“ஐபிபிஎஸ் (IBPS), எஸ்பிஐ (SBI)னு எழுதி எழுதி சலிச்சுப் போச்சா? விவசாயம் மற்றும் கிராமப்புற வளர்ச்சிக்கான வங்கி (NABARD) பக்கம் கொஞ்சம் கவனத்தைத் திருப்புங்க பாஸ்!” வங்கித் தேர்வுக்குத் தயாராகும் பட்டதாரி இளைஞர்களுக்கு ஒரு சூப்பர் அறிவிப்பு வெளியாகியுள்ளது.
மத்திய அரசின் கீழ் செயல்படும் நபார்டு வங்கி, நாடு முழுவதும் காலியாக உள்ள 162 ‘டெவலப்மென்ட் அசிஸ்டென்ட்’ (Development Assistant) பணியிடங்களை நிரப்புவதற்கான அதிகாரப்பூர்வ அறிவிப்பை வெளியிட்டுள்ளது. இது ஒரு கிளரிக்கல் கேடர் (Clerical Cadre) வேலை என்றாலும், சம்பளம் மற்றும் சலுகைகளில் இது ஒரு ‘ராயல்’ வேலை!
காலியிடங்கள் என்ன? மொத்தம் உள்ள 162 இடங்களில் இரண்டு வகைகள் உள்ளன:
- Development Assistant: பொதுவான பணியிடங்கள்.
- Development Assistant (Hindi): இந்தி மொழி தெரிந்தவர்களுக்கான சிறப்புப் பணியிடங்கள்.
யாரெல்லாம் விண்ணப்பிக்கலாம்?
- கல்வித் தகுதி: அங்கீகரிக்கப்பட்ட பல்கலைக்கழகத்தில் ஏதேனும் ஒரு இளங்கலை பட்டம் (Degree) முடித்திருக்க வேண்டும். முக்கியமாக, டிகிரியில் குறைந்தபட்சம் 50% மதிப்பெண்கள் எடுத்திருப்பது அவசியம். (எஸ்சி/எஸ்டி, மாற்றுத்திறனாளிகள் பாஸ் செய்திருந்தாலே போதும்).
- வயது வரம்பு: விண்ணப்பதாரர்கள் 21 வயது பூர்த்தியடைந்தவராகவும், 35 வயதுக்கு மிகாமலும் இருக்க வேண்டும். (அரசு விதிகளின்படி வயதுத் தளர்வு உண்டு).
சம்பளம் எவ்வளவு? தேர்வு செய்யப்படும் நபர்களுக்கு, தற்போதைய நிலவரப்படி மாதம் சுமார் ரூ.32,000 முதல் ரூ.35,000 வரை ஆரம்பச் சம்பளமாகக் கிடைக்கும். இதுபோக வீட்டு வாடகைப்படி, மருத்துவச் சலுகைகள் என நபார்டு வங்கியின் பிரத்யேக சலுகைகள் தனி!
தேர்வு முறை: வழக்கமான வங்கித் தேர்வுகள் போலவே இரண்டு கட்டங்கள்:
- முதல் நிலைத் தேர்வு (Prelims): இது ஒரு ஸ்கிரீனிங் டெஸ்ட்.
- முதன்மைத் தேர்வு (Mains): இதில் எடுக்கும் மதிப்பெண்கள் தான் வேலைக்கு அடிப்படை. நேர்காணல் (Interview) கிடையாது என்பது மகிழ்ச்சியான செய்தி!
விண்ணப்பிப்பது எப்படி? விருப்பமுள்ளவர்கள் நபார்டு வங்கியின் அதிகாரப்பூர்வ இணையதளத்தில் (www.nabard.org) ஆன்லைன் மூலம் விண்ணப்பிக்க வேண்டும்.
- விண்ணப்பக் கட்டணம்: பொது மற்றும் ஓபிசி பிரிவினருக்கு ரூ.450. (எஸ்சி/எஸ்டி பிரிவினருக்கு ரூ.50 மட்டும்).
வங்கி வேலைனு சொன்னாலே எல்லாரும் எஸ்பிஐ பக்கம் தான் ஓடுவாங்க. ஆனா, நபார்டு வங்கில வேலை பாக்குறது ஒரு தனி கெத்து. வேலைப்பளு (Work pressure) மத்த கமர்ஷியல் பேங்க்ஸை விட இங்க குறைவுனு சொல்லுவாங்க. அதுமட்டுமில்லாம, கிராமப்புற வளர்ச்சித் திட்டங்கள்ல நேரடியா வேலை பார்க்குற திருப்தி கிடைக்கும். 162 இடங்கள் தானேனு அசால்ட்டா இருக்காதீங்க. போட்டியாளர்கள் குறைவா இருக்க வாய்ப்பிருக்கு. மெயின்ஸ் எக்ஸாம்ல ‘டிஸ்கிரிப்டிவ் இங்கிலீஷ்’ (Descriptive English) பேப்பர் இருக்கும், அதுல கொஞ்சம் கவனம் செலுத்துனா வேலையைத் தட்டித் தூக்கிடலாம்!