்தும் விதமாக 150 அரங்குகள் அமைக்கப்பட்டுள்ளன.
உணவுத் திருவிழாவை அமைச்சர் மா.சுப்பிரமணியன் தொடங்கி வைத்தார். அப்போது உணவுத்திருவிழாவில் பீப் பிரியாணி அரங்கு ஏன் அமைக்கப்படவில்லை என்று கேள்வி எழுப்பப்பட்டது.
இதற்கு பதில் அளித்த அமைச்சர் மா.சுப்பிரமணியன், ” நானும் பீப் பிரியாணி சாப்பிடுபவன்தான். ஆனால், இங்கு அரங்கு அமைப்பதற்கு யாரும் அனுமதி கேட்காததால் அரங்கு அமைக்கப்படவில்லை” என்றார்.
இந்தநிலையில் உணவுத்திருவிழாவில் பீப் பிரியாணிக்கு அனுமதி வழங்கப்பட்டு இருப்பதாக அமைச்சர் மா.சுப்ரமணியன் தெரிவித்து இருக்கிறார்.
பீப் பிரியாணிக்கு 3 கடைகள் அனுமதி கேட்டு இருப்பதாக அவர் தெரிவித்துள்ளார். இன்று மாலை பீப் பிரியாணி விற்பனையை நேரில் சென்று பார்வையிட உள்ளதாகவும் மா.சுப்ரமணியன் கூறியுள்ளார்.
கலை.ரா
இஞ்சி விலை உயர்வு : மற்ற காய்கறிகளின் விலை பட்டியல்!
