ஸ்னீக்பீக் மூலம் ரசிகர்களின் எதிர்பார்ப்பைத் தூண்டும் ‘பப்ளிக்’!

ே.கே.ஆர் சினிமாஸ் தயாரிக்க, ரா.பரமன் இயக்கத்தில் சமுத்திரக்கனி, காளி வெங்கட், ரித்திகா ஆகியோர் நடிக்கும் திரைப்படம் ‘பப்ளிக்’. விரைவில் வெளியாக உள்ள இந்தப் படத்தின் போஸ்டர்கள், ஸ்னீக்பீக்கள் சினிமா வட்டாரத்தில் மட்டுமல்ல, பொதுவெளியிலும் விவாதங்களை ஏற்படுத்தியுள்ளது. இந்த நிலையில் ஸ்னீக்பீக்-3 வெளியாகியுள்ளது.
சிங்காரவேலர், ரெட்டைமலை சீனிவாசன்,அயோத்திதாச பண்டிதர், நடேசனார், கக்கன், சத்தியமூர்த்தி, பாரதிதாசன், இளையபெருமாள், பட்டுகோட்டைஅழகிரி, ஜீவா, நெடுஞ்செழியன், மூக்கையா தேவர், பி.ராமமூர்த்தி, அன்னிபெசன்ட் அம்மையார், காயிதே மில்லத் ஆகியோரின் படங்களை வைத்து வெளியான முதல் பார்வை போஸ்டர் பரபரப்பை ஏற்படுத்தியது. அதில் பெரியார் படம் புறக்கணிக்கப்பட்டது, குறித்து விவாதமும் எழுந்தது. அதற்கு அடுத்து வெளிவந்த ஸ்னீக்பீக் -1 இல் ‘மாடே மாடே’ என்று மாட்டை வைத்து பெட்ரோல் டீசல் விலை உயர்வை நக்கல் செய்யும் காட்சி புதுமையான நையாண்டி தனமாகவும், அதே நேரத்தில் அரசியல் விழிப்புணர்வு ஏற்படுத்தும் விதமாகவும் இருந்தது.
அடுத்ததாக வெளி வந்த ஸ்னீக்பீக் -2 போஸ்டரில் பெரியார், அண்ணா, கருணாநிதி, எம்.ஜி.ஆர், ஜெயலலிதா ஆகியோரைப் போல வேடமிட்டவர்கள், ஒரு டீக்கடை அருகில் அமர்ந்திருப்பதைப் போன்ற போஸ்டரும் கவனத்தை ஈர்த்தது. ஸ்னீக்பீக்-2 வீடியோவில் அரசியல் தலைவர் ஒருவர், தமிழே அறியாத ஒரு பெண்ணுக்குத் தனது கட்சிப் பெயரை சொல்லித் தருவது போலவும், ‘கட்சி பெயரே சொல்ல வரலை… எப்படி சீட் வாங்கித் தருவது’ என்று கேட்பது போலவும் ஒரு ஸ்னீக்பீக் வீடியோ வெளியாகி பரபரப்பை ஏற்படுத்தியது.
அதைத் தொடந்து தற்போது வெளியாகியுள்ள ஸ்னீக்பீக்-3 போஸ்டரில் எம்.ஜி.ஆர் படம், அதிமுக கொடி போன்று வரையபட்ட சுவருக்குக் கீழே ரித்திகா சோகமாக உட்காந்து இருப்பது போன்று போஸ்டர் வெளியிடப்பட்டுள்ளது. எம்.ஜி.ஆர், அதிமுக கொடி என்று இந்த போஸ்டரில் உள்ள குறியீடுகளைப் பார்க்கும்போது மறைந்த முதல்வர் ஜெயலலிதாவை நினைவூட்டுகிறது.
ஸ்னீக்பீக்-3இல் திருக்குறளை எழுதியது திருவள்ளுவரா என்று இலக்கிய அணி பொறுப்புக்கு வரும் ஒருவர் கேட்கும் வீடியோ வெளியாகி உள்ளது. இது இன்றைய தமிழக அரசியல் நிலையைப் பிரதிபலிப்பதுபோல் அமைந்துள்ளது. வித்தியாசமான போஸ்டர்கள், ஸ்னீக்பீக் மூலம் கவனம் பெற்று வரும் பப்ளிக் படம், என்ன சொல்ல வருகிறது, எந்த அரசியலைப் பேச போகிறது என்கிற எதிர்பார்ப்பை ரசிகர்களிடையே எகிற செய்துள்ளது.
**இராமானுஜம்**