R.P.பாலா இயக்கத்தில் பரத், வாணி போஜன் நடிப்பில் உருவாகியுள்ள திரைப்படம் தான் “லவ்”. பரத்தின் ஐம்பதாவது திரைப்படமான இப்படத்தின் இசை மற்றும் டிரைலர் வெளியீட்டு விழா சென்னையில் நேற்று (ஜூலை 13) மாலை நடைபெற்றது.
தமிழ் சினிமாவில் திறமை இருந்தும் உரிய, வாய்ப்பு கிடைக்காமல் காணாமல் போனவர்கள் உண்டு. வாய்ப்பு கிடைத்தும் அங்கீகாரம் கிடைக்காமல் பல ஆண்டுகளாக தவித்து வரும் நடிகர்களும் உண்டு. அந்த வகையில் இரண்டாவது பட்டியலில் இடம்பெற்றுள்ளவர்களில் பரத்தும் ஒருவர்.
கடந்த 2003ம் ஆண்டு ஷங்கர் இயக்கத்தில் வெளியான “பாய்ஸ்” திரைப்படத்தின் மூலம் திரையுலகில் அறிமுகமான நால்வரில் ஒருவர் தான் பரத்.
அந்த படத்தில் நடிகராக அறிமுகமான தமன் தற்பொழுது தெலுங்கு மற்றும் தமிழ் திரையுலகில் மிகப்பெரிய இசையமைப்பாளராக விளங்குகிறார். சித்தார்த் தெலுங்கு, இந்தி படங்களில் நடித்து வருகிறார்.
அந்த வகையில் பெரிய வெற்றியும் அடையாமல், பெரிய தோல்வியும் அடையாமல் பயணித்து வரும் இருவர் தான் நகுல் மற்றும் பரத். பாய்ஸ் படத்தை தொடர்ந்து பரத் நடிப்பில் வெளியான காதல் திரைப்படம் அவருடைய வணிக மதிப்பை உயர்த்தியது. இருந்தபோதிலும் முன்னணி நடிகராக தொடர முடியாமல் அவர் நடித்த அடுத்தடுத்த படங்களின் தோல்வி தடுத்தது.
அந்த வகையில் தற்பொழுது பரத் நடிப்பில் வெளியாக உள்ள திரைப்படம் தான் “லவ்”. இது அவருடைய ஐம்பதாவது திரைப்படம் என்பது குறிப்பிடத்தக்கது.
லவ் திரைப்படத்தின் டிரைலர் வெளியான நிலையில் சென்னையில் நேற்று படத்தின் இசை வெளியீட்டு நடைபெற்றது. அப்போது செய்தியாளர் சந்திப்பில் பேசிய பரத் “இந்த 20 ஆண்டுகாலமாக நான் நடித்த திரைப்படங்களை பார்த்து, அந்த படம் சரியில்லை என்றாலும் கூட எனது நடிப்பு அதில் சிறந்த வகையில் அமைந்துள்ளது என்று என்னை தொடர்ந்து உத்வேகப்படுத்திக் கொண்டிருக்கும் ஊடக நண்பர்களை வணங்குகிறேன்” என்று கூறி இருகரம் கூப்பி வணங்கினார்.
தொடர்ந்து பேசிய பரத், “ஒரு படம் எடுத்து முடித்த பிறகு, அந்த படம் வெளியாகும் வரை படக்குழு படும்பாடு சொல்லி மாளாது, எல்லாவற்றையும் தாண்டி தற்போது லவ் திரைப்படம் உங்கள் முன் வெளியாகவுள்ளது அனைவரும் தங்கள் ஆதரவை தரவேண்டும்” என்று கூறினார் பரத்.
