தமிழனின் வாழ்வியல் வடிவேலு

வடிவேலு…. மனநல மருத்துவம் படித்துவிட்டுத்தான் ஒருவருக்கு சிகிச்சை அளிக்க முடியும் என்றில்லை. எல்லா துன்ப நேரங்களிலும் ஆபத்பாந்தவனாய் வந்து கைகொடுக்கும் சிரிப்பு மருத்துவர் ஒருவர் இருக்கிறார் என்றால் அவர்தான்  வடிவேலு. அந்த சிரிப்பு மருத்துவரின் பிறந்தநாள் இன்று (செப்டம்பர் 12).

அவரை பற்றிய சிறப்பு தொகுப்பு…

கொரோனா பொது முடக்க காலத்தில் வீட்டுக்குள் தமிழக மக்கள் அடைந்து பெரும் துயரங்களை சந்தித்தபோது அதனை எளிதாய் கடந்து போவதற்கு உந்துசக்தியாக இருந்தவர் வடிவேலு. இரண்டு மீம்ஸ்களோ அவரது இரண்டு வசனங்களோ போதும் எப்பேர்ப்பட்ட துயரத்தையும் கடத்தி விடும். 

மக்களின் அன்றாட வழித்துணை!

நவீன கால நெருக்கடிகளிலிருந்து வடிவேலு அளிக்கும் மீட்பை தமிழர்கள் கொண்டாடித் தீர்க்கின்றனர். டெலக்ஸ் பாண்டியன், கைப்புள்ள, வீரபாகு, பாடிசோடா, படித்துறை பாண்டி, அலார்ட் ஆறுமுகம் என கேரக்டர்களாகவும் ஆணியே புடுங்க வேணாம், வட போச்சே, ரூம் போட்டு யோசிப்பாய்ங்களோ, நான் அப்டியே ஷாக்காயிட்டேன், ஹைய்யோ ஹைய்யோ, அவ்வ்வ்வ்வ்… என டயலாக்குகளுடனும் மக்களின் அன்றாட வாழ்க்கையுடன் வழித்துணையாக வந்து வாழ்பவர் வடிவேலு.  

‘’ ‘வேணாம்… வேணாம்’, ‘அவ்வ்வ்’, ‘ஆஹஹஹா’ ‘ம்ம்க்கும்’, ‘போவியா…’  ‘எது?’  என சாதாரண வார்த்தைகளிலேயே நர்த்தனம் புரிந்தவர் வடிவேலு. அவர் வசனத்தில் சேராத வரைக்கும்தான் அவை வார்த்தைகள். அவர் பேசிவிட்டால் அது வைரல். இவையெல்லாம் ஒன்றும் ஒரு இரவில் நடக்கிற காரியமல்ல. இதற்குப் பின்னே லட்சக்கணக்கானோரை  சிரிக்க வைத்த அவரின் நகைச்சுவைத் திறன் இருக்கிறது. 

மொழி புரியாதவர்களையும் தனது உடல்மொழியின் மூலமாகவே சிரிக்க வைத்துவிடுகிறவர் வடிவேலு. மதுரையைச் சொந்த ஊராகக் கொண்டவர்.  ஏழ்மையான குடும்பத்தில் பிறந்த வடிவேலு, போட்டோக்களுக்கான, பெயிண்டிங் மற்றும் கண்ணாடி முகப்புகள் (ஃப்ரேம்)  செய்து தரும் வேலையைச் செய்து வந்தார். அந்தக் கருப்புக் கலைஞன் அப்போது நினைத்திருக்க மாட்டார். தான் பேசப் போகும் வசனங்களை  உலகம் முழுவதும் வாழும் தமிழர்கள் மனப்பாடம் செய்துகொள்வார்கள் என்று.

ஒரு நகைச்சுவை நடிகனுக்கு முக்கியமே அவனின் உடல் மொழி தான், அதில் பிஎச்டி முடித்தவர் இந்த வடிவேலு. நாகேஷை மட்டும் கண்டு வியந்து வந்த திரையுலகிற்கு கருப்பு நாகேஷாக 1991ல் கஸ்தூரி ராஜாவின் இயக்கத்தில் ராஜ்கிரண் தயாரித்த ’என் ராசாவின் மனசிலே’ படத்தின் மூலம் அறிமுகமானார்.

‘போடா போடா புண்ணாக்கு’ என்ற பாடல் மூலம் திரையில் தோன்றிய இவர், தன்னுடைய முதல் திரைப் படத்திலேயே ஒரு நடிகனாகவும், பாடகனாகவும் தன்னுடைய பெயரைத் தமிழ் சினிமாவில் பதிவு செய்தார்.

1992 ஆம் ஆண்டு ஆர்.வி. உதயகுமார் இயக்கத்தில் வெளியான ‘சின்னகவுண்டர்’ என்ற படத்தில் கதாநாயகன் விஜயகாந்துக்கு குடை பிடிக்கிற பண்ணையாள் கதாபாத்திரத்தில் நடித்தார், வடிவேலு.

‘சின்னகவுண்டர்’ படமும் சக்கைப்போடு போட ஆர்.வி. உதயகுமார் மூலம் பிரபு, கார்த்திக், கமல்ஹாசன் என அந்த காலகட்டத்தில் தமிழ் சினிமாவை ஆட்சி செய்துகொண்டிருந்த கதாநாயகர்களின் அறிமுகம் வடிவேலுக்கு கிடைத்தது.

வரவு எட்டணா செலவு பத்தணா’, ‘இளவரசன்’, ‘சிங்காரவேலன்’, ‘தேவர் மகன்’, ‘காத்திருக்க நேரமில்லை’, ‘கிழக்கு சீமையிலே’, ‘நீலக்குயில்’, ‘மகராசன்’ என ஒரே ஆண்டில் பல படங்களில் நடிக்கும் அளவுக்கு முன்னேறினார்.

வடிவேலுவை வாழ்த்திய சிவாஜி

நகைச்சுவை மட்டுமல்லாது குணச்சித்திர வேடங்களிலும் பட்டையைக் கிளப்பியவர் வடிவேலு. அடி, உதை மட்டும் வாங்கி வந்தவருக்கு மைல் கல்லாக அமைந்த படம் தேவர் மகன்.இப்படத்தில் வடிவேலுவின் நடிப்பை கண்ட நடிகர் திலகம் சிவாஜியே ‘படவா நீ பெரிய ஆளா வருவடா’ என்று வாழ்த்தினார்.  சிவாஜியின்  மோதிரக் கையால் குட்டு வாங்கினார் வடிவேலு.

குறுகிய காலத்திற்குள் அந்த காலகட்டத்தில் அசைக்க முடியாத நகைச்சுவை மாமன்னர்களாக விளங்கிக்கொண்டிருந்த கவுண்டமணி மற்றும் செந்தில் இணையுடன், மூன்றாவது நகைச்சுவை நடிகராக இணைந்து வலம் வந்தார். 

வடிவேலுவின் காமெடி முற்றிலுமாக கவுண்டமணியிடம் இருந்து வேறுபட்டது. அது தன்னைத்தானே கிண்டல் செய்துகொண்டது. சுய விமர்சனம் – சுய பகடி என்ற அடிப்படையான நல்ல அம்சத்தைத் தமிழர்களிடம் அறிமுகப்படுத்தியது.

தொடக்கத்தில் வடிவேலு நடித்த ‘அரண்மனை கிளி’, ‘கோகுலம், காதலன்’, ‘ராசகுமாரன்’, ‘வாட்ச்மேன் ,‘பொங்கலோ பொங்கல்’, ‘காலம் மாறிப்போச்சு’, ‘ராசையா’, ‘முத்து‘போன்ற திரைப்படங்களில் ஏற்று நடித்த நகைச்சுவை கதாபாத்திரங்கள் தமிழ் சினிமா ரசிகர்களிடையே பெரும் எதிர்பார்ப்பையும் வரவேற்பையும் பெற்றுத்தந்தது.

ஆண் நகைச்சுவை நடிகர்களே அடி வாங்கியும், அடித்தும் நடித்து கொண்டிருந்த காலக்கட்டத்தில் நகைச்சுவை நடிகை ஒருவரிடம் அடி வாங்கி புதிய டிரெண்டை தொடங்கி வைத்தார் வடிவேலு. நம்ம வீட்டிலேயும் இப்படி தான் நடக்குது என ஆண்களும், நமக்கும் இப்படி ஒரு வாய்ப்பு கிடைத்தால் நன்றாக இருக்கும் என பெண்களும் சிரித்து கொண்டார்கள். காலம் மாறிப்போச்சு, மாயி உள்ளிட்ட பல்வேறு படங்களில் நகைச்சுவையில் வடிவேலு – கோவை சரளா கூட்டணி சக்கைப்போடு போட்டது. 

நந்தவனத் தேரு
ஆணழகன்
காதல் தேசம்
சுந்தர புருஷன்,
மிஸ்டர் ரோமியோ
லவ் பேர்ட்ஸ்
கங்கா கௌரி
பாரதி கண்ணம்மா
திருப்பதி ஏழுமலை வெங்கடேசா விரலுக்கேத்த வீக்கம்
முதல்வன்
வண்ணத்தமிழ் பாட்டு
கந்தா கடம்பா கதிர்வேலா
கூடி வாழ்ந்தால் கோடி நன்மை
என வடிவேலு நடித்த படங்களின் நகைச்சுவை காட்சிகள் பட்டித்தொட்டியெங்கும் சிரிப்பலையை ஏற்படுத்தி மக்களை மகிழ்வித்தது

ஒரு காலகட்டத்திற்குப் பிறகு, பல வெற்றி படங்களில் முக்கிய அங்கமாக விளங்கிய வடிவேலு, 2000 ஆம் ஆண்டு சேரனின் இயக்கத்தில் வெளிவந்த ‘
வெற்றிக் கொடிக்கட்டு’ திரைப்படத்தில் பார்த்திபனுடன் இணைந்து நடித்த நகைச்சுவை காட்சிகள், தமிழ் ரசிகர்களிடையே மாபெரும் கைத்தட்டலைப் பெற்றுத் தந்தது. நடிகர் விஜய், சூர்யா நடிப்பில் 2001 ஆம் ஆண்டு வெளிவந்த ‘ப்ரண்ட்ஸ்’ திரைப்படம் வடிவேலுவின் கிராஃபை எகிற செய்தது.  

கைப்புள்ள கதை

சூட்டிங்கில் கால் பிசகிக்கொள்ள, ஓய்வில் இருந்தார் வடிவேலு. குணமாவது தாமதமாக, காலை விந்தி விந்தி நடிப்பதையே ஸ்டைல் ஆக்கி நடித்த படம்தான் ‘வின்னர்’. 2003ம் ஆண்டு வெளிவந்த இந்த படத்தின் ‘கைப்புள்ள’ என்ற கதாபாத்திரம் வடிவேலுவின் சினிமா வாழ்க்கையில் மாபெரும் திருப்பத்தை ஏற்படுத்தியது. இன்று வரை ‘வின்னர்’ காமெடிதான் அவருக்கு ஆல்டைம் பெஸ்ட். அவருக்கு மட்டுமல்ல நமக்கும்தான்.

வேணாம் வலிக்குது, அழுதுருவேன் காட்சியை 16 டேக்குகள் எடுத்துள்ளனர். காரணம் வடிவேலு அல்ல…. அந்த காட்சியில் கூட நடித்த  நடிகர் ரியாஸ்கான் சிரிப்பை அடக்கவே முடியாமல் விழுந்து விழுந்து சிரித்திருக்கிறார்.

ஒவ்வொரு டேக்கிலும் வடிவேலு அதை வெவ்வேறு மாடுலேஷன்களில் சொல்லி மெருகேற்ற கடைசியில் ஒரு ப்ரேக் விட்டுத்தான் அதை படமாக்கியிருக்கிறார்கள். இன்றும் அந்தக் காட்சியில் ரியாஸ்கான் கொஞ்சம் கட்டுப்பாட்டுடன் சிரிப்பது,  கவனித்து பார்த்தால் தெரியும்.

எப்போதும் வடிவேலுவின் காட்பாதர் என்றால் நடிகர் ராஜ்கிரண் தான். அவர் போட்ட பிச்சை தான் நான் இந்த அளவிற்கு உயர காரணம் என வெகுளியாக பல பேட்டிகளில் கூறியுள்ளார். தமிழ் சினிமாவில் எப்போதுமே நாயகர்களுக்கு இணையான மக்கள் செல்வாக்கும் வரவேற்பும் நகைச்சுவை நடிகர்களுக்கும் உண்டு.

என்.எஸ்.கிருஷ்ணன் காலத்திலிருந்து வடிவேலுவின் காலம் வரை அது தொடர்கிறது என்றாலும் தன் முன்னோடி நகைச்சுவை நடிகர்களில் இருந்து வடிவேலு வேறுபட்டு, நிகழ்த்திக் காட்டிய சாதனைகள் ஏராளம்.

வடிவேலுவும் உடல் மொழியும்!

கதாநாயகர்களை விட ஒரு நகைச்சுவை நடிகருக்கு முகபாவனையும், உடல் மொழியும் மிக முக்கியம். இவ்விரண்டையும் தமது நகைச்சுவையில் வெகு இயல்பாக கலந்து வெளிப்படுத்திய மகா கலைஞன் வடிவேலு,

ஊருக்குள் வாய்ச்சவடால் விட்டுத் திரியும் மனிதர்களைத் திரையில் பிரதிபலித்து காமெடி செய்தார் வடிவேலு. ஹீரோக்களின் பன்ச் டயலாக்குகள், அரசியல் தலைவர்களின் நம்பமுடியாத உறுதிமொழிகள், போலி ஆவேசமும் வீராப்பும் நிறைந்த மேடைப் பேச்சு என திரிந்த உதார் அரசியல்வாதிகளை தனது காமெடி காட்சிகள் மூலம்  அம்பலப்படுத்திய வடிவேலுவின் நடிப்பு திரையரங்குகளை அதிர வைத்தது.

1991 ஆம் ஆண்டு தொடங்கி 2005 வரை பல படங்களில் நகைச்சுவை நடிகராக நடித்துவந்த வடிவேலு, 2006 ஆம் ஆண்டு  இயக்குனர் ஷங்கர் தயாரிப்பில் சிம்புதேவன் இயக்கத்தில் வெளிவந்த ‘இம்சை அரசன் 23ம் புலிகேசி’ என்ற திரைப்படத்தில் முதன் முதலாக இரட்டை வேடங்களில் கதாநாயகனாக நடித்தார்.

23-ம் புலிகேசியாக கோணங்கித்தனம் செய்யும் அரசனாக நடித்த அதே படத்தில் புரட்சிக் குழுவைச் சேர்ந்த போராளியாகவும் நடித்திருப்பார். இரண்டு கதாபாத்திரங்களும் ரசிகர்களிடையே பெரும் வரவேற்பைப் பெற்றது.எந்த நடிகனின் உடல்மொழியையும் நினைவூட்டாத தனிச்சிறப்பான உடல்மொழி அவருடையது. வசனங்கள் எதுவும் இல்லாமலேயே அவரது முகபாவனை மற்றும் உடல்மொழியால் மட்டும் திரையரங்கையே அதிரச்செய்யும் வல்லமை வடிவேலுக்கு அமைந்த சிறப்பு.

வடிவேலுவின் கால்ஷீட்டுக்காக காத்திருந்த குசேலன்!

ஒவ்வொரு கதாநாயகனுடனும் போட்டி போட்டு நடித்தவர் வடிவேலு. காதலன், மற்றும் மனதைத் திருடி விட்டாய் படத்தில் பிரபுதேவாவுடன் அவர் சேர்ந்து செய்த காமெடி காலம் கடந்து மக்களின் அன்றாட வாழ்க்கையில் பயணித்துக் கொண்டிருக்கிறது.  பார்த்திபனுடன், பிரசாந்துடன், முரளியுடன், பிரபுவுடன்  சரத்குமார் உடன் வடிவேலு இணைந்து நடித்த நகைச்சுவைக் காட்சிகள் தொலைக்காட்சிகளின் காமெடி டைம் க்கான வாழ்நாள் ஃபுட்டேஜ் என்றே கூறலாம். எல்லாவற்றுக்கும் மேலாக ரஜினிகாந்த்துடன் முருகேசனாக வடிவேலு நடித்த சந்திரமுகி இன்றும் குழந்தைகள் விழுந்து விழுந்து சிரிக்கும் நகைச்சுவைக் காட்சியாக இருக்கிறது. அப்படம் தந்த வெற்றியால் வடிவேலுவின் கால்ஷீட்டைப் பெற்ற பின்னரே குசேலன் படம் ஆரம்பமானது.

பல படங்களின் வெற்றிக்கு வடிவேலுவின் காமெடி மலையளவு உதவி செய்திருக்கிறது.
வெட்டியானாக, தாய்மாமனாக, போலி மருத்துவராக, வெட்டியாக இருக்கும் கணவனாக, வார்டனாக, கூலியாக என சமூகத்தில் வசிக்கும் அனைத்து தரப்பு மனிதர்களையும் அவர்களது வார்த்தைகளையும் உடல்மொழியையும் திரைமொழியாக்கி நம்மை மகிழ்வித்த கலைஞன் வடிவேலு ஒவ்வொரு கதாபாத்திரத்துக்கும் வெவ்வேறு  மாதிரியான நடிப்புகளை வழங்கியவர் வடிவேலு.

டெலக்ஸ் பாண்டியன் போலீசுக்கும் மருதமலை பட போலீசுக்கும் வித்தியாசம் காட்டுவார். தீப்பொறி திருமுகத்துக்கும், நாய் சேகருக்கும் வித்தியாசம் காட்டுவார். ஒவ்வொரு படத்திற்கும் அவர் காட்டும்  அக்கறையும், ஆர்வமும் அவரை மகா கலைஞனாக உருவாக்கியது என்றால் மிகையல்ல.

புகழின் உச்சத்தில் இருந்த அவர் ஆனந்த விகடனில் எழுதிய வெடி வெடி வேலு வடிவேலு, அவள் விகடனில் எழுதிய வேலு பேசுறேன் தாயி  ஆகியவை இன்னும் அவரை மக்களிடத்தில் அதிகமாய்க் கொண்டு சேர்த்தது.

சுமார் இருபது ஆண்டுகளாக சினிமாவில் மட்டுமே கவனம் செலுத்தி வந்த வடிவேலு, 2011 ஆம் ஆண்டு நடந்த தமிழக சட்டமன்ற தேர்தலில் திமுகவிற்கு ஆதரவாக தமிழகம் முழுவதும் பிரச்சாரத்தில் ஈடுபட்டார். குறிப்பாக, தேமுதிக தலைவர் விஜயகாந்தை கடுமையாக விமர்சித்துப் பேசினார். ஆனால் தேர்தலில் தி.மு.க  தோல்வியை தழுவியதால், மாபெரும் சிக்கலுக்குள்ளான வடிவேலு,

தேர்தல் முடிவுக்கு பிறகு, சுமார் 20 மாதங்களுக்கும் மேல் சினிமாக்களிலும், பொது நிகழ்ச்சிகளிலும் பங்கேற்காமல் ஒதுங்கியே இருந்தார் அதிமுக எதிர்ப்பாளராக கருதப்பட்ட வடிவேலுவை தங்கள் படங்களில் நடிக்க வைக்க அதிமுக ஆதரவு தயாரிப்பாளர்கள் மட்டுமல்லாது திமுக ஆதரவாளர்களும் தயக்கம் காட்டி அவரை ஒதுக்கிவைத்தனர்.  இருந்த போதும் தொலைக்காட்சிகளில் அவரை தவிர்க்க முடியவில்லை அதுதான் உண்மையான கலைஞனுக்கான வெற்றி.

வடிவேலுதான் தெய்வம்

குழந்தை ஒன்று கோமா நிலைக்குச் சென்று விட மருத்துவர்கள் குழந்தைக்கு எது மிகவும் பிடிக்கும் எனக் கேட்டிருக்கிறார்கள். வடிவேலுவின் காமெடி என்று சொல்லியிருக்கிறார்கள். அப்படியானால் தினமும் அதைப் போட்டுக் காண்பியுங்கள் என்று மருத்துவர் சொல்லியிருக்கிறார். 40 – 50 சிடிகளை வாங்கி தினமும் ஒரு மணி நேரம் அந்த அறையில் வடிவேலுவின் காமெடி ஓடியிருக்கிறது. சில நாட்களில் அந்தக் குழந்தை சிரித்து மகிழ்ந்திருக்கிறாள்.

வடிவேலுவைச் சந்தித்த அந்தப் பெற்றோர் வடிவேலுதான் எங்கள் தெய்வம் என்று சொல்லி விட்டுப் போயிருக்கிறார்கள். இதையே தனக்கான மிகப்பெரும் விருது என பெருமிதம் கொண்டார் வடிவேலு.

வடிவேலுவின் மனசுக்குப் பிடித்த நடிகை சரோஜா தேவிதான். ‘ஆதவன்’ படப்பிடிப்பில் அவரிடமே ‘நில்லடி நில்லடி சீமாட்டி’ பாடலை முழுதாகப் பாடிக் காட்டி நடித்து சபாஷ் வாங்கியதைச் சந்தோஷத்தோடு குறிப்பிடுவார்.

வடிவேலுவின் சொந்த ஊர்  வைகை நதிக்கரையில் அமைந்துள்ள மதுரை. அதுவே இவருக்கு அடைமொழியாக வந்துவிட்டது. கவுண்டமணி, செந்தில் கூட்டணியில் தொடங்கி, விவேக், கருணாஸ் போன்ற பலருடன் நகைச்சுவையில் ஆதிக்கம் செலுத்தியவர் வடிவேல்.

சினிமாவில் சம்பாதித்து தான் முதன் முதலாக வாங்கிய கார் டாடா சியாராவை இன்னும் பத்திரமாகப் பாதுகாத்து வருகிறார், வடிவேலு. முதலில் வாங்கிய சொத்து என்பதால், நேரம் கிடைக்கும்போதெல்லாம் அந்த காரை அவரே துடைத்துச் சுத்தப்படுத்துவார். டி.எம்.சௌந்தர்ராஜனின் வெறிபிடித்த ரசிகர் வடிவேலு.

அவர் பாடிய நூற்றுக்கணக்கான பாடல்களை அப்படியே ராகம் போட்டுப் பாடுவார். சூட்டிங் ஸ்பாட்டில் வடிவேலு இருந்துவிட்டால் இளம் தலைமுறை கதாநாயகர்கள் தங்கள் கதாநாயகனாக அவரைத் தாங்கிக் கொண்டாடுவார்கள்.

சிரிப்பு வெடிகளைக் கொளுத்திப் போட்டு அதிரவைப்பார். வடிவேலுவின் பயங்கர ரசிகர் விஜய்.சந்திரபாபு, தங்கவேலு, சுருளிராஜன் தான் வடிவேலுவின் நகைச்சுவை குருக்கள். தன்னை இவர்களின் கலவை என நடிகர் ரஜினிகாந்த் ஒரு மேடையில் சொன்னதைச் நினைத்து சிலாகிப்பார். 

அதே போல் தன்னை இந்த நிலைக்கு கொண்டு வந்த ரயில் பயணத்தையே அதிகம் விரும்புவர் வடிவேலு. விடுமுறை கிடைத்தால், குடும்பத்துடன்  குற்றாலத்துக்குப் போய்விடுவார். வெளிநாடு என்றால் பிடித்த ஊர் லண்டன்தான். ‘தேம்ஸ் நதியில மிதக்கிறது வடிவேலுக்கு பிடித்த விசயம். இதே போல் மீன் குழம்பு வெறியர். 

வடிவேலு பெற்ற விருதுகள்!

450க்கும் மேற்பட்ட படங்களில் நடித்துள்ள வடிவேலுவுக்கு காலம் மாறிப்போச்சு,   வெற்றிக்கொடிகட்டு, தவசி,  இம்சை அரசன் 23ஆம் புலிகேசி, காத்தவராயன் போன்ற திரைப்படங்களுக்காக சிறந்த நகைச்சுவை நடிகருக்கான ‘தமிழ்நாடு அரசு மாநில விருது’ வழங்கப்பட்டது. சந்திரமுகி,  இம்சை அரசன் 23ஆம் புலிகேசி திரைப்படத்திற்காக சிறந்த நகைச்சுவை நடிகருக்கான ‘ஃபிலிம்பேர்’ விருது கிடைத்தது. 

தனது திரைப்பட வசனங்களை ஒரு ஒட்டுமொத்த மொழிபேசும் மக்களின்  அன்றாட வழக்கு  மொழியாக்கிய பெருமை நூற்றாண்டு கண்ட தமிழ் சினிமாவில்  வடிவேலுவை மட்டுமே சேரும். மதுரை பேச்சு வழக்கை பாகுபாடில்லாமல் பிரபலமாக்கி தமிழ்நாட்டின் பேச்சு வழக்காக மாற்றியது வடிவேலு என்னும் மகா கலைஞனின்  சாதனை. 

திரைமொழி இருக்கும் வரை வடிவேலுவின் நடிப்பு செல்லுலாய்டில் உறைந்தே இருக்கும். நூற்றாண்டைக் கடந்த தமிழ் சினிமாவின் தவிர்க்க முடியாத கலைஞன் வடிவேலு.

தொகுப்பு: இராமானுஜம்

இளையராஜா நிகழ்ச்சியில் வடிவேலு