மின்னம்பலம் மின்னம்பலம்
காலை 7, வெள்ளி, 22 நவ 2019

தொலைத் தொடர்புத் துறை விரைவில் மேம்படும்!

தொலைத் தொடர்புத் துறை விரைவில் மேம்படும்!

வருவாய் இழப்பில் மூழ்கிக்கொண்டிருக்கும் இந்தியத் தொலைத் தொடர்புத் துறை விரைவில் இயல்பு நிலைக்குத் திரும்பி, நாட்டின் பொருளாதார வளர்ச்சிக்கு உதவிகரமாக இருக்கும் என்று மத்திய அரசு நம்பிக்கை தெரிவித்துள்ளது.

இந்தியத் தொலைத் தொடர்புத் துறையில் சமீப காலமாகவே கடுமையான போட்டி நிலவிவருகிறது. கட்டணக் குறைப்பை மேற்கொண்டு வாடிக்கையாளரைக் கவரும் முயற்சியில் வருவாய் இழப்பு இன்னும் அதிகரிக்கத் தொடங்கியுள்ளது. தொலைத் தொடர்பு ஒழுங்குமுறை ஆணையம் (டிராய்) வெளியிட்டுள்ள அறிக்கையின் படி, 2017ஆம் ஆண்டின் அக்டோபர் - டிசம்பர் காலாண்டில் இந்தியத் தொலைத் தொடர்புச் சேவை நிறுவனங்களின் நிகர வருவாய் 8.1 சதவிகிதச் சரிவுடன் ரூ.610 பில்லியனாகக் குறைந்துள்ளது. இதற்கு முந்தைய 2016ஆம் ஆண்டின் இதே காலகட்டத்தில் நிகர வருவாய் ரூ.665 பில்லியனாக இருந்தது என்பது குறிப்பிடத்தக்கது. இந்நிலையில் சரிவில் சென்று கொண்டிருக்கும் தொலைத் தொடர்புத் துறை விரைவில் இயல்பு நிலைக்குத் திரும்பும் என்று மத்திய தகவல் தொடர்புத் துறை அமைச்சர் மனோஜ் சின்ஹா நம்பிக்கை தெரிவித்துள்ளார்.

மார்ச் 29ஆம் தேதி தொலைக்காட்சி நிகழ்ச்சி ஒன்றில் பேசிய அவர், “தொலைத் தொடர்புத் துறையில் பெரும் அழுத்தம் இருப்பது உண்மைதான். எப்போதெல்லாம் அரசுத் துறை ஒன்றில் இதுபோன்ற பிரச்சினைகள் எழுகிறதோ அப்போதெல்லாம் அரசு அதில் தலையிட்டு பிரச்சினையைச் சீரமைக்கும். அவ்வாறாக இத்துறையின் மேம்பாட்டுக்காக அமைச்சர்கள் அடங்கிய சிறப்புக் குழு ஒன்று அமைக்கப்பட்டுள்ளதோடு, மேம்பாட்டுக்கான பரிந்துரைகளும் அமல்படுத்தப்பட்டுவருகின்றன. இத்துறையில் 2002ஆம் ஆண்டில் இதேபோன்றதொரு பிரச்சினை எழுந்தபோது, விரைவில் அரசு அதைச் சீரமைத்தது. எனவே இப்போது இருக்கும் நெருக்கடி நிலை மாறி விரைவில் இயல்பு நிலை திரும்பும்” என்று கூறினார்.

வெள்ளி, 30 மா 2018

chevronLeft iconமுந்தையது
அடுத்ததுchevronRight icon