ஃபீஸ் எவ்வளவுனு வெப்சைட்ல போடுங்க.. தனியார் பள்ளிகளுக்கு அமைச்சர் ராஜ்மோகன் அதிரடி உத்தரவு!

தனியார் பள்ளிகள் கல்வி கட்டணம் (Fee) குறித்து வெளிப்படையாக பொதுமக்களுக்கு தெரிவிக்க வேண்டும் என்று பள்ளி கல்வித் துறை அமைச்சர் ராஜ்மோகன் (Rajmohan) அறிவுறுத்தி உள்ளார்.

சென்னையில் இன்று ஜூன் 4-ந் தேதி செய்தியாளர்களிடம் அமைச்சர் ராஜ்மோகன் கூறியதாவது: தமிழகம் முழுவதும் கோடை விடுமுறை முடிந்து அனைத்துப் பள்ளிக்கூடங்களும் பாதுகாப்பான முறையில் வெற்றிகரமாகத் திறக்கப்பட்டுள்ளன. பள்ளிக்கு வரும் மாணவ மணிகளை வரவேற்று, அவர்களுக்குத் தேவையான அனைத்து வசதிகளும் முறைப்படி சரிபார்க்கப்பட்டு, இன்ஸ்பெக்ஷன் செய்யப்பட்டுள்ளது. மாணவர்களுக்குத் தேவைப்படக்கூடிய பாடப்புத்தகங்கள், வண்ணப் பென்சில்கள் உள்ளிட்ட அனைத்தும் மிகக் கச்சிதமாக வழங்கப்பட்டுள்ளன.

காலை உணவுத் திட்டம்

மாணவர்களுக்கான காலை உணவுத் திட்டம் தற்போதைய ஆட்சியிலும் தொடர்ந்து தங்குதடையின்றி செயல்படுத்தப்பட்டு வருகிறது.

தமிழகத்தில் உள்ள அனைத்துப் பள்ளிக்கூடங்களையும் ஒரே நாளில் மாற்றிவிட முடியாது என்றாலும், எதிர்காலத்தில் அனைத்துப் பள்ளிகளையும் இதேபோல டிஜிட்டல் மயமாக்குவதே அரசின் இறுதி இலக்கு.

கட்டண விவரங்கள் (FEE)

தனியார் பள்ளிகள் தங்களின் கல்விக்கட்டண விபரங்களை (Fee Structure) மிகவும் வெளிப்படையாகத் (Transparent) தங்களின் இணையதளங்களில் பதிவிட்டே ஆகவேண்டும் என உத்தரவிடப்பட்டுள்ளது.

தனியார் பள்ளிகள் தங்களின் இணையதளத்தில் கட்டண விபரங்களைப் பதிவிட்டுள்ளனவா என்பதைத் துறை ரீதியாக அமைச்சர் தொடர்ந்து கண்காணித்து வருவார்.

தனியார் பள்ளிகள் கூடுதல் கட்டணம் வசூலித்தாலோ அல்லது இணையதளத்தில் பதிவிடத் தவறினாலோ, பெற்றோர் தங்களின் மாவட்டக் கல்வி அதிகாரிகள் (CEO) அல்லது இயக்குநர்களிடம் நேரடியாகப் புகார் அளிக்கலாம்.

கல்வித்துறையானது ‘சிங்கிள் விண்டோ சிஸ்டம்’ (Single Window System) என்ற இணைய வழி நிர்வாகத்தை நோக்கி நகர்வதால், இதில் தேவையற்ற அரசியல் தலையீடுகளோ அல்லது லஞ்ச லாவண்யங்களோ இருக்காது.

அரசு நிர்வாகம் போல தனியார் பள்ளிகளும் வெளிப்படைத்தன்மையுடன் செயல்பட்டால், அவர்களின் சேர்க்கை (Enrollment) அதிகரிப்பதோடு மக்கள் மத்தியில் மதிப்பும் கூடும்.

சிபிஎஸ்இ மாணவர்கள்

சிபிஎஸ்இ பள்ளிகள் மாநில அரசின் நேரடிக் கட்டுப்பாட்டின் கீழ் வரவில்லை என்றாலும், அங்கு படிக்கும் மாணவர்களின் நலன் கருதி அவர்களின் மனுக்களும் அலுவலகத்தில் பெற்றுக்கொள்ளப்பட்டுள்ளன.

மாநில எல்லையின் வரம்பிற்கு உட்பட்டு சிபிஎஸ்இ மாணவர்களின் கல்விப் பிரச்சனைகளுக்கு என்னென்ன தீர்வுகள் காண முடியுமோ, அதைப்பற்றித் துறை ரீதியாக விவாதிக்கப்பட்டு வருகிறது.

1 முதல் 3-ஆம் வகுப்பு வரையிலான தமிழ் பாடப்புத்தகங்கள் அனைத்து சிபிஎஸ்இ பள்ளிகளுக்கும் முறைப்படி போய்ச் சேர்ந்துவிட்டன.

பணியிடங்கள் நிரப்புதல்

பள்ளிகளில் காலியாக உள்ள பணியிடங்கள் நீதிமன்ற வழக்குகள், சட்ட நடைமுறைகள் மற்றும் மனிதாபிமான அடிப்படையை ஆராய்ந்து, உரிய கவுன்சிலிங் மூலம் முறைப்படி நிரப்பப்படும்.

3, 5, 8 மற்றும் உயர்நிலை/மேல்நிலைப் பள்ளிகளில் இத்தனை மாணவர்களுக்கு இத்தனை ஆசிரியர்கள் என்ற அரசாங்க விகிதாச்சாரம் (Teacher-Student Ratio) முறைப்படி சரிசெய்யப்பட்டு வருகிறது.

ஓராசிரியர் பள்ளிகள் உள்ள மலைக்கிராமங்கள் அல்லது தொலைதூரப் பகுதிகளில், மாணவர்களின் சேர்க்கை குறைவாக இருந்தாலும் அவர்களுக்குத் தேவையான உள்கட்டமைப்பு மற்றும் சப்போர்ட் சிஸ்டம் (Support System) தொடர்ந்து வழங்கப்படும்.

தலைமை ஆசிரியர்கள் மற்றும் மாவட்ட கல்வி அதிகாரிகள் காலிப் பணியிடங்கள் குறித்த சிஏஜி (CAG) அறிக்கையின்படி, பணி மூப்பு (Seniority) மற்றும் தகுதியின் அடிப்படையில் அந்த இடங்கள் விரைந்து நிரப்பப்படும்.

லேப்டாப் திருட்டு

அரசுப் பள்ளிகளில் போதிய பாதுகாப்பு இல்லாததால் மடிக்கணினிகள் (Laptop) திருடப்படுவதாகக் கூறப்படும் புகார்கள் குறித்துத் தீவிர விசாரணை நடத்தி, தவறு செய்பவர்கள் மீது கடுமையான நடவடிக்கை எடுக்கப்படும்.

முந்தைய ஆண்டுகளைப் போலவே நடப்பு கல்வி ஆண்டிலும் மாணவர்களுக்கான பொதுத்தேர்வு கால அட்டவணை (Board Exam Timetable) மற்றும் தேர்வுகள் உரிய நேரத்தில் முறைப்படி அறிவிக்கப்படும். இவ்வாறு அமைச்சர் ராஜ்மோகன் கூறினார்.