மின்னம்பலம் மின்னம்பலம்
காலை 7, புதன், 23 செப் 2020

பலவீனமடையும் பூமியின் காந்தப்புலம்: செயலிழக்கும் செயற்கைக்கோள்கள்!

பலவீனமடையும் பூமியின் காந்தப்புலம்: செயலிழக்கும் செயற்கைக்கோள்கள்!

அண்ட கதிர்வீச்சு, சூரியனின் தீங்கு விளைவிக்கும் துகள்கள் ஆகியவற்றிலிருந்து நம்மைப் பாதுகாக்கும் பூமியின் காந்தப்புலம் பலவீனமடைந்து வருகிறதென்று விஞ்ஞானிகள் தெரிவித்துள்ளனர்.

பல ஆண்டுகளாகவே பூமியின் காந்த மண்டலம் அல்லது காந்தப்புலம்(Magnetic Field) பலவீனமடைந்து வருகின்றதற்கான காரணங்களை விஞ்ஞானிகள் ஆராய்ந்து வருகின்றனர். பூமியின் வடக்கு மற்றும் தெற்கு துருவங்கள் சில லட்சம் ஆண்டுகளுக்கு ஒரு தடவை தமது துருவத் தன்மைகளை பரிமாற்றிக் கொள்ளும் இயல்பு கொண்டவை என ஐரோப்பிய விண்வெளி ஆய்வு நிறுவனம் மட்டுமின்றி, நாசா நிகழ்த்திய ஆய்வுகளும் உறுதிப்படுத்தியிருக்கின்றன. மேலும், உலகின் காந்த புலம் பலவீனம் அடைந்து கொண்டே வருவதை உறுதி செய்துள்ளது நாசா.

இந்த காந்த மண்டலம் இல்லாவிட்டால் பூமி வறண்டு செவ்வாய்க் கிரகத்தைப் போல உறைந்து விடும். சூரியனிலிருந்து விலகிச் சென்றுவிடாது பூமியை இயங்கச் செய்வதற்கு இந்த காந்த மண்டலம் தான் காரணமாக இருக்கின்றது என்பது குறிப்பிடத்தக்கது.

இந்நிலையில், ஆப்பிரிக்காவிற்கும் தென் அமெரிக்காவிற்கும் இடையில் பூமியின் காந்தப்புலம் பலவீனமடைந்து, செயற்கைக்கோள்கள் மற்றும் விண்வெளிகளுக்கு பிரச்சினைகளை ஏற்படுத்துகிறது என சமீபத்திய ஆய்வுகள் தெரிவித்துள்ளன. மேலும், விஞ்ஞானிகள் பூமி ஒரு துருவ தலைகீழ் நோக்கிச் செல்லக்கூடும் என்று கருதுகின்றனர். இந்த நிகழ்வை கவனித்து வரும் விஞ்ஞானிகள், தெற்கு அட்லாண்டிக் ஒழுங்கின்மை என அழைக்கப்படும் ஒரு பகுதி சமீபத்திய ஆண்டுகளில் கணிசமாக வளர்ந்துள்ளது என்பதைக் கண்டறிந்தனர். இருப்பினும் அதற்கான காரணம் முற்றிலும் தெளிவாக இல்லை. ஐரோப்பிய விண்வெளி ஏஜென்சியின் செயற்கைக்கோள்களின் திரள் விண்மீன் சேகரித்த தரவுகளைப் பயன்படுத்தி, 1970 மற்றும் 2020க்கு இடையில் ஒழுங்கின்மையின் பரப்பளவு 8 சதவீதத்திற்கும் மேலாக வலிமை குறைந்துள்ளது என்று ஆராய்ச்சியாளர்கள் குறிப்பிட்டனர்.

புவியியலுக்கான ஜெர்மன் ஆராய்ச்சி மையத்தைச் சேர்ந்த ஜூர்கன் மாட்ஸ்கா, "தெற்கு அட்லாண்டிக் ஒழுங்கின்மையின் புதிய கிழக்குப்பகுதி குறைந்தபட்சம் கடந்த பத்தாண்டுகளில் தோன்றியுள்ளது. அத்துடன் சமீபத்திய ஆண்டுகளில் தீவிரமாக அதிகரித்தும் வருகிறது. இதனை தற்போது புரிந்துகொள்வதே சவால் தான்" என்று கூறினார். பலவீனமடைதல் என்பது பூமியின் காந்தப்புலம் தலைகீழாக மாறப்போகிறது என்பதற்கான அறிகுறியாகும். கடைசியாக இந்த "geomagnetic reversal" 7 லட்சத்து 80 ஆயிரம் ஆண்டுகளுக்கு முன்பு நடந்தது. சில விஞ்ஞானிகள் அடுத்ததாக இது நடக்க நீண்ட கால தாமதமாகும் என்று கூறினர். சராசரியாக, இந்த தலைகீழ் மாற்றங்கள் ஒவ்வொரு 2 லட்சத்து 50 ஆயிரம் வருடங்களுக்கு ஒருமுறை நடைபெறும்.

இந்த கண்டுபிடிப்பு ஐரோப்பிய விண்வெளி ஏஜென்சி(ESA) குழுவினரால் செய்யப்பட்டுள்ளது. தொலைதொடர்பு மற்றும் செயற்கைக்கோள் அமைப்புகளும் செயல்பட பூமியின் காந்தப் புலனை நம்பியுள்ளன. தெற்கு அட்லாண்டிக் ஒழுங்கின்மை ஏற்கனவே செயற்கைக்கோள்கள் பூமியைச் சுற்றி வருவதில் சிக்கல்களை ஏற்படுத்தி வருகிறது என ESA எச்சரித்தது. அதே நேரத்தில் இப்பகுதியில் பறக்கும் விண்கலங்களும் தொழில்நுட்ப செயலிழப்பை அனுபவிக்கக்கூடும் எனக் குறிப்பிட்டுள்ளது.

"தெற்கு அட்லாண்டிக் ஒழுங்கின்மையின் தோற்றத்தின் மர்மம் இன்னும் தீர்க்கப்படவில்லை" என்று இந்த விண்வெளி நிறுவனம் இன்ட்டிபென்டன்ட் இதழுக்கு அளித்த பேட்டியில் கூறியது. மேலும், "இருப்பினும், ஒன்று மட்டும் நிச்சயம். காந்தப்புல அவதானிப்புகள் பூமியின் உட்புறம்(earth's interior) குறித்த அரிதாகவே புரிந்துகொள்ளப்பட்ட செயல்முறைகள் குறித்து அற்புதமான புதிய நுண்ணறிவுகளை வழங்குகின்றன" எனத் தெரிவித்துள்ளது.

முகேஷ் சுப்ரமணியம்

ஞாயிறு, 24 மே 2020

chevronLeft iconமுந்தையது
அடுத்ததுchevronRight icon