மின்னம்பலம் மின்னம்பலம்
மாலை 7, செவ்வாய், 21 ஜன 2020

சிறப்புப் பத்தி: எல்லைப் பாதுகாப்பும் காலனியமும்

சிறப்புப் பத்தி: எல்லைப் பாதுகாப்பும் காலனியமும்

முரளி சண்முகவேலன்

லண்டனிலிருந்து முரளி சண்முகவேலன் எழுதும் தொடர்

காலனியக் கருத்தியல்கள் ஊடகங்களில் கலாச்சாரப் பண்டங்களாக நுகரப்பட்டு வருகிறது என்று போன வாரம் எழுதி முடித்திருந்தேன்.

ஆஸ்திரேலியா, பிரிட்டன், அமெரிக்கா, கனடா, நியூசிலாந்து நாடுகளைச் சேர்ந்த ஊடகங்களில் ‘பார்டர் செக்யுரிட்டி’ (எல்லைப் பாதுகாப்பு / border security), ‘நத்திங் டு டெக்ளேர்’ (மடியில் ஒன்றுமில்லை / nothing to declare) என்ற தலைப்புகளில் ஒளிபரப்பப்படும் தொலைக்காட்சி நிகழ்ச்சிகள் மிகப் பிரசித்தம். இந்த நிகழ்ச்சிகளின் தொடர்ந்து வெளிப்படும் ஒரு பொதுவான கரு, வளரும் நாடுகளிலிருந்து பிரயாணம் செய்து மேற்குலகுக்கு வரும் நபர்களின் ‘உண்மையான’ நோக்கத்தைக் கண்டறிவதாகும். அதாவது வெள்ளையரல்லாத பிரயாணிகள் வெள்ளை நாடுகளில் குடியேறுவதைத் தடுப்பது பற்றிய ரியலிட்டி ஷோ நிகழ்ச்சி.

இம்மாதிரியான நிகழ்ச்சிகளின் (ஊடக) அரசியல் நோக்கமானது வெள்ளையரல்லாத நாடுகளிலிருந்து வரும் பிரயாணிகளின் வருகை குறித்த நோக்கங்களை சந்தேகத்துக்கு உட்படுத்தி, அன்னார்களின் சுயமரியாதையையும் கேள்விக்குள்ளாக்கி, அவர்களைத் திரும்பி அனுப்புவது பற்றியதாகும். உள்ளபடியே, மேற்குலகிற்கு வரும் சிலர் தங்களது வருகைகளுக்குப் பொய்க் காரணங்கள் சொன்னாலும், அவர்களை நடத்தும் விதம் மிகவும் கேள்விக்குரியது. இந்நிகழ்ச்சிகளின் பிரபலமே வெள்ளை உலகம் மற்றவர்களை நடத்தும் விதத்திலும், பொய்ப் பிரயாணிகளைக் கண்டறியும் முறையிலும், வெள்ளை அதிகாரத்தை உயர்த்திப் பிடிப்பதிலும் உள்ளது.

‘புனிதமான’ வெள்ளை எல்லை

சுருக்கமாகச் சொன்னால் பார்டர் செக்யுரிட்டி நிகழ்ச்சியின் கருவானது வெள்ளை இனத்தைச் சாராதவர்கள் மேற்குலகிற்கு வரும் போது அவர்களின் வருகையை வெள்ளை அரசாங்கம் சந்தேகிப்பது பற்றியதாகும். ஏனெனில், ‘வெள்ளை எல்லை புனிதமானது’.

பார்டர் செக்யுரிட்டி (அ) நத்திங் டு டிக்ளேர் தொலைக்காட்சி நிகழ்ச்சிகள் மேற்கத்திய நாடுகளில் மிகவும் பிரசித்தி பெற்றவை. ஆனால் இந்தியா போன்ற வளரும் நாடுகளில் இந்நிகழ்ச்சிகள் ஒளிபரப்பப்படுவது கிடையாது என்பது யதேச்சையானதல்ல (ஆனால் யூட்யுபில் காணக் கிடைக்கிறது). உலகமயமாக்கல் என்னும் குடையின் கீழே பல்வேறு மேற்கத்தியத் தொலைக்காட்சிகளும் ஹாலிவுட் திரைப்படங்களும் இந்தியா போன்ற வளரும் நாடுகளில் ஒளிபரப்பப்பட்டு வரும் சூழலில் இந்த நிகழ்ச்சி மட்டும் ஏன் ஒளிபரப்பப்படாமல் இருக்கிறது? காரணம், இந்நிகழ்ச்சி வெள்ளையரல்லாதோரின் சுயமரியாதையை எள்ளல் செய்யும் ஒரு காலனியத் தொலைக்காட்சி நிகழ்ச்சி.

அதே சமயம், இந்நிகழ்ச்சி பிரிட்டனில் தினசரி ஒளிபரப்பப்படுகிறது. அதாவது ‘பார்டர் செக்யுரிட்டி’ பிரிட்டன் வீடுகளில் ஒரு (ரியலிட்டி) டிவி சீரியல். இந்நிகழ்ச்சிகள் வெள்ளைக் காலனியத்தின் பெருமிதக் கொடியைப் பறக்கவிட்டு, கறுப்பர்கள் அல்லது வெள்ளையரல்லாதோர்களை இரண்டாந்தரக் குடிகளாகப் பார்வையாளர்கள் முன் நிறுத்துகிறது.

வளரும் நாடுகளிலிருந்து வரும் மக்கள் அல்லது வெள்ளை இனத்தவரல்லாத குடிகள், மேற்கு நாடுகளில் தங்கி விடுவார்களோ என்ற அச்சமே பார்டர் செக்யுரிட்டி போன்ற நிகழ்ச்சிகளின் கரு. இந்நிகழ்ச்சிகள் பூமியின் சில பகுதிகளை வெள்ளையாகப் பாதுகாக்கும் முயற்சியின் அடிப்படையில் இயங்குகிறது.

அது மட்டுமல்லாமல் வளரும் நாடுகளிலிருந்து மேற்குலகிற்கு வரும் பிரயாணிகள் போதைப் பொருட்கள், தடை செய்யப்பட்ட உணவுப் பொருட்களை உள்ளே ‘கடத்தி’ வந்துவிடுவார்களோ (ஆஸ்திரேலியாவில் இலவங்கப் பட்டை தடை செய்யப்பட்ட பதார்த்தம்!), அதனால் நம் மண்ணுக்கு பாதிப்பு விளைந்துவிடுமோ என்பதையும் படப்படப்புடன் ‘பார்டர் செக்யுரிட்டி’ ரியலிட்டி டிவி ஒளிபரப்புகிறது.

வெள்ளை நாடுகளில் எல்லை என்பது ஒரு தேசத்தின் இறையாண்மை சம்பந்தப்பட்டது மட்டுமல்ல. அது காலனியத்தின் வெளிப்பாடாகவே இருந்து வருகிறது என்றால் மிகையல்ல.

தேச எல்லைகளும் நாகரிகமும்

மனித சமுதாயத்தின் நாகரிகங்களுக்கும் வளர்ச்சிகளுக்கும் தேச எல்லை என்பது ஒரு முரணாகும். அறிவியலின் கூற்றுப்படி நாம் அனைவரும் கிழக்கு ஆப்பிரிக்காவில் தோன்றிய மனித குலத்தின் வழித்தோன்றல்களே. ஆக இன்று செழித்து வரும் மனித குலம் எல்லைகளுக்கு அப்பாற்பட்டது. எல்லை அரசியலுக்கு எதிரானது. எல்லைகள் மனித குலத்தின் நாகரிக வளர்ச்சிக்கு எதிரானவை. காலனிய ராச்சியங்களான பிரிட்டன், ஸ்பெயின், போர்ச்சுக்கல், பெல்ஜியம் போன்ற நாடுகள் பிற நிலங்களில் காலூன்றிய போது எல்லைகள் எதுவும் மதிக்கப்படவில்லை. ஐரோப்பியர்களின் ‘எல்லை’ மீறலால் நடந்த நிகழ்வே இன்றைய வட அமெரிக்கச் சமுதாயம். நமது தெற்காசிய நாடுகள்கூடக் காலனிய எல்லை மீறலின் உருவாக்கமே. இன்று உலகம் முழுவதும் உள்ள எல்லை அரசியலில் காலனியக் கருத்தியலின் நச்சு உள்ளது என்றால் மிகையல்ல. அதிலும் மேற்குலக ஊடகங்களின் இனவெறிப் பங்கினைக் குறைத்து மதிப்பிடுவதற்கில்லை.

ஆக இப்படிப்பட்ட நிகழ்ச்சிகள் ஒளிபரப்பாவதின் நோக்கம்தான் என்ன? மேற்கத்திய வெள்ளை நாடுகளின் விமான /கடல் எல்லைகளை, வளரும் நாடுகளிலிருந்து வரும் குடியேறிகளிடமிருந்து காக்க வேண்டும் என்று சீரியல் வாயிலாகச் சொல்லும் மேற்குலகின் ஊடக அரசியல் என்ன? அதை ஒரு தினசரி ஊடக நாடகமாக ஒளிபரப்புவதினால் என்ன பயன்?

அடுத்த வாரம் பார்க்கலாம்.

கட்டுரை 1: பிரிட்டனின் இளவரசர் திருமணம் சொல்லும் செய்தி என்ன?

கட்டுரை 2: விண்ட்ரஷின் குழந்தைகள் சொல்லும் பாடம் என்ன?

கட்டுரை 3: காலனியமும் சேவை நிறுவனங்களும்

கட்டுரை 4: காலனியத்துக்கு ஆதரவான சமகாலக் குரல்கள்

கட்டுரை 5: சாம் செல்வன்; டரினிடாட் தமிழர்

கட்டுரை 6: சிறப்புப் பத்தி: நிழல் உலக அறிவுஜீவி சிவானந்தன்

கட்டுரை 7: கலைஞரும் காலனியமும்

கட்டுரை 8: காலனியத்தின் வித்துக்களும் விளைவுகளும்!

கட்டுரையாளர் குறிப்பு: முரளி சண்முகவேலன், ஊடக மானுடவியலாளர். லண்டனில் உள்ள ஸ்கூல் ஆஃப் ஓரியண்டல் அண்ட் ஆப்பிரிக்கன் ஸ்டடீஸில், சாதி மற்றும் தகவல்தொடர்பு குறித்து ஆய்வு மேற்கொண்டிருப்பவர்.

(தொடரின் அடுத்த பகுதி வரும் புதன்கிழமை…)

.

வாசகர்களுக்கு ஒரு வேண்டுகோள்!

மின்னம்பலம் தமிழின் டிஜிட்டல் தினசரி இதழ் எந்தவித விருப்பு வெறுப்புகளுக்கும் இடம் கொடுக்காமல், ஊடக அறத்தின் துணை கொண்டு ஜனநாயகப் பயணம் மேற்கொண்டிருப்பதைத் தாங்கள் அறிவீர்கள்.

சாமானிய மக்களின் நலனுக்காக, ஒட்டுமொத்த நாட்டு நலனுக்காக மின்னம்பலம் வெளியிடும் செய்திகள், கட்டுரைகள், புலனாய்வுகளுக்குப் பின்னணியில் பலத்த உழைப்பும் நேர்மையும் இருக்கிறது. மின்னம்பலத்தின் இந்தச் சீரிய பயணம் பொருளாதாரப் பிரச்சினைகளால் பாதிக்கப்படாமல் இருக்க வாசகர்களின் ஆதரவைக் கோருகிறோம்.

மின்னம்பலத்தை நேசிக்கும் வாசகர்கள் சந்தா செலுத்துவது, நன்கொடை வழங்குவது போன்றவற்றின் மூலமாக எங்களுக்கு உதவலாம்.

மின்னம்பலத்துக்கு ஆதரவளியுங்கள், தோள் கொடுங்கள். தொடர்ந்து பயணிப்போம்!

சந்தா கட்டணத்தை உங்கள் (ஆண்ட்ராய்டு/ ஐ.போன்) செல்போனிலிருந்தே செலுத்துவதற்கான எளிய வழிமுறைகள் இதோ...

1. பின்வரும் ஏதாவது ஒரு UPI செயலியை (ஆப்) உங்கள் செல்போனில் பதிவிறக்கம் செய்யவும். அதன்பின் அந்தச் செயலியில் உள்ள உங்கள் மொபைல் கட்டணச் சேவை முகவரியைக் (Virtual Private Address) குறித்துக் கொள்ளுங்கள்.

பீம் (BHIM) Android / IOS

டெஸ் (TEZ) Android / IOS

போன்பே (PhonePe) Android / IOS

பேடிஎம் (Paytm) Android / IOS

2. பின்னர் கீழே உள்ள என்.மின்னம்பலம் வலைப் பக்கத்தை க்ளிக் செய்யுங்கள். அதில் கேட்கப்பட்டுள்ள விவரங்களைப் பதிவு செய்து, நீங்கள் விரும்பும் சந்தா தொகையைத் தேர்ந்தெடுக்கவும். பின்னர் உங்கள் மொபைல் கட்டணச் சேவை முகவரியை அதற்கான இடத்தில் உள்ளிட்டு, தொகையைச் செலுத்தலாம்.

en.minnambalam.com/subscribe.html

3. மீண்டும் உங்கள் செயலிக்குச் சென்று பணப் பரிவர்த்தனைக்கு ஒப்புதல் அளிக்கவும்.

.

சந்தேகங்கள் இருப்பின் தொடர்பு கொள்ள வாட்ஸ்அப் எண் +91 6380977477

புதன், 22 ஆக 2018

chevronLeft iconமுந்தையது
அடுத்ததுchevronRight icon