நடிகர் விஜய்யின் ‘தளபதி 66’ படம் குறித்தான அப்டேட் தற்போது வெளியாகியுள்ளது.
வம்சி இயக்கத்தில் நடிகர் விஜய் நடிக்கும் படம் குறித்தான அதிகாரப்பூர்வ அறிவிப்பு கடந்த சில மாதங்களுக்கு முன்பு வந்தது. தெலுங்கு தமிழ் என இரண்டு மொழிகளிலும் இந்த படம் உருவாகிறது. நேரடி தெலுங்கு படம் ஒன்றில் நடிகர் விஜய் நடிப்பது இதுவே முதல் முறை. தில் ராஜூ இதனை தயாரிக்கிறார். நடிகர் விஜய்யின் ஆரம்ப கால படங்களை போன்ற கதையம்சம் கொண்ட குடும்ப படமாக இது இருக்கும். விஜய்க்கு கதை மிகவும் பிடித்திருக்கிறது என தயாரிப்பாளர் தில் ராஜூ தனது சமீபத்திய பேட்டி ஒன்றில் தெரிவித்து இருந்தார்.
படத்திற்கு தமன் இசையமைக்க அதிக வாய்ப்புகள் உள்ளது எனவும் பிரகாஷ்ராஜ் முக்கிய கதாபாத்திரத்தில் நடிக்கிறார் எனவும் தகவல்கள் வெளியாகியன.
மேலும் இந்த படத்திற்கான கதாநாயகியாக பாலிவுட்டில் இருந்து முன்னணி நடிகைகளை ஒப்பந்தம் செய்யவும் படக்குழு திட்டமிட்டுள்ளது. இந்த நிலையில் ‘தளபதி 66’ படத்தில் நடிகர் விஜய் இரட்டை வேடத்தில் நடிக்கிறார் என தற்போது தகவல்கள் வெளியாகியுள்ளது. ‘அழகிய தமிழ் மகன்’, ‘பிகில்’, ‘கத்தி’ திரைப்படங்களுக்கு பிறகு நடிகர் விஜய் இரட்டை வேடத்தில் இந்த படத்தில் நடிக்க இருக்கிறார்.
‘பீஸ்ட்’ திரைப்படம் இந்த வருடம் கோடை விடுமுறை ஒட்டி வெளியாகும் நிலையில் ‘தளபதி 66’ படப்பிடிப்பு மார்ச் மாத இறுதியில் தொடங்கும் என எதிர்பார்க்கப்படுகிறது. படம் குறித்தான அதிகாரப்பூர்வ அறிவிப்பு விரைவில் வெளியாகும் என எதிர்பார்க்கலாம்.
**ஆதிரா.**