மின்னம்பலம் மின்னம்பலம்
காலை 7, செவ்வாய், 19 நவ 2019

பச்சையப்பன் கல்லூரி முறைகேடு: லஞ்ச ஒழிப்புத் துறை விசாரிக்க உத்தரவு!

பச்சையப்பன் கல்லூரி முறைகேடு: லஞ்ச ஒழிப்புத் துறை விசாரிக்க உத்தரவு!

பச்சையப்பன் கல்லூரி முதல்வர் தேர்வில் நடந்த முறைகேடுகள் குறித்து லஞ்ச ஒழிப்புத் துறை விசாரிக்க சென்னை உயர் நீதிமன்றம் உத்தரவிட்டுள்ளது.

பச்சையப்பன் அறக்கட்டளை சார்பில் சென்னையில் ஆறு கல்லூரிகள் நடத்தப்பட்டு வருகின்றன. இதில் பச்சையப்பன் ஆண்கள் கல்லூரியின் முதல்வர் காளிராஜ் கடந்த ஆண்டு ஓய்வு பெற்றார். அவருக்குப் பிறகு என்.சேட்டு என்பவர் கல்லூரியின் முதல்வராக நியமிக்கப்பட்டார். இதை எதிர்த்து கல்லூரி பேராசிரியர்கள் நந்தினி உட்பட ஏழு பேர் உயர் நீதிமன்றத்தில் வழக்கு தொடர்ந்தனர். இந்த வழக்கை நீதிபதி எஸ்.எம்.சுப்பிரமணியம் விசாரித்தார்.

முதல்வர் தேர்வு நடைமுறைகளில் வெளிப்படைத் தன்மை பின்பற்றப்படவில்லை. தமிழ்நாடு தனியார் கல்லூரிகள் ஒழுங்குமுறை விதிகள் பின்பற்றப்படவில்லை என மனுதாரர் தரப்பில் குற்றம்சாட்டப்பட்டது. அதேபோல, மனுதாரர்கள் தேர்வு நடைமுறைகளில் பங்கேற்காததால் அவர்களுக்கு வழக்கு தொடர அதிகாரம் இல்லை என்றும் தேர்வு நடைமுறைகள் முறையான விதிகளைப் பின்பற்றி நடைபெற்றதாகப் பச்சையப்பன் அறக்கட்டளை தேர்வுக் குழு தரப்பில் தெரிவிக்கப்பட்டது.

பல்கலைக்கழக மானிய குழு விதிகளைப் பின்பற்றாமல் தேர்வுக் குழு அமைக்கப்பட்டதாகவும், பல்வேறு விதி மீறல்கள் நடந்துள்ளதாகவும் பச்சையப்பன் கல்லூரியின் தற்காலிக நிர்வாகி உயர் நீதிமன்ற ஓய்வு பெற்ற நீதிபதி சண்முகம் தரப்பில் தெரிவிக்கப்பட்டது. இந்த வாதத்தை ஏற்றுக்கொண்ட நீதிபதி, சேட்டுவின் நியமனத்தை ரத்து செய்து உத்தரவிட்டார்.

கல்லூரி முதல்வர் பதவிக்கு விதிகளைப் பின்பற்றி மீண்டும் தேர்வு நடைமுறைகளை மேற்கொள்ளும்படி, இடைக்கால நிர்வாகிக்கு உத்தரவிட்ட நீதிபதி, தேர்வு நடைமுறைகளை விரைந்து முடிக்கவும் அறிவுறுத்தினார். முதல்வர் தேர்வு நடைமுறையில் முறைகேடுகள் குறித்து மனுதாரர்கள் அளித்த புகார்களை லஞ்ச ஒழிப்புத் துறைக்கு அனுப்பிவைக்க இடைக்கால நிர்வாகிக்கு உத்தரவிட்ட நீதிபதி, இந்தப் புகார் மீது லஞ்ச ஒழிப்புத் துறை விசாரணை செய்து தகுந்த நடவடிக்கை எடுக்க வேண்டும் என உத்தரவிட்டார்.

மேலும், ஊழல் நடவடிக்கைகள் சமுதாயத்தில் புற்றுநோய் போல பரவுகிறது எனவும், நேர்மையில்லாமல் நியமிக்கப்பட்ட ஒருவர், நேர்மையாகச் செயல்படுவார் என எதிர்பார்க்க முடியாது எனவும் நீதிபதி குறிப்பிட்டுள்ளார். உன்னத நோக்கத்துக்காகத் தொடங்கப்பட்ட இந்தக் கல்லூரிக்குச் சட்ட விரோதமாக நியமிக்கப்பட்டவர்கள் பாவம் இழைத்து வருகின்றனர் என நீதிபதி வேதனை தெரிவித்தார்.

புதன், 24 ஏப் 2019

chevronLeft iconமுந்தையது
அடுத்ததுchevronRight icon