கடந்த 2019 ஆம் ஆண்டில் மலையாள நடிகர் ப்ரித்விராஜ் இயக்கத்தில் மலையாள சூப்பர் ஸ்டார் மோகன்லால் நடிப்பில் வெளியான லூசிஃபர் படம் மெகா ஹிட் அடித்தது. மலையாள திரையுலகில் 200 கோடி ரூபாய் வசூல் செய்த முதல் படம் என்ற பெருமையும் லூசிஃபர் படத்திற்கு உள்ளது.
இந்த படத்தில் ஸ்டீபன் கதாபாத்திரத்தில் நடித்திருந்த மோகன்லால் படத்தின் இறுதி காட்சிகளில் குரேஷி ஆபிரகாம் என்ற இன்டர்நேஷனல் டான் ஆக வந்து நிற்பார்.
அத்தோடு லூசிஃபர் படம் முடிந்திருக்கும். அந்த நொடியில் இருந்து லூசிஃபர் படத்தின் இரண்டாம் பாகத்திற்கான எதிர்பார்ப்பு ரசிகர்கள் மத்தியில் தீயாக பற்றி கொண்டது.
அதன் பிறகு லூசிஃபர் இரண்டாம் பாகத்திற்கான வேலைகள் தொடங்க உள்ளதாக கடந்த ஆகஸ்ட் மாதம் அறிவிப்பு வெளியானது. லூசிஃபர் இரண்டாம் பாகத்திற்கு “L2 எம்புரான்” என டைட்டில் வைக்கப்பட்டது.
இந்நிலையில் இரண்டாம் பாகத்திற்கான படப்பிடிப்பு அக்டோபர் 5 தேதி தொடங்க உள்ளதாக Glimpse வீடியோவை வெளியிட்டு படக்குழு அறிவித்துள்ளது.
அந்த Glimpse வீடியோவில் லூசிஃபர் முதல் பாகத்தின் காட்சிகளையும் வசனங்களையும் சேர்த்து இரண்டாம் பாகத்திற்கான ஆர்வத்தை தூண்டும் வகையில் வீடியோவை வெளியிட்டுள்ளனர்.
மேலும் லூசிஃபர் இரண்டாம் பாகம் ஐந்து மொழிகளில் பான் இந்தியா படமாக வெளியாக உள்ளது.
லூசிஃபர் முதல் பாகத்தை தயாரித்த ஆசிர்வாத் சினிமாஸ் தான் இரண்டாம் பாகத்தையும் தயாரிக்கிறது. இதில் கூடுதல் சிறப்பு என்னவென்றால் லைக்கா நிறுவனமும் ஆசிர்வாத் சினிமாஸ் நிறுவனத்துடன் இணைந்து லூசிஃபர் இரண்டாம் பாகத்தை தயாரிக்க உள்ளது.
இதன் மூலம் மலையாள திரையுலகில் முதன்முறையாக என்ட்ரி கொடுக்கிறார் தயாரிப்பாளர் சுபாஸ்கரன்.
நடிகர் ப்ரித்விராஜ் தான் இரண்டாம் பாகத்தையும் இயக்குகிறார். மேலும் முதல் பாகத்தில் அவர் நடித்திருந்த கதாபாத்திரத்தை இரண்டாம் பாகத்திலும் தொடர்வார் என்று எதிர்பார்க்கப்படுகிறது.
லூசிஃபர் முதல் பாகத்தை தெலுங்கு சூப்பர் ஸ்டார் சிரஞ்சீவி “காட்ஃபாதர்” என்ற பெயரில் ரீமேக் செய்தார். அந்த படத்தை மோகன் ராஜா இயக்கியிருந்தார்.
லூசிஃபரில் ப்ரித்விராஜ் நடித்திருந்த கதாபாத்திரத்தை காட்ஃபாதர் படத்தில் சல்மான் கான் நடித்திருந்தார். ஒருவேளை லூசிஃபர் 2 மெகா ஹிட் அடித்தால், காட்ஃபாதர் 2 படத்தையும் எதிர்பார்க்கலாம்.
– கார்த்திக் ராஜா
செய்திகளை உடனுக்குடன் பெற மின்னம்பலம் வாட்ஸ் ஆப் சேனலில் இணையுங்கள்…
வேலைவாய்ப்பு: தேசிய காசநோய் ஆராய்ச்சி மையத்தில் பணி!
