இந்தியாவின் நம்பர் 1 விமான நிறுவனமாகத் திகழும் இண்டிகோ (IndiGo), கடந்த நான்கு நாட்களாகத் திக்குமுக்காடி வருகிறது. தொழில்நுட்பக் கோளாறு, பணியாளர் பற்றாக்குறை மற்றும் புதிய விதிமுறைகள் என அடுத்தடுத்து வந்த சவால்களால், நாடு முழுவதும் இண்டிகோ விமானச் சேவைகள் இன்றும் (சனிக்கிழமை) பெரும் பாதிப்பைச் சந்தித்து வருகின்றன.
குறிப்பாக, வார இறுதி நாட்களான இன்றும், நாளையும் பயணம் செய்யத் திட்டமிட்டிருந்த ஆயிரக்கணக்கான பயணிகள் விமான நிலையங்களில் தவிக்கும் நிலை ஏற்பட்டுள்ளது.
நேற்று (வெள்ளிக்கிழமை) நடந்தது என்ன? நேற்று நிலைமை உச்சக்கட்டத்தை எட்டியது. நாடு முழுவதும் ஒரே நாளில் 500-க்கும் மேற்பட்ட இண்டிகோ விமானங்கள் ரத்து செய்யப்பட்டன.
- டெல்லி: தலைநகர் டெல்லியில் உள்ள இந்திரா காந்தி சர்வதேச விமான நிலையத்தில், இண்டிகோ உள்நாட்டு விமானங்களின் புறப்பாடு (Domestic Departures) நேற்று நள்ளிரவு வரை முற்றிலுமாக நிறுத்தப்பட்டது. சுமார் 220 விமானங்கள் ரத்து செய்யப்பட்டதால் பயணிகள் விடிய விடிய விமான நிலையத்திலேயே போராட்டத்தில் ஈடுபட்டனர்.
- சென்னை: சென்னையில் நேற்று மாலை 6 மணி வரை இண்டிகோ விமானச் சேவைகள் ரத்து செய்யப்பட்டிருந்தன.
- பெங்களூரு & ஹைதராபாத்: பெங்களூருவில் 100-க்கும் மேற்பட்ட விமானங்களும், ஹைதராபாத் விமான நிலையத்தில் 90-க்கும் மேற்பட்ட விமானங்களும் ரத்து செய்யப்பட்டன.
காரணம் என்ன? “திடீரென ஏன் இந்த முடக்கம்?” என்பதற்குப் பல காரணங்கள் சொல்லப்படுகின்றன.
- பணியாளர் பற்றாக்குறை: டெல்லி மற்றும் மும்பையில் நடந்த ‘எமிரேட்ஸ்’ (Emirates) விமான நிறுவனத்தின் மாபெரும் ஆள்சேர்ப்பு முகாமில் கலந்து கொள்ள, இண்டிகோவின் பைலட்டுகள் மற்றும் கேபின் க்ரூ (Cabin Crew) பலர் ஒட்டுமொத்தமாக ‘சிக்க் லீவ்’ (Sick Leave) போட்டுச் சென்றதே இந்தப் பற்றாக்குறைக்கு முக்கியக் காரணம் என்று தகவல்கள் தெரிவிக்கின்றன.
- ஓய்வு நேரம் (FDTL): விமானிகளின் பணி நேரம் மற்றும் ஓய்வு நேரம் தொடர்பான புதிய கட்டுப்பாடுகளும் (FDTL Norms) சேவையை பாதித்துள்ளது.
பிப்ரவரி 2026 வரை இப்படியா? இண்டிகோ நிறுவனம் விமானப் போக்குவரத்து இயக்குநரகத்திடம் (DGCA) அளித்த விளக்கம் பயணிகளை அதிர்ச்சியில் ஆழ்த்தியுள்ளது. “விமானச் சேவைகள் முழுமையாகச் சீரடைய பிப்ரவரி10, 2026 வரை ஆகும்” என்று அந்நிறுவனம் தெரிவித்துள்ளது. அதுவரை சேவையைச் சீர்செய்ய, வரும் டிசம்பர் 8 முதல் விமானச் சேவைகளைக் குறைக்கவும் (Scale Down) திட்டமிட்டுள்ளது.
பயணிகள் கவனத்திற்கு: இந்தக் குளறுபடிகள் அடுத்த சில நாட்களுக்கும் தொடரும் என்று எதிர்பார்க்கப்படுகிறது. எனவே, நீங்கள் இண்டிகோ விமானத்தில் பயணிக்கத் திட்டமிட்டிருந்தால்:
- வீட்டிலிருந்து கிளம்பும் முன்பே உங்கள் விமானத்தின் நிலைமை (Flight Status) என்ன என்பதை ஆன்லைனில் சரிபாருங்கள்.
- விமானம் ரத்து செய்யப்பட்டால், மாற்றுப் பயணம் அல்லது ரீஃபண்ட் (Refund) பெறுவதற்கான வழிகளை உடனே இணையதளம் மூலம் மேற்கொள்ளுங்கள்.
வார இறுதி விடுமுறையைக் கொண்டாட நினைத்தவர்களுக்கு, இந்த விமான ரத்து ஒரு பெரிய ஏமாற்றத்தையே தந்துள்ளது!