டெல்லியில் குடியரசு துணைத் தலைவர் வளாகத்தில் நடைபெற்ற 7வது தொகுதி மாநிலங்களவை உள்ளகப் பயிற்சி திட்டத்தின் பங்கேற்பாளர்களுடன் குடியரசு துணைத்தலைவர் ஜெகதீப் தன்கர் கலந்துரையாடினார். June 25, ‘Samvidhaan Hatya Diwas’- Vice President Jagdeep Dhankhar
அவசரநிலை எனப்படும் ஒரு முக்கியமான வரலாற்று அத்தியாயத்தை நினைவுபடுத்திய அவர், “இன்று நான் ஏழு நாட்களுக்குள் ஒரு சோகமான ஆண்டு நிறைவாக வரும் ஒரு சம்பவத்தைப் பற்றி சிந்திக்கிறேன். 1975 ஆம் ஆண்டு பிரிட்டிஷ் காலனித்துவ ஆட்சியிலிருந்து இந்தியா சுதந்திரம் அடைந்து 28 -வது ஆண்டில் இருந்தது. அது ஜூன் 25, 1975 அன்று நள்ளிரவில் நடந்தது. அப்போதைய பிரதமர் இந்திரா காந்தியின் வேண்டுகோளின் பேரில், அப்போதைய இந்திய குடியரசுதலைவர் ஃபக்ருதீன் அலி அகமது, நாட்டில் அவசரநிலை பிரகடனத்தில் கையெழுத்திட்டார். அது முதல் முறையாக நடந்தது.” என்று கூறினார்.
பிரதமர் ஆலோசனையில் குடியரசு தலைவர் செயல்பட முடியாது
“ஒரு குடியரசு தலைவர், பிரதமர் என்ற ஒரு தனிநபரின், ஆலோசனையின் பேரில் செயல்பட முடியாது. அரசியலமைப்புச் சட்டம் மிகவும் திட்டவட்டமாகத் தெரிவித்துள்ளது. குடியரசு தலைவருக்கு உதவவும் ஆலோசனை வழங்கவும் பிரதமர் தலைமையிலான அமைச்சர்கள் குழு உள்ளது. இதனை மீறி நடந்த ஒரு நடவடிக்கையின் விளைவு என்ன? இந்த நாட்டின் 100,000க்கும் மேற்பட்ட மக்கள் சில மணிநேரங்களில் சிறையில் அடைக்கப்பட்டனர்” என்பதைச் சுட்டிக்காட்டினார்.
எமர்ஜென்சி கொடுமைகள்
ஜனநாயக நிறுவனங்களின் சறுக்கலைப் பற்றி பேசிய அவர், “அவர்கள் தங்கள் வீடுகளில் இருந்து இழுத்துச் செல்லப்பட்டனர், நாடு முழுவதும் சிறைகளில் அடைக்கப்பட்டனர். நமது அரசியலமைப்புச் சட்டம் இல்லாமல் போனது. நமது ஊடகங்கள் பணயக்கைதிகளாகப் பிடிக்கப்பட்டன. சில புகழ்பெற்ற செய்தித்தாள்கள் வெற்று தலையங்கங்களைக் கொண்டிருந்தன” என்றார்.
எமர்ஜென்சி கைதுகளும் தலைவர்களும்
கைது செய்யப்பட்டவர்களின் ஒரு நெகிழ்ச்சியான கதையைப் பகிர்ந்து கொண்ட அவர், “உங்களுக்குத் தெரியுமா, திடீரென்று சிறையில் அடைக்கப்பட்ட இவர்கள் யார்? அவர்களில் பலர் இந்த நாட்டின் பிரதமர்களானார்கள் – அடல் பிஹாரி வாஜ்பாய், மொரார்ஜி தேசாய், சந்திரசேகர். அவர்களில் பலர் முதலமைச்சர்கள், ஆளுநர்கள், விஞ்ஞானிகள் மற்றும் திறமையானவர்கள். அவர்களில் பலர் உங்கள் வயதுடையவர்கள்.” என்றார்.
இருண்ட தீர்ப்பு
நீதித்துறையின் பங்கைப் பற்றிக் குறிப்பிட்ட குடியரசு துணைத் தலைவர், அது ஜனநாயகத்தின் அடிப்படை சாராம்சம் கவிழ்ந்த காலம். துரதிர்ஷ்டவசமாக, உச்ச நீதிமன்றம், சட்டத்தின் ஆட்சியை நம்பும் உலகின் எந்தவொரு நீதித்துறை நிறுவனத்தின் வரலாற்றிலும் இல்லாத மிகவும் இருண்ட தீர்ப்பை வழங்கியது. அவசரநிலையை எவ்வளவு காலம் கடைப்பிடிக்க வேண்டும் என்பது நிர்வாகத்தின் விருப்பம் என்பதே அதன் முடிவாக இருந்தது எனக் குறிப்பிட்டார்.
நியாயப்படுத்தப்பட்ட சர்வாதிகாரம்
அவசரநிலையின் போது, அடிப்படை உரிமைகள் எதுவும் இல்லை. உச்ச நீதிமன்றத்தின் தீர்ப்பு, சர்வாதிகாரத்தை நியாயப்படுத்தியது. எனவே, நீங்கள் அப்போது இல்லாததால் அதை நினைவில் கொள்ள வேண்டும். நான் அங்கு இருந்தேன் என்று அவர் நினைவுகூர்ந்தார்.
ஜூன் 25 அரசியல் சாசனப் படுகொலை நாள்
ஜூலை 11, 2024 அன்று ஒரு அறிவிப்பு வெளியிடப்பட்டது. அது ஒரு சரியான காரணத்திற்காக இருந்தது. நமது குடியரசின் 75 வது ஆண்டைக் கொண்டாடுகிறோம். 1947 இல் நாம் சுதந்திரம் பெற்றோம். சுதந்திரத்தின் 75 வது ஆண்டு முன்னதாக வந்தது, ஆனால் நாம் ஒரு குடியரசாக மாறினோம். எனவே, இந்திய அரசியலமைப்பை ஏற்றுக்கொள்வதை, 75 வது ஆண்டாகத் தொடங்கினோம். ஜூன் 25 ஆம் தேதி அரசியல் சாசன படுகொலை தினம் என்று அறிவிக்கப்பட்டது என்று அவர் கூறினார்.