இந்தியா – தென்னாப்பிரிக்கா அணிகளுக்கு இடையிலான மூன்றாவது டி20 போட்டியில் இந்திய அணி தோல்வியடைந்தால் தொடரை இழந்து விடும் நிலையில் 48 ரன்கள் வித்தியாசத்தில் இந்திய அணி வெற்றி பெற்று தொடர் தோல்வியைத் தவிர்த்துள்ளது.
பவுமா தலைமையிலான தென்னாப்பிரிக்க கிரிக்கெட் அணி, இந்தியாவில் சுற்றுப்பயணம் செய்து ஐந்து ஆட்டங்கள் கொண்ட டி20 தொடரில் விளையாடி வருகிறது. இதில் டெல்லியில் நடந்த முதலாவது ஆட்டத்தில் ஏழு விக்கெட்டுகள் வித்தியாசத்திலும், கட்டாக்கில் நடந்த இரண்டாவது ஆட்டத்தில் நான்கு விக்கெட்டுகள் வித்தியாசத்திலும் தென்னாப்பிரிக்க அணி வெற்றி பெற்று தொடரில் 2-0 என்ற கணக்கில் முன்னிலை வகிக்கிறது.
இந்த நிலையில் இந்தியா – தென்னாப்பிரிக்கா அணிகள் இடையிலான மூன்றாவது டி20 கிரிக்கெட் போட்டி விசாகப்பட்டினத்தில் நேற்று (ஜூன் 14) நடந்தது. இந்தப் போட்டியில் இந்திய அணி தோற்றால் தொடரை இழந்து விடும் சூழலில் நடைபெற்ற இந்தப் போட்டியில் டாஸ் வென்ற தென்னாப்பிரிக்க அணி பந்து வீச்சைத் தேர்வு செய்தது.
அதன்படி இந்திய அணி முதலில் பேட்டிங் செய்தது. தொடக்க வீரர்களான ருதுராஜ் கெய்க்வாட் மற்றும் இஷான் கிஷன் இருவரும் அணிக்கு சிறப்பான தொடக்கம் கொடுத்தனர். இருவரும் அரை சதம் அடித்த நிலையில் கெய்க்வாட் 57 ரன்னிலும், கிஷன் 54 ரன்களிலும் ஆட்டமிழந்தனர். அடுத்து வந்த ஸ்ரேயஸ் அய்யர் 14 ரன்னிலும், கேப்டன் ரிஷப் பண்ட் 6 ரன்னிலும் ஆட்டமிழந்தனர்.
இறுதியில் ஹர்த்திக் பாண்டியா ஒருசில பவுண்டரிகளுடன் 31 ரன்கள் எடுக்க, இந்திய அணி 20 ஓவர்கள் முடிவில் 5 விக்கெட்டுகள் இழப்புக்கு 179 ரன்கள் எடுத்துள்ளது. இதையடுத்து 180 ரன்கள் எடுத்தால் வெற்றி என்ற இலக்குடன் தென்னாப்பிரிக்க அணி விளையாட தொடங்கியது.
இந்திய அணியின் பந்து வீச்சை சமாளிக்க முடியாமல் அந்த அணியின் வீரர்கள் அடுத்தடுத்து ஆட்டமிழந்தனர். தொடக்க வீரர்கள் பவுமா 8 ரன்களுக்கும் ,ஹென்ரிக்ஸ் 23 ரன்களுக்கு ஆட்டமிழந்தனர். அடுத்து வந்த வெண்டர் டசன் ஒரு ரன்னிலும் பிரிட்டோரியஸ் 20 ரன்களிலும் ஆட்டமிழந்தனர்.
இதனால் தென்னாப்பிரிக்கா அணியால் சரிவில் இருந்து மீள முடியவில்லை. இறுதியில் தென்னாப்பிரிக்க அணி 19.1 ஓவர்களில் 10 விக்கெட்டுகளையும் இழந்து 131 ரன்களுக்கு ஆட்டமிழந்தது.
இந்திய அணியில் சிறப்பாக பந்து வீசிய ஹர்சல் படேல் நான்கு விக்கெட்டுகளும், சாஹல் மூன்று விக்கெட்டுகளும் வீழ்த்தினர். இதனால் இந்திய அணி 48 ரன்கள் வித்தியாசத்தில் வெற்றி பெற்று தொடர் தோல்வியைத் தவிர்த்துள்ளது.
இரு அணிகளும் மோதும் நான்காவது டி20 போட்டி வரும் 17ஆம் தேதி குஜராத்தில் உள்ள ராஜ்காட்டில் நடைபெறுகிறது.
**ராஜ்**
.
