“கட்-ஆஃப் கொஞ்சம் குறைஞ்சாலும் பரவாயில்லை, அண்ணா யுனிவர்சிட்டிக்கு அடுத்து எனக்கு SSN கிடைச்சா போதும்” என்று தவமிருக்கும் ஆயிரக்கணக்கான பொறியியல் மாணவர்களுக்குத் தலையில் இடியிறங்குவது போல ஒரு செய்தி வெளியாகியுள்ளது.
தமிழ்நாட்டின் டாப்-1 தனியார் பொறியியல் கல்லூரியான சென்னை SSN கல்லூரி, வரும் கல்வி ஆண்டு முதல் மாணவர் சேர்க்கையை நிறுத்தப்போவதாகத் தகவல்கள் கசிந்துள்ளன.
இது பொறியியல் கலந்தாய்வுக்கு (TNEA) தயாராகும் மாணவர்கள் மற்றும் பெற்றோர்கள் மத்தியில் பெரும் குழப்பத்தையும், அதிர்ச்சியையும் ஏற்படுத்தியுள்ளது.
என்ன நடக்கிறது?
சிவ நாடார் அறக்கட்டளையின் கீழ் இயங்கி வரும் SSN பொறியியல் கல்லூரி, அண்ணா பல்கலைக்கழகத்தின் இணைவு பெற்ற (Affiliated) கல்லூரியாகச் செயல்பட்டு வருகிறது. இங்குள்ள இடங்களில் 65% இடங்கள் அண்ணா பல்கலைக்கழகப் பொதுக் கலந்தாய்வு (TNEA) மூலமாகவும், மீதமுள்ள இடங்கள் நிர்வாக ஒதுக்கீட்டிலும் (Management Quota) நிரப்பப்படுகின்றன.
இந்நிலையில், வரும் 2025-26 கல்வி ஆண்டு முதல், SSN பொறியியல் கல்லூரியில் பி.இ (B.E), பி.டெக் (B.Tech) படிப்புகளுக்குப் புதிதாக மாணவர் சேர்க்கை நடைபெறாது என்று கூறப்படுகிறது.
காரணம் என்ன?
இதற்குப் பின்னணியில் இருக்கும் முக்கியக் காரணம் ‘சிவ நாடார்ப் பல்கலைக்கழகம்’ (Shiv Nadar University Chennai).
SSN நிர்வாகம், கடந்த சில ஆண்டுகளுக்கு முன்பு சென்னையில் சிவ நாடார் என்ற பெயரில் தனிப் பல்கலைக்கழகத்தைத் தொடங்கியது. தற்போது, அண்ணா பல்கலைக்கழகத்தின் கட்டுப்பாட்டில் இயங்கும் SSN கல்லூரியை, முழுமையாக இந்தத் தனியார் பல்கலைக்கழகத்துடன் இணைக்கத் திட்டமிட்டுள்ளதாகத் தெரிகிறது.
அதாவது, இனி ‘SSN கல்லூரி‘ என்ற பெயரில் தனியாகக் கல்லூரி இயங்காது; அது ‘சிவ நாடார் பல்கலைக்கழகத்தின்’ ஒரு பகுதியாக மாறிவிடும்.
மாணவர்களுக்கு என்ன பாதிப்பு?
இதுதான் இப்போதைய ஹாட் டாபிக்.
- கவுன்சிலிங் கட்: SSN கல்லூரி தனியார் பல்கலைக்கழகமாக மாறிவிட்டால், அண்ணா பல்கலைக்கழகக் கலந்தாய்வின் (TNEA) கீழ் வராது. இதனால், அரசு நிர்ணயித்த குறைவான கட்டணத்தில், மெரிட் அடிப்படையில் SSN-ல் சேரும் வாய்ப்பு ஏழை மற்றும் நடுத்தர மாணவர்களுக்குப் பறிபோகும்.
- நுழைவுத் தேர்வு: இனி அங்குச் சேர வேண்டும் என்றால், அந்தப் பல்கலைக்கழகம் நடத்தும் தனியான நுழைவுத் தேர்வில் (SNUCCEE) தேர்ச்சி பெற வேண்டும்.
- கட்டணம் உயர்வு: தனியார் பல்கலைக்கழகமாக மாறும்போது, கல்விக் கட்டணம் பல மடங்கு உயர வாய்ப்புள்ளது.
நிர்வாகம் சொல்வது என்ன?
இதுகுறித்து அதிகாரப்பூர்வ அறிவிப்பு இன்னும் முழுமையாக வெளியாகவில்லை என்றாலும், நிர்வாகத் தரப்பில், “ஏற்கனவே படிக்கும் மாணவர்களுக்கு எந்தப் பாதிப்பும் இருக்காது. ஆனால், அடுத்த ஆண்டு முதல் புதிய அட்மிஷன் நடைமுறைகள் மாறும்” என்று சூசகமாகத் தெரிவித்துள்ளனர்.
அண்ணா பல்கலைக்கழகத்திற்கு இணையாகக் கட்டமைப்பும், தரமும் கொண்ட ஒரே தனியார் கல்லூரி SSN தான். கிராமப்புற மாணவர்கள் பலரின் ‘டாப் சாய்ஸ்’ ஆக இருக்கும் இந்தக் கல்லூரி, கவுன்சிலிங்கில் இருந்து விலகினால், அது தமிழக மாணவர்களுக்குப் பேரிழப்புதான்!