மின்னம்பலம் மின்னம்பலம்
மாலை 7, வெள்ளி, 3 ஏப் 2020

கடத்தப்பட்ட குழந்தை வீடியோ வெளியீடு!

கடத்தப்பட்ட குழந்தை வீடியோ வெளியீடு!

திருச்சி அரசு மருத்துவமனையில், ஒன்றரை வயதுப் பெண் குழந்தையை கடத்தியவர்களின் சிசிடிவி வீடியோவை போலீசார் வெளியிட்டுள்ளனர்.

திருச்சி அரியமங்கலம், காமராஜர் நகரைச் சேர்ந்த சக்ரவர்த்தி-சரண்யா தம்பதியின் ஒன்றரை வயதுப் பெண் குழந்தை சாதனா. சரண்யா இரண்டாவது பிரசவத்துக்காக கடந்த ஆறாம் தேதி திருச்சி அரசு மருத்துவமனையில் சேர்க்கப்பட்டார். அப்போது 35 வயதுள்ள பெண்ணும் 45 வயதுள்ள ஆணும் சரண்யாவிடம், ‘நாங்கள் குழந்தையை பார்த்துக் கொள்கிறோம்’ என்று சொல்லி குழந்தை சாதனாவை கடத்திச் சென்றனர். பின்னர், குழந்தையைக் காணவில்லையென்றதும் அதிர்ச்சியடைந்து திருச்சி அரசு மருத்துவனை காவல் நிலையத்தில் புகார் அளித்தனர். இதையடுத்து, போலீஸார் குற்றவாளிகளைத் தேடி வந்தனர். இந்நிலையில், மருத்துவமனையில் பொருத்தப்பட்டிருந்த கண்காணிப்புக் கேமராவில் குழந்தையைக் கடத்திய காட்சி பதிவாகியிருந்தது. அதை தற்போது போலீஸார் வெளியிட்டுள்ளனர். மேலும் குழந்தையை கடத்தியவர்கள்பற்றி பொதுமக்களுக்கு ஏதேனும் தெரிந்தால் போலீஸாருக்கு தகவல் தெரிவிக்கலாம் எனவும் கூறியுள்ளனர்.

தமிழக மக்கள் தொகையில் 35சதவிகிதம் பேர் குழந்தைகள். இவர்களில் தினசரி நூற்றுக்கணக்கானோர் காணாமல்போவதாக புகார்கள் வருகின்றன. இவர்களில் பலர் திரும்பக் கிடைப்பதே இல்லை என தமிழக அரசின் ‘மிஸ்ஸிங் சைல்டு பீரோ ’ கூறியுள்ளது. சென்னை, வேலூர், சேலம், கிருஷ்ணகிரி ஆகிய 4 மாவட்டங்களில் அதிகளவில் குழந்தை கடத்தல் நடைபெறுகிறது. தமிழகத்தில் கடந்த ஆண்டில் மட்டும் 656 குழந்தைகள் காணாமல் போயுள்ளார்கள். குழந்தைகள் கடத்தப்படுவது மட்டுமல்லாமல், அவர்களைக் கொலை செய்வதாகவும் தேசிய குற்ற ஆவணக் காப்பகம் தெரிவித்துள்ளது. அவர்கள் அளித்த தகவலின்படி, ஆண்டுதோறும் மகாராஷ்டிரத்தில் 141 குழந்தைகளும், உத்திரப்பிரதேசத்தில் 96 குழந்தைகளும், தமிழகத்தில் 90 குழந்தைகளும் கொலை செய்யப்படுகின்றனர் என்று கூறப்படுகிறது.

வியாழன், 13 அக் 2016

chevronLeft iconமுந்தையது
அடுத்ததுchevronRight icon