குளிர்காலத்தில் அதிகம் கிடைக்கக்கூடியது மொச்சை. இதில் உள்ள கரையாத நார்ச்சத்து, சிறந்த மலமிளக்கியாக செயல்படுவதால் குளிர்காலத்தில் ஏற்படக்கூடிய மலச்சிக்கலைக் குறைக்கும்.
மேலும் நம் உடலுக்கு தேவையான புரதம், நார்ச்சத்துகள், மினரல்ஸ் போன்றவற்றை அதிகமாக கொண்டிருக்கும் இந்த மங்களூர் மொச்சை கிரேவி, ஒரு கர்நாடகா ஸ்பெஷல்.
என்ன தேவை?
உரித்த ஃப்ரஷ் மொச்சை – ஒரு கப்
சின்ன வெங்காயம் – 15
பெரிய வெங்காயம் – ஒன்று
தேங்காய்த் துருவல் – கால் கப்
கசகசா – ஒரு டீஸ்பூன்
கறிவேப்பிலை – சிறிதளவு
உப்பு, எண்ணெய் – தேவையான அளவு
வறுத்து அரைக்க…
முழு மல்லி (தனியா), சீரகம் – தலா ஒரு டீஸ்பூன்
காய்ந்த மிளகாய் – 6
மிளகு – கால் டீஸ்பூன்
தேங்காய்த் துருவல் – ஒரு டீஸ்பூன்
எப்படிச் செய்வது?
வறுத்து அரைக்க வேண்டியதை விழுதாக அரைத்துக்கொள்ளவும். தேவையானவற்றில் கொடுத்துள்ள தேங்காய்த் துருவல் மற்றும் கசகசாவை மிக்ஸியில் அரைத்து தனியே வைக்கவும்.
பெரிய வெங்காயத்தை தோலுடன் தணலில் காட்டி, தோல் கருகும் வரை சுட்டெடுக்கவும். பிறகு, தோலை நீக்கிவிட்டு மிக்ஸியில் சேர்த்து மையாக அரைக்கவும்.
குக்கரில் எண்ணெய் விட்டு சூடாக்கி நறுக்கிய சின்ன வெங்காயம், கறிவேப்பிலைச் சேர்த்து தாளிக்கவும். இத்துடன் வறுத்து அரைத்த விழுது, வெங்காய விழுது, மொச்சை சேர்த்து பச்சை வாசனை போக வதக்கவும்.
பிறகு, தேவையான உப்பு மற்றும் தண்ணீர் சேர்த்து கொதிக்கவிடவும். கலவை ஒரு கொதி வந்ததும் மூடி, 2 விசில் வரும் வரை வேகவிட்டு இறக்கவும். பிரஷர் நீங்கியதும் மூடியைத் திறந்து அரைத்த தேங்காய்-கசகசா விழுதைச் சேர்த்துக் கிளறி கொதி வந்ததும் இறக்கவும்.
