‘எஸ்பிபி குரலில் நிழல் பதிப்பாக’: ரஜினி கமல் உருக்கம்!

எம்.ஜி.ஆர், சிவாஜி, ரஜினி, கமல், விஜய், அஜித் என அனைத்து முன்னணி நடிகர்களுக்கும் குரலாய் ஒலித்த எஸ்பிபி கொரோனா தொற்று காரணமாக இன்று உயிரிழந்தார்.

அவரது மறைவுக்கு அரசியல் தலைவர்கள், திரையுலக பிரபலங்கள் பலர் இரங்கல் தெரிவித்து வருகின்றனர்.

நடிகர் ரஜினி காந்த் வெளியிட்ட வீடியோ கேப்ஷனில், நீங்கள் பல ஆண்டுகளாக என் குரலாக இருந்தீர்கள். உங்கள் குரலும் , நினைவுகளும் என்னுடன் என்றென்றும் வாழும் என பதிவிட்டுள்ளார். அந்த வீடியோவில் பேசியுள்ள ரஜினி, இன்று மிகவும் சோகமான நாள். கடைசி நிமிடம் வரை உயிருக்காகப் போராடிய எஸ்பிபி நம்மை விட்டுப் பிரிந்துவிட்டார். அவருடைய பிரிவு மிகுந்த வேதனையாகவும் அதிர்ச்சியாகவும் இருக்கிறது. அவருடைய பாட்டுக்கும் குரலுக்கும் ரசிகர்களாக இல்லாதவர்களே இந்தியாவில் இல்லை. அவருக்குத் தெரிந்தவர்கள் அவருடைய பாட்டை விட குரலைவிட அவரையே நிறைய ரசித்தார்கள். அதற்கு அவருடைய மனித நேயம்தான் காரணம். சிறியவர்கள், பெரியவர்கள் என பாராமல் அனைவரையும் மதித்தவர். அன்பான நல்ல மனிதர். கிஷோர் குமார், டிஎம் சவுந்தரராஜன் என எத்தனையோ கலைஞர்களை இந்தியா உருவாக்கியுள்ளது.

#RIP Balu sir … you have been my voice for many years … your voice and your memories will live with me forever … I will truly miss you … pic.twitter.com/oeHgH6F6i4

— Rajinikanth (@rajinikanth) September 25, 2020

ஆனால் அவர்களுக்கு எல்லாம் இல்லாத ஒரு சிறப்பு எஸ்பிபிக்கு உண்டு. அவர்கள் எல்லாரும் குறிப்பிட்ட மொழியில் மட்டுமே பாடினார்கள். ஆனால் எஸ்பிபியோ பல மொழிகளில் பல பாடல்களைப் பாடியுள்ளார். இந்தியாவில் இருக்கும் அனைவருக்கும் எஸ்பிபியை தெரியும். குறிப்பாகத் தென்னிந்திய மக்களுக்கு அவரை தெரியும். அவருடைய ரசிகர்களே இல்லாமல் இருக்க மாட்டார்கள். கம்பீரமான அந்த குரல் இன்னும் 100 ஆண்டு ஆனாலும் கூட நம் காதுகளில் ஒலித்துக் கொண்டே இருக்கும்.ஆனால் அந்த குரலுக்கான உரிமையாளர் இனி நம்முடன் இல்லை என நினைக்கும் போது மிகவும் வருத்தமளிக்கிறது” என்று உருக்கமாகப் பேசியுள்ளார்.

அன்னைய்யா S.P.B அவர்களின் குரலின் நிழல் பதிப்பாக பல காலம் வாழ்ந்தது எனக்கு வாய்த்த பேறு.

ஏழு தலைமுறைக்கும் அவர் புகழ் வாழும். pic.twitter.com/9P4FGJSL4T

— Kamal Haasan (@ikamalhaasan) September 25, 2020

நடிகரும், மக்கள் நிதி மய்யத்தின் தலைவரும், எஸ்பிபியின் நெருங்கிய நண்பருமான கமல் வெளியிட்ட வீடியோவில், ‘வெகுசில பெரும் கலைஞர்களுக்கே தான் வாழும் காலத்திலேயே அவர் திறமைக்குத் தகுந்த புகழ் கிடைக்கும். அப்புகழ் கிடைக்கப்பெற்றவர் என் உடன்பிறவா அண்ணன் எஸ்பிபி. நாடு தழுவிய புகழ் மழையில் நனைத்தபடியே அவரை வழி அனுப்பி வைத்த அவரின் அத்தனை ரசிகர்களுக்கும் அவர்களின் ஒருவனான என் சிரம் தாழ்ந்த வணக்கங்கள்..

அவர் நனைந்த மழையில் என்னையும் நனைய அனுமதித்ததற்கு நன்றி. அவரின் குரலின் நிழல் பதிப்பாகப் பலகாலம் வாழ்ந்தது எனக்கு வாய்த்த பேறு. பலமொழிகளில் நான்கு தலைமுறை திரை நாயகர்களின் குரலாக வாழ்ந்தவர், ஏழு தலைமுறைக்கும் அவர் புகழ் வாழும்” என்று குறிப்பிட்டுள்ளார்.

**கவிபிரியா**�,”