வீட்டு வாடகை தொடர்பான புதிய விதிமுறைகள் இந்தியாவில் அமலுக்கு வந்துள்ளது. இதுபற்றி வாடகைக்குச் செல்வோரும் வீட்டு உரிமையாளர்களும் கட்டாயம் தெரிந்துகொள்ள வேண்டும்.
சென்னை போன்ற பெரிய நகரங்களில் பலர் வாடகை வீடு தேடுவதில் சிரமங்களை எதிர்கொள்கின்றனர். வீட்டு உரிமையாளர்களுடன் பேச்சுவார்த்தை நடத்துவதில் பலருக்கு தயக்கம் உள்ளது. தங்களுக்குள்ள உரிமைகள் என்ன என்று தெரியாமலோ அல்லது வீட்டு உரிமையாளர்களிடம் வாக்குவாதம் செய்வதாலோ வீடு கிடைக்காது என்ற பயம் பலரிடம் இருக்கிறது. இந்த சிரமங்களை போக்க, மத்திய அரசு 2025ஆம் ஆண்டுக்கான புதிய வாடகை விதிகளை அறிமுகப்படுத்தியுள்ளது.
இந்த புதிய விதிகள் வாடகை அனுபவத்தை எளிமையாகவும், வெளிப்படையாகவும், ஒழுங்காகவும் மாற்றும் என எதிர்பார்க்கப்படுகிறது. இந்த புதிய விதிகளின்படி, வாடகை ஒப்பந்தத்தை 60 நாட்களுக்குள் ஆன்லைனில் பதிவு செய்வது கட்டாயமாக்கப்பட்டுள்ளது. மேலும், பாதுகாப்பு வைப்புத்தொகைக்கும் (அட்வான்ஸ்) வரம்புகள் நிர்ணயிக்கப்பட்டுள்ளன. வாடகையை எப்போது உயர்த்துவது, எப்படி உயர்த்துவது, பிரச்சனைகளை தீர்ப்பதற்கான காலக்கெடு, வெளியேற்றுதல், பழுதுபார்த்தல், ஆய்வு செய்தல் மற்றும் குத்தகைதாரர் பாதுகாப்பு தொடர்பான உரிமைகள் ஆகியவற்றில் இதன் மூலம் இனி அனைவருக்கும் தெளிவு கிடைக்கும்.
மேலும், வாடகைத் தொகை ஒரு குறிப்பிட்ட வரம்பைத் தாண்டும்போது வரி விதிப்பு எவ்வாறு இருக்கும் என்பதையும் இந்த விதிகள் விளக்குகின்றன. எனவே, மாதத்திற்கு 50,000 ரூபாய்க்கு மேல் வாடகை செலுத்தினால், வெறுமனே வாடகையை செலுத்துவது மட்டும் போதாது என்பதை புதிய விதிகள் தெளிவுபடுத்துகின்றன. இந்த புதிய வரி மற்றும் வாடகை விதிகள் தெரியாமல் இருந்தால், நீங்கள் அபராதம், வட்டி மற்றும் சட்ட நடவடிக்கைகளை எதிர்கொள்ள நேரிடும்.
50,000 ரூபாய்க்கு மேல் வாடகை செலுத்தினால், ஆண்டுக்கு ஒருமுறை வரி பிடித்தம் (TDS) கட்டாயம். வருமான வரிச் சட்டம், பிரிவு 194-IB இன் படி, எந்தவொரு நபரோ, வேலை செய்பவரோ, தொழில் செய்பவரோ அல்லது எந்த வியாபாரத்திலும் ஈடுபடாதவரோ மாதத்திற்கு 50,000 ரூபாய்க்கு மேல் வாடகை செலுத்தினால், 2% TDS பிடித்தம் செய்ய வேண்டும். இந்த பிடித்தம் ஆண்டுக்கு ஒருமுறை, மார்ச் மாதத்திலோ அல்லது வாடகை ஒப்பந்தம் முடியும் மாதத்திலோ, எது முந்தையதோ அப்போது செய்யப்பட வேண்டும்.
பிரிவு 194-IB இன் படி, முந்தைய நிதியாண்டில் வியாபாரத்தில் ரூ.1 கோடிக்கு மிகாமலும், தொழிலில் ரூ.50 லட்சத்திற்கு மிகாமலும் வருவாய் அல்லது மொத்த ரசீது பெற்ற தனிநபர்கள் மற்றும் இந்து கூட்டுக் குடும்பங்கள் (HUF), நிலம் அல்லது கட்டிடம் அல்லது இரண்டையும் பயன்படுத்துவதற்கான வாடகை செலுத்துவதில் இருந்து வரியைப் பிடித்தம் செய்ய வேண்டும். மாதத்திற்கு அல்லது மாதத்தின் ஒரு பகுதிக்கு 50,000 ரூபாய்க்கு மேல் வாடகை செலுத்தப்பட்டால் அல்லது செலுத்தப்பட வேண்டியிருந்தால், வரி 2% விகிதத்தில் பிடித்தம் செய்யப்படும்.
குத்தகைதாரர் பின்னர் படிவம் 26QC ஐ நிரப்பி, படிவம் 16C ஐ வீட்டு உரிமையாளரிடம் சமர்ப்பிக்க வேண்டும். பலர் இந்த விதியை புறக்கணிக்கிறார்கள். இது நிறுவனங்களுக்கு மட்டுமே பொருந்தும் என்று நினைத்து, பின்னர் வரித் துறையிடமிருந்து தாமதக் கட்டணங்களுடன் நோட்டீஸ்களைப் பெறுகிறார்கள். இந்த விதிகளை மீறினால், ஒரு நாளைக்கு ரூ. 200 தாமதக் கட்டணம், TDS பிடித்தம் செய்யாததற்கு 1% வட்டி மற்றும் அதைச் செலுத்தாததற்கு 1.5% வட்டி, மற்றும் ரூ. 10,000 முதல் ரூ. 1 லட்சம் வரை அபராதம் விதிக்கப்படும்.
சில தீவிரமான சந்தர்ப்பங்களில், மூன்று மாதங்கள் முதல் ஏழு ஆண்டுகள் வரை சிறைத்தண்டனையும் விதிக்கப்படலாம். இந்த TDS விதிகள் அவசியமானவை. ஏனெனில் அரசு சொத்து மற்றும் வாடகை பரிவர்த்தனைகளில் வெளிப்படைத்தன்மையை அதிகரிக்க விரும்புகிறது. ஆனால் இது TDS பற்றி மட்டுமல்ல, ஒட்டுமொத்த வாடகை அமைப்பும் மாறுகிறது. நகரமயமாக்கல் அதிகரிப்பு மற்றும் வாடகை சந்தையில் நிலவும் குழப்பம் ஆகியவற்றைக் கருத்தில் கொண்டு, அரசு இந்த விதிமுறையைச் செயல்படுத்தியுள்ளது. இது வாடகை செயல்முறையை வெளிப்படையாகவும், பாதுகாப்பாகவும், முறையாகவும் மாற்றுவதை நோக்கமாகக் கொண்டுள்ளது. இந்த விதிகள் ஒவ்வொரு குத்தகைதாரரையும் வீட்டு உரிமையாளரையும் நேரடியாகப் பாதிக்கும்.