மின்னம்பலம் மின்னம்பலம்
காலை 7, செவ்வாய், 12 நவ 2019

அதிமுக - பாமக: முடிந்தது கூட்டணி டீல்!

அதிமுக - பாமக: முடிந்தது கூட்டணி டீல்!

திமுக, அதிமுகவுடன் கூட்டணி இல்லை என்று அறிவித்து, கடந்த சட்டமன்றத் தேர்தலைத் தனித்து எதிர்கொண்ட பாமகவின் மக்களவைத் தேர்தல் நிலைப்பாடு என்னவாக இருக்கப் போகிறது என்ற எதிர்பார்ப்பு எழுந்த வேளையில், சட்டமன்றத் தேர்தலுக்கு ஒரு நிலைப்பாடும் மக்களவைத் தேர்தலுக்கு வேறு நிலைப்பாடும் எடுப்போம் என்று கூறி கூட்டணி அமைப்போம் என்பதை மறைமுகமாகத் தெரிவித்திருந்தார் அன்புமணி.

அதற்கேற்றார்போல கடந்த டிசம்பர் மாதம் கோவையில் நடந்த பாமக பொதுக்குழுவில் கூட்டணி குறித்து முடிவெடுக்கும் அதிகாரத்தை மருத்துவர் ராமதாஸுக்கு வழங்குவதாகத் தீர்மானம் இயற்றினார்கள். இதன்மூலம் பாமக கூட்டணி அமைத்து தேர்தலைச் சந்திப்பது உறுதியானது.

பாமக, திமுகவுடன் கூட்டணி அமைக்குமா அல்லது அதிமுகவுடன் கூட்டணி அமைக்குமா என்னும் விவாதம் கடந்த இரண்டு மாதங்களாகவே நீடித்து வந்தது. அதுபடியே திமுக, அதிமுக என இரு கட்சிகளுடனும் பாமக தரப்பிலிருந்து தொடர்ந்து பேச்சுவார்த்தைகள் நடத்தப்பட்டன. திமுக கூட்டணிக்குள் பாமகவைக் கொண்டுவர துரைமுருகன் முயற்சி எடுத்ததாகவும், இதற்கு ஸ்டாலின் சரியாக ரெஸ்பான்ஸ் செய்யவில்லை என்றும் ஒரு தகவல் வெளியானது.

இதற்கிடையே பொதுக்குழுவில் கலந்துகொள்ள கோவை வந்திருந்தபோதே அமைச்சர் வேலுமணியின் அண்ணன் அன்பரசன் ராமதாஸைச் சந்தித்து கூட்டணி குறித்து பேசியிருக்கிறார். பின்னர் அதிமுகவில் கூட்டணி பேச்சுவார்த்தைக் குழு அமைக்கப்பட்டவுடன், அதிகாரபூர்வப் பேச்சுவார்த்தைகள் தொடங்கப்பட்டது. மேலும் முதல்வருக்கு நெருக்கமான ஆத்தூர் இளங்கோவனும் ராமதாஸைச் சந்தித்து கூட்டணி தொடர்பாக சில விஷயங்களைத் தெரிவித்திருக்கிறார்.

இது ஒருபுறமிருக்க சமீபத்தில் முன்னாள் அமைச்சர் கே.பி.முனுசாமி, தைலாபுரம் தோட்டத்துக்குச் சென்று ராமதாஸை நேரில் சந்தித்துப் பேசியிருக்கிறார். கடந்த மக்களவைத் தேர்தலில் தர்மபுரி தொகுதியில் பாமகவின் அன்புமணி வெற்றிபெற்றதன் காரணமாகவே, அமைச்சர் பதவியிலிருந்து முனுசாமியை ஜெயலலிதா நீக்கினார். சந்திப்பில் இதுகுறித்து இருவரும் மனம் திறந்து பேசியுள்ளனர். ‘தர்மபுரியில நீங்க ஜெயிச்சதாலதான் என்னோட மந்திரி பதவியே போச்சு. இப்ப திமுகவைத் தோக்கடிக்கணும்னா நாம ரெண்டு கட்சிகளும் சேரணும்னு’ ராமதாஸ்கிட்ட உருக்கமாகப் பேசினாராம் முனுசாமி.

இந்த நிலையில் தற்போது பாமக ‘கேட்ட அனைத்துத் தேவைகளுக்கும்’ அதிமுக தரப்பு பச்சைக் கொடி காட்டிவிட்டதால், கிட்டத்தட்ட கூட்டணி டீல் உறுதி செய்யப்பட்டுவிட்டதாகவே அதிமுக வட்டாரத்தில் கூறுகிறார்கள். புதுச்சேரியையும் சேர்த்து ஆறு மக்களவைத் தொகுதிகள் + வரும் ஜூனில் காலியாகவுள்ள மாநிலங்களவை உறுப்பினர் பதவிகளில் ஒன்று என அந்த டீலில் ஒப்பந்தமாகியிருக்கிறதாம். இதுகுறித்து அதிகாரபூர்வ அறிவிப்பு விரைவில் வெளியிடப்படலாம் என்றும் அதிமுக வட்டாரங்கள் தெரிவிக்கின்றன. இதுதொடர்பாக பாமக தரப்பில் கேட்டால், கூட்டணி தொடர்பாக மூச்சுவிட கூட மறுக்கிறார்கள்.

புதன், 13 பிப் 2019

chevronLeft iconமுந்தையது
அடுத்ததுchevronRight icon