கார்த்திகை தீபத் திருநாள் முடிந்து, அதன் தெய்வீக ஒளி இன்னும் நம் கண்களை விட்டு அகலாத நிலையில், இன்று (டிசம்பர் 4, வியாழக்கிழமை) வருகிறது கார்த்திகை பௌர்ணமி.
சிவபெருமானுக்கு உகந்த கார்த்திகை மாதத்தில் வரும் இந்த முழு நிலவு நாள், ஆன்மீக ரீதியாக மிகவும் சக்தி வாய்ந்தது. இந்த நாளின் சிறப்புகள் என்ன? இன்று என்ன வழிபட்டால் என்ன பலன் கிடைக்கும்? இதோ முழு விவரம்.
திருவண்ணாமலை கிரிவலம்: கார்த்திகை பௌர்ணமி என்றாலே நினைவுக்கு வருவது திருவண்ணாமலை தான். நேற்று மகா தீபம் ஏற்றப்பட்ட நிலையில், இன்று பௌர்ணமி கிரிவலம் வருவது மிகவும் விசேஷம்.
- ‘மலை’யே சிவனாகக் காட்சி தரும் அண்ணாமலையை இன்று வலம் வந்தால், நம் பாவங்கள் அனைத்தும் தீயில் இட்ட பஞ்சு போலப் பொசுங்கிவிடும் என்பது நம்பிக்கை.
- சித்தர்கள் சூட்சும வடிவில் கிரிவலம் வரும் நாள் இது என்பதால், லட்சக்கணக்கான பக்தர்கள் இன்று கிரிவலம் வருவார்கள்.
மும்மூர்த்திகள் அருளும் ‘தத்தாத்ரேய ஜெயந்தி’: இன்றைய நாளின் மற்றொரு மிக முக்கியச் சிறப்பு ‘தத்தாத்ரேய ஜெயந்தி’. பிரம்மா, விஷ்ணு, சிவன் ஆகிய மரம் மூவரும் ஒன்றிணைந்த வடிவமே தத்தாத்ரேயர். குருமார்களுக்கெல்லாம் குருவாகப் போற்றப்படுபவர் இவரே.
- வட மாநிலங்களில் இந்த பௌர்ணமியை ‘தத்த பூர்ணிமா’ என்று கொண்டாடுவார்கள். குரு அருள் கிடைக்க விரும்புபவர்கள் இன்று இவரை வணங்கலாம்.
32 மடங்கு பலன்(Battisi Purnima): ஆன்மீக சாஸ்திரங்களின்படி, இந்த பௌர்ணமியை ‘பட்டிசி பூர்ணிமா’ என்றும் அழைப்பார்கள். அதாவது, இந்த நாளில் நாம் செய்யும் ஒரு தானத்திற்கு 32 மடங்கு புண்ணியம் கிடைக்கும் என்பது நம்பிக்கை.
- எனவே, இன்று உங்களால் முடிந்த அன்னதானம் அல்லது ஏழைகளுக்கு ஆடைகள் தானம் செய்வது, உங்கள் சந்ததிக்கே புண்ணியம் சேர்க்கும்.
சந்திர வழிபாடு: ஜாதகத்தில் சந்திர திசை அல்லது மனக்குழப்பம் உள்ளவர்கள், இன்று இரவு வானில் முழு நிலவைப் பார்த்து தரிசனம் செய்வது மனதிற்குத் தெளிவைத் தரும். சந்திரனின் ஒளிக்கதிர்களில் இன்று நோய் தீர்க்கும் சக்தி அதிகமாக இருக்கும்.
இன்று என்ன செய்ய வேண்டும்?
- கார்த்திகை மாதம் என்பதால், மாலையில் வீட்டு வாசலில் அகல் விளக்கேற்றி வைப்பது சிறப்பு.
- சத்யநாராயண பூஜை செய்வதற்கு இது உகந்த நாள். இதனால் குடும்பத்தில் உள்ள பணக்கஷ்டம் நீங்கி, சுபிட்சம் உண்டாகும்.
- “ஓம் நமசிவாய” அல்லது “ஓம் நமோ நாராயணாய” மந்திரத்தை மனதிற்குள் ஜபிப்பது சிறப்பு.
கார்த்திகை மாதத்தின் நிறைவுப் பகுதியில் வரும் இந்த பௌர்ணமி, இறைவனின் அருளைப் பெற நமக்குக் கிடைத்த ஒரு பொக்கிஷ நாள். அதைத் தவறவிடாமல் பயன்படுத்திப் பயன்பெறுவோம்!