மார்க்கெட்டிங்கிற்காக போட் படத்தின் தலைப்பு ஆங்கிலத்தில் வைக்கப்பட்டுள்ளது என்று இயக்குனர் சிம்புதேவன் தெரிவித்துள்ளார்.
நடிகர் வடிவேலு நாயகனாக நடித்த இம்சை அரசன் 23-ஆம் புலிகேசி படத்தின் மூலம் இயக்குநராக அறிமுகமானவர் சிம்புதேவன். வழக்கமான மசாலா சினிமாக்களை இயக்காமல், காமெடி படங்கள் மூலம் அரசியல் பகடி செய்யும் திரைப்படங்களை இயக்குவதில் ஆர்வம் கொண்ட சிம்புதேவன் இயக்கத்தில் தயாரிக்கப்பட்டுள்ள படம்” போட்”.
ஆகஸ்ட் 2 ஆம் தேதி வெளியாக உள்ள இப்படத்தில் யோகி பாபு, எம்.எஸ்.பாஸ்கர், சாம்ஸ், சின்னி ஜெயந்த், கவுரி ஜி கிஷன் ஆகியோர் நடித்துள்ளனர்.
இரண்டாம் உலகப்போர் நடக்கும் 1942 ஆம் ஆண்டு காலகட்டத்தில் யுத்த பாதிப்பில் இருந்து தப்பிக்க படகு ஒன்றில் 10 நபர்கள் கடலுக்குள் பயணிக்கும் ஒரு படகில் பல்வேறு விதமான , முரணான மனிதர்கள், இருந்தால் என்னவாகும் என்பதே திரைக்கதை.
படகில் பயணிக்கும் போது ஏற்படும் கருத்து மோதல்களை திரைப்படமாக்கியிருக்கிறார் சிம்புதேவன். தான் இயக்கிய காமெடி, காமிக்ஸ் படங்களில் அரசியல்வாதிகளை அசால்ட்டாக பகடி செய்யும் வசனங்களை எழுதுகிற சிம்புதேவன்” போட்” படத்திலும் அதனை செய்திருக்கிறார் என்கின்றனர் இயக்குநர் வட்டாரத்தில்.
படம் வெளியாவதையொட்டி இயக்குநர் சிம்புதேவன் மற்றும் படக்குழுவினர் சென்னையில் பத்திரிகையாளர்களை சந்தித்தனர். அப்போது பேசிய சிம்புதேவன், “நான் இதுவரை எடுத்த படங்களை போலவே இந்த படமும் வித்தியாசமான படமாக எடுக்கும் வாய்ப்பு அமைந்தது.
சொன்ன மாதிரியே எடுத்துக் கொடுங்கள் என்று தயாரிப்பாளர் நம்பிக்கை கொடுத்தார். பொதுவாக வரலாற்றில் நமது விஷயங்கள் மறைக்கப்படுகிறது என்ற ஆதங்கம் எனக்கு இருக்கிறது. சுதந்திர போராட்டத்தை பொறுத்தவரை டெல்லி ,மும்பை நகரங்களுக்கு கொடுக்கப்படும் முக்கியத்துவத்தை, சென்னைக்கு கொடுக்கப்படுவதில்லை.
இரண்டாம் உலகப் போர் பற்றிய ஆங்கில படங்களிலும் இந்தியர்கள் காட்டப்படமாட்டார்கள். ஆனால், இரண்டாம் உலகப் போரில் 25 லட்சம் பேர் இறந்துள்ளனர் என தகவல் உள்ளது. நான் இதுவரை எட்டு படங்களை இயக்கியுள்ளேன். கால தாமதம் ஏற்படுவதற்கு சூழல் தான் காரணம்” என்றார்.
தொடர்ந்து படத்தின் தலைப்பு ஆங்கிலத்தில் வைக்கப்பட்டுள்ளது ஏன் என கேட்கப்பட்ட போது, “இப்படத்திற்கு நாங்கள் முதலில் வைத்த பெயர் ”பக்கிங்காம் வீரனும் பரதேசியின் பேரனும்”. ஆனால், மார்க்கெட்டிங் தேவை எனும் வரும்போது ஆங்கில தலைப்பு வைக்கப்பட்டுள்ளது” என கூறினார்.
இராமானுஜம்
செய்திகளை உடனுக்குடன் பெற மின்னம்பலம் வாட்ஸ் ஆப் சேனலில் இணையுங்கள்…
சட்டென மாறிய வானிலை: செம்ம கிளைமேட்… வானிலை மையம் லேட்டஸ்ட் அப்டேட்!
மேட்டூர் அணை நீர் திறப்பு : ஆலோசனை கூட்டத்தில் முக்கிய முடிவு!
