டிசம்பர் 31ஆம் தேதிக்குள் பான் கார்டை ஆதாருடன் இணைக்காவிட்டால் பான் கார்டு செல்லாது என்று வருமான வரித் துறை எச்சரித்துள்ளது.
பொதுமக்கள் தங்களுடைய பான் எண்ணை ஆதார் எண்ணுடன் இணைக்க டிசம்பர் 31 கடைசி நாள் என்று அரசு அறிவித்துள்ளது. இவற்றை இணைக்காவிட்டால் பான் கார்டு செல்லாது. அதற்கு ரூ.1,000 அபராதமும் விதிக்கப்படும். இந்த இணைப்பைச் செய்யத் தவறினால் வங்கிப் பரிவர்த்தனைகள், கிரெடிட் கார்டுகள், முதலீடுகள் மற்றும் வருமான வரி ரீஃபண்டுகள் பாதிக்கப்படும். ஏன் இந்த காலக்கெடு முக்கியம். வரி செலுத்துவோருக்கு ஒரு இறுதி நினைவூட்டலை வருமான வரித் துறை அனுப்பியுள்ளது. டிசம்பர் 31க்குள் தங்கள் பான் எண்ணை ஆதார் எண்ணுடன் இணைக்க வேண்டும் என்று வலியுறுத்தியுள்ளது.
அக்டோபர் 1, 2024க்குப் பிறகு பான் எண் பெற்றவர்களுக்கு இது கடைசி வாய்ப்பு. ஜனவரி முதல், ஆதார் எண்ணுடன் இணைக்கப்படாத எந்த பான் எண்ணும் செயலிழந்துவிடும். பான் எண்ணை ஆதார் எண்ணுடன் இணைப்பது ஏற்கனவே கட்டாயமாக்கப்பட்டுள்ளது. ஆனால், தாமதமாக இணைப்பவர்களுக்கு டிசம்பர் 31 ஒரு இறுதி காலக்கெடுவாக நிர்ணயிக்கப்பட்டுள்ளது. அதற்குள் இணைக்காவிட்டால் பான் எண் செயலிழந்துவிடும். செயலிழந்த பான் எண், பெரும்பாலான நிதி மற்றும் வரி தொடர்பான தேவைகளுக்கு செல்லாததாகக் கருதப்படும்.
பலருக்கு, வங்கி கணக்கு தொடங்குவது முதல் வருமான வரி தாக்கல் செய்வது வரை எல்லா இடங்களிலும் பான் எண் தேவைப்படுகிறது. பான் எண் செயலிழந்தால், அன்றாட வேலைகள் கூட சிரமமாகிவிடும். பான் எண்ணை ஆதார் எண்ணுடன் இலவசமாக இணைப்பதற்கான காலக்கெடு மே 31, 2024 அன்று முடிந்துவிட்டது. இப்போது இணைப்பவர்கள் ரூ.1,000 தாமதக் கட்டணம் செலுத்த வேண்டும். இந்தத் தொகையை இணைக்கும் விண்ணப்பத்தைச் சமர்ப்பிக்கும் முன் செலுத்த வேண்டும். தாமதத்தைத் தவிர்க்கவே இந்த அபராதம் விதிக்கப்படுவதாக வரித்துறை அதிகாரிகள் கூறுகின்றனர்.
சாதாரண வரி செலுத்துவோருக்கு செயலிழந்த பான் எண் உடனடியாக சிக்கலை ஏற்படுத்தும். உங்களால் வருமான வரி தாக்கல் செய்ய முடியாது. ஏற்கனவே வர வேண்டிய ரீஃபண்ட் கூட, உங்கள் பான் எண் மீண்டும் செயல்படும் வரை நின்றுவிடும். பல அரசு சேவைகளும் பான் எண்ணின் அங்கீகாரத்தைச் சார்ந்துள்ளன. செயலிழந்த பான் எண், படிவம் 26AS-ஐ அணுகுவதைத் தடுக்கலாம். வரி வரவுகளைக் கண்காணிப்பதை கடினமாக்கலாம். பான் எண் செயலிழந்த பிறகு, அதை மீண்டும் செயல்படுத்துவது உடனடியாக நடக்காது என்றும், அதற்கு கூடுதல் படிகள் மற்றும் நேரம் தேவைப்படலாம் என்றும் அதிகாரிகள் எச்சரித்துள்ளனர்.