மின்னம்பலம் மின்னம்பலம்

வெள்ளி 1 ஏப் 2022

‘டாணாக்காரன்’ தனித்துவமான அனுபவத்தைத் தரும்: விக்ரம் பிரபு

‘டாணாக்காரன்’ தனித்துவமான அனுபவத்தைத் தரும்: விக்ரம் பிரபு

விக்ரம் பிரபு நடித்த டாணாக்காரன் திரைப்படம் வரும் ஏப்ரல் 8ஆம் தேதியன்று டிஸ்னி பிளஸ் ஹாட் ஸ்டார் ஓடிடி தளத்தில் வெளியாகிறது. பொட்டன்ஷியல் ஸ்டூடியோஸ் தயாரித்துள்ள இந்தப் படத்தில் விக்ரம் பிரபு, அஞ்சலி நாயர் மற்றும் லால் ஆகியோர் முதன்மை வேடங்களில் நடிக்க, எம்.எஸ்.பாஸ்கர் மற்றும் லிவிங்ஸ்டன் ஆகியோர் முக்கிய வேடங்களில் நடித்துள்ளனர்.

மாதேஷ் மாணிக்கம் ஒளிப்பதிவு செய்துள்ளார். ஜிப்ரான் இசையமைத்துள்ளார். ஃபிலோமின் ராஜ் எடிட்டராகப் பணியாற்றியுள்ளார்.

காவல் துறை சார்ந்த எண்ணற்ற திரைப்படங்களை தமிழ் சினிமா பார்த்திருந்தாலும், இந்த ‘டாணாக்காரன்’ திரைப்படம் பார்வையாளர்களுக்கு இதுவரையிலும் அறிமுகமில்லாத ஒரு புதிய பார்வையை, ஒரு தனித்துவமான அனுபவத்தை வழங்கும் என்கிறார் தயாரிப்பாளர் எஸ்.ஆர்.பிரபு.

இந்தப் படத்தின் பத்திரிகையாளர் சந்திப்பு நேற்று (மார்ச் 31) பிரசாத் லேப் தியேட்டரில் நடைபெற்றது. இந்த நிகழ்ச்சியில் நாயகன் விக்ரம் பிரபு பேசுகையில், “டாணாக்காரன் என்ற தலைப்பே மிகவும் வித்தியாசமாகவும், அழுத்தமாகவும் இருந்தது. இந்த ஸ்கிரிப்டை கேட்ட பிறகு, இதில் நடித்தே ஆக வேண்டும் என முடிவு செய்தேன். ஒரு நடிகராக எனது திறமையை வெளிப்படுத்தும் படைப்பாக இருக்கும். தமிழ்த் திரையுலகில் படைப்பாற்றல் மற்றும் திறமையாளர்களைக் கண்டெடுத்து, வளர்க்கும் பொட்டன்ஷியல் ஸ்டூடியோஸ் போன்ற தயாரிப்பு நிறுவனத்தில் பணிபுரிவது ஓர் அற்புதமான அனுபவம். தயாரிப்பாளர்களின் ஆதரவு இல்லையென்றால், இந்த ‘டாணாக்காரன்’ இவ்வளவு திருப்திகரமான வெளியீட்டைக் கண்டிருக்க முடியாது.

இயக்குநர் தமிழ் இந்தப் படத்தை தன் உயிராக வடிவமைத்து, மிக அற்புதமான படைப்பாகச் செதுக்கியுள்ளார். ‘டாணாக்காரன்’ மூலம் பார்வையாளர்களுக்கு ஒரு தனித்துவமான அனுபவம் கிடைக்கும் என்று நான் உறுதியாக நம்புகிறேன்” என்றார்.

இயக்குநர் தமிழ் பேசுகையில், “என்னுடைய படத்துக்கு இத்தனை ஆசீர்வாதங்கள் கிடைத்திருப்பது என்னைப் போன்ற ஓர் இயக்குநருக்கு மிகவும் பெருமை.

டாணாக்காரன் கதையின் மீது நம்பிக்கை வைத்த எனது தயாரிப்பாளர்களான எஸ்.ஆர்.பிரகாஷ் பாபு, எஸ்.ஆர்.பிரபு, பி.கோபிநாத் மற்றும் ஆர்.தங்க பிரபாகரன் ஆகியோருக்கு நன்றி. இந்த ஸ்கிரிப்டை வைத்து நான் பல தயாரிப்பு நிறுவனங்களை அணுகியபோது, முதலில் அனைவரும் தயங்கினர். திரைக்கதையில் பல மாற்றங்களை செய்யப் பரிந்துரைத்தனர். ஆனால், பொட்டன்ஷியல் ஸ்டூடியோவின் தயாரிப்பாளர்கள் அத்தகைய மாற்றங்கள் எதையுமே சொல்லவில்லை. இது எனக்கு மிகுந்த ஆச்சரியம் அளித்தது. மேலும் எனது இயக்கத்தில் எந்த குறையும் வராமல் இருக்க, அவர்கள் ஒரு பெரிய பட்ஜெட்டை படத்துக்காக செலவழித்தனர். அவர்கள் அனைவருக்கும் நன்றி. இந்தப் படத்தின் மீது நம்பிக்கை வைத்த விக்ரம் பிரபு சாருக்கு நன்றி. அவர் அற்புதமான நடிப்பை வழங்கியுள்ளார், மேலும் அவரது நடிப்பை பார்வையாளர்கள் விரும்புவார்கள், பெரிதும் பாராட்டுவார்கள் என்று நான் நம்புகிறேன். அஞ்சலி நாயர், லால் சார், எம்.எஸ்.பாஸ்கர் சார் மற்றும் இந்தப் படத்தில் நடித்த ஒவ்வொரு கலைஞர்களும் படத்தின் தரத்தை உயர்த்தி இருக்கிறார்கள். ஏப்ரல் 8ஆம் தேதி முதல், ரசிகர்களின் பாராட்டை எதிர்பார்த்து ஆவலுடன் காத்திருக்கிறேன்” என்றார்.

இராமானுஜம்

பட வெளியீட்டில் ஆதிக்கம் செலுத்தும் ரெட் ஜெயண்ட்!

5 நிமிட வாசிப்பு

பட வெளியீட்டில் ஆதிக்கம் செலுத்தும் ரெட் ஜெயண்ட்!

மகனின் ‘நெஞ்சுக்கு நீதி’ பார்த்த மு.க.ஸ்டாலின்

1 நிமிட வாசிப்பு

மகனின் ‘நெஞ்சுக்கு நீதி’ பார்த்த மு.க.ஸ்டாலின்

பீஸ்ட் இறுதி காட்சி குறித்து விமர்சனம்!

3 நிமிட வாசிப்பு

பீஸ்ட்  இறுதி காட்சி குறித்து விமர்சனம்!

வெள்ளி 1 ஏப் 2022