2026-ம் ஆண்டு சட்டப்பேரவைத் தேர்தலில் திமுக கூட்டணியில் தேமுதிக அதிகாரப்பூர்வமாக இடம் பெற்றுள்ளது. 2005-ம் ஆண்டு கட்சி தொடங்கப்பட்டதில் இருந்து முதல் முறையாக திமுக கூட்டணியில் தற்போது தேமுதிக இடம் பெற்றுள்ளது.
2005-ம் ஆண்டு தேமுதிக கட்சியை நடிகர் விஜயகாந்த் தொடங்கினார்.
2006-ம் ஆண்டு தமிழக சட்டப்பேரவைத் தேர்தலில் தேமுதிக 234 தொகுதிகளிலும் தனித்துப் போட்டியிட்டது. அத்தேர்தலில் தேமுதிக நிறுவனர் விஜயகாந்த் மட்டும் வெற்றி பெற்றார்.
2009-ம் ஆண்டு மக்களவைத் தேர்தலில் 39 தொகுதிகளில் தேமுதிக தனித்து போட்டியிட்டு தோல்வி அடைந்தது.
2011-ம் ஆண்டு சட்டப்பேரவைத் தேர்தலில் அதிமுகவுடன் கூட்டணி அமைத்தது தேமுதிக. அத்தேர்தலில் 41 தொகுதிகளில் போட்டியிட்டு 29 இடங்களில் வென்ற தேமுதிக, சட்டப்பேரவையில் எதிர்க்கட்சி தகுதியையும் பெற்றது.
இதன் பின்னர் அதிமுகவுடனான கூட்டணி முறிந்த நிலையில் தேமுதிகவில் பெரும் பிளவும் ஏற்பட்டது.
2014-ம் ஆண்டு மக்களவைத் தேர்தலில் பாஜக தலைமையிலான தேசிய ஜனநாயகக் கூட்டணியில் இணைந்து 14 தொகுதிகளில் போட்டியிட்டது தேமுதிக. ஆனால் ஒரு தொகுதியில் கூட அக்கட்சி வெற்றி பெறவில்லை.
2016-ம் ஆண்டு சட்டப்பேரவைத் தேர்தலில் மக்கள் நலக் கூட்டணியில் தேமுதிக இடம் பெற்று 104 தொகுதிகளில் போட்டியிட்டது. அந்த தேர்தலிலும் தேமுதிக ஒரு இடத்திலும் வெற்றி பெறவில்லை.
2019-ம் ஆண்டு மக்களவைத் தேர்தலில், அதிமுக கூட்டணியில் மீண்டும் இணைந்த தேமுதிக 4 தொகுதிகளில் போட்டியிட்டு தோல்வியடைந்தது.
2021-ம் ஆண்டு சட்டப்பேரவைத் தேர்தலில் அமமுக தலைமையிலான கூட்டணியில் தேமுதிக இடம் பெற்று 60 தொகுதிகளில் போட்டியிட்ட து. அத்தேர்தலிலும் ஒரு இடத்திலும் தேமுதிக வெற்றி பெறவில்லை.
2024-ம் ஆண்டு மக்களவைத் தேர்தலில் அதிமுக கூட்டணியில் 5 தொகுதிகளில் போட்டியிட்டு தோல்வியைத் தழுவியது தேமுதிக.
தற்போது 2026-ம் ஆண்டு தமிழக சட்டப்பேரவைத் தேர்தலில் திமுக கூட்டணியில் தேமுதிக இணைந்துள்ளது. திமுக கூட்டணியில் முதல் முறையாக தேமுதிக தற்போது இடம் பெற்றுள்ளது.