தலைமுடி என்பது ஒவ்வொருவரின் அழகிலும், தன்னம்பிக்கையிலும் முக்கிய அங்கம் வகிக்கிறது. தலைமுடி உதிர்வு, மெலிந்து போதல் போன்ற பிரச்சினைகள் பலரை பாதிக்கின்றன. இதற்கு தீர்வு காணும் வகையில், பலர் மொட்டை அடித்தால் முடி நன்றாக வளரும் எனக் கருதுகின்றனர். இது உண்மையா?
“முடி வளர்ச்சி என்பது ஒரு சிக்கலான உயிரியல் செயல்முறை. நம் தலையில் உள்ள மயிர்க்கால்கள்தான் முடியின் வளர்ச்சிக்கு அடிப்படையாக அமைகின்றன. மயிர்க்கால்களில் உள்ள செல்கள் தொடர்ந்து பிரிந்து புதிய முடியை உருவாக்குகின்றன.
இந்த செயல்முறை பல கட்டங்களைக் கொண்டது. முதல் கட்டத்தில் முடியின் வேர் ஆழமாக வளர்ந்து தடிமனாகும். பின்னர் முடி வளர்ந்து நீளமாகும்.
மூன்றாவது கட்டம் ஓய்வு கட்டமாகும். இந்தக் கட்டத்தில் முடி வளர்ச்சி நின்று விடுகிறது. கடைசி நான்காவது கட்டத்தில், பழைய முடி உதிர்ந்து புதிய முடி வளரத் தொடங்குகிறது.
மொட்டை அடிப்பது என்பது முடியின் நீளத்தைக் குறைக்கும் செயல்முறையாகும். இந்த செயல்முறை, முடியின் வேர் அல்லது மயிர்க்கால்களை பாதிப்பதில்லை. எனவே, முடியின் கட்டமைப்பில் எந்த மாற்றமும் ஏற்படுவதில்லை.
சிலர் மொட்டை அடித்த பிறகு முடி வேகமாக வளர்வதாக உணர்கின்றனர். இது ஒரு மாயைதான். ஏனெனில், குறுகிய முடி நீளமாக வளர்வது நமக்கு வேகமாகத் தெரியும்.
அதேபோல மொட்டை அடிப்பதால் முடி அடர்த்தி அதிகரிக்கும் என்ற நம்பிக்கையும் பொதுவானது. ஆனால், இதற்கும் எந்த ஓர் அறிவியல் ஆதாரமும் இல்லை.
எனவே, மொட்டை அடிப்பது முடியின் தன்மையில் எவ்விதமான மாற்றத்தையும் ஏற்படுத்தாது.
சிலருக்கு மரபணுவும் முடி உதிர்வுக்கு காரணமாக இருக்கும். இரும்புச்சத்து, துத்தநாகம் போன்ற சத்துகள் குறைபாடு இருந்தால் முடி உதிர்வு ஏற்படலாம். மன அழுத்தத்தை சந்திக்கும் நபராக இருந்தால், முடி உதிர்வு அதிகரிக்கச் செய்யும்.
மேலும், சில மருந்துகளின் பக்க விளைவாகவும் முடி உதிர்தல் பிரச்சினை ஏற்படும். முடி உதிர்வை சரி செய்ய மருத்துவரை அணுகி சரியான சிகிச்சையை எடுத்துக்கொள்ள வேண்டும்.
மொட்டை அடித்தால் முடி நன்றாக வளரும் என்ற கருத்தை நம்ப வேண்டாம். உண்மையில் மொட்டை அடிப்பது முடியின் கட்டமைப்பில் எந்த மாற்றத்தையும் ஏற்படுத்துவதில்லை. இதை ஒவ்வொருவரும் புரிந்துகொள்ள வேண்டும்” என்கிறார்கள் சருமநல மருத்துவர்கள்.
செய்திகளை உடனுக்குடன் பெற மின்னம்பலம் வாட்ஸ் ஆப் சேனலில் இணையுங்கள்…
டாப் 10 நியூஸ் : ஆளுநர் உரையுடன் தொடங்கும் சட்டப்பேரவை முதல் ஜல்லிக்கட்டு முன்பதிவு ஆரம்பம் வரை!
கிச்சன் கீர்த்தனா : ஸ்வீட் கார்ன் – வரகரிசி மசாலா பொங்கல்
மார்க்சிஸ்ட் புதிய செயலாளர் பெ.சண்முகம்… ஸ்டாலின், விஜய் வாழ்த்து!
ஹெல்த் டிப்ஸ்: காதுக்குள் புகுந்த பூச்சி…. விரட்டுவது எப்படி?
பியூட்டி டிப்ஸ்: சருமம் பளபளக்க… வீட்டிலேயே செய்யலாம் நலங்கு மாவு!